ਬਿਡੇਨ ਨੇ ਕਿਹਾ, ਚੀਨ ਸਾਡੀ ਪਰਖ ਕਰ ਰਿਹੈ

ਵਾਸ਼ਿੰਗਟਨ : ਕਵਾਡ ਸਮਿਟ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਜੋ ਬਿਡੇਨ ਨੇ ਹਾਟ ਮਾਈਕ 'ਤੇ ਚੀਨ ਬਾਰੇ ਕੁਝ ਅਜਿਹਾ ਕਿਹਾ ਜੋ ਚਰਚਾ 'ਚ ਆ ਗਿਆ। ਜੋ ਬਿਡੇਨ ਨੇ ਕਿਹਾ ਕਿ ਚੀਨ ਸਾਡੀ ਪਰਖ ਕਰ ਰਿਹਾ ਹੈ। ਬਿਡੇਨ ਨੇ ਇਹ ਗੱਲ ਉਦੋਂ ਕਹੀ ਜਦੋਂ ਪੱਤਰਕਾਰ ਕਾਨਫਰੰਸ ਵਾਲੀ ਥਾਂ ਤੋਂ ਬਾਹਰ ਜਾ ਰਹੇ ਸਨ। ਦੱਸਿਆ ਜਾਂਦਾ ਹੈ ਕਿ ਉਸ ਨੇ ਇਹ ਗੱਲ ਬਹੁਤ ਹੀ ਨਰਮੀ ਨਾਲ ਕਹੀ ਪਰ ਉੱਥੇ ਮੌਜੂਦ ਲੋਕਾਂ ਨੇ ਸੁਣ ਲਿਆ। ਬਾਅਦ ਵਿੱਚ ਵ੍ਹਾਈਟ ਹਾਊਸ ਨੇ ਵੀ ਇਸ ਦਾ ਬਚਾਅ ਕੀਤਾ। ਬਿਡੇਨ ਨੂੰ ਇਹ ਕਹਿੰਦੇ ਸੁਣਿਆ ਗਿਆ ਕਿ ਮੈਨੂੰ ਲੱਗਦਾ ਹੈ ਕਿ ਜਿਨਪਿੰਗ ਚੀਨ ਨੂੰ ਹਮਲਾਵਰ ਤਰੀਕੇ ਨਾਲ ਅੱਗੇ ਵਧਾਉਣ ਲਈ ਕੁਝ ਕੂਟਨੀਤਕ ਜਗ੍ਹਾ ਖਰੀਦਣਾ ਚਾਹੁੰਦੇ ਹਨ।

81 ਸਾਲਾ ਨੇਤਾ Biden ਨੇ ਕਿਹਾ ਕਿ ਚੀਨ ਦਾ ਹਮਲਾਵਰ ਵਤੀਰਾ ਜਾਰੀ ਹੈ। ਉਹ ਆਰਥਿਕ ਅਤੇ ਤਕਨੀਕੀ ਸਮੇਤ ਕਈ ਮੋਰਚਿਆਂ 'ਤੇ ਪੂਰੇ ਖੇਤਰ ਵਿੱਚ ਲਗਾਤਾਰ ਸਾਡੀ ਪਰਖ ਕਰ ਰਿਹਾ ਹੈ। ਬਿਡੇਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਕਵਾਡ ਰਾਸ਼ਟਰ ਮੰਨਦੇ ਹਨ ਕਿ ਤੀਬਰ ਮੁਕਾਬਲੇ ਦੇ ਸਮੇਂ ਤੀਬਰ ਕੂਟਨੀਤੀ ਦੀ ਜ਼ਰੂਰਤ ਹੈ। ਅਮਰੀਕੀ ਰਾਸ਼ਟਰਪਤੀ ਦੀਆਂ ਟਿੱਪਣੀਆਂ ਸ਼ਨੀਵਾਰ ਨੂੰ ਕਵਾਡ ਸੰਮੇਲਨ ਦੌਰਾਨ ਆਈਆਂ, ਜਿਸ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਜਾਪਾਨ ਦੇ ਪ੍ਰਧਾਨ ਮੰਤਰੀ ਫੂਮਿਓ ਕਿਸ਼ਿਦਾ ਅਤੇ ਆਸਟਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਸ਼ਾਮਲ ਹੋਏ।