2025 ਤੱਕ ਭਾਰਤ ਨੂੰ ਟੀਬੀ ਮੁਕਤ ਬਣਾਉਣ ਦੀ ਅਪੀਲ, ਮੇਘਾਲਿਆ ਨੇ ਚੁੱਕਿਆ ਵੱਡਾ ਕਦਮ

ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਨੇ ਭਾਰਤ ਨੂੰ ਟੀਬੀ ਮੁਕਤ ਬਣਾਉਣ ਲਈ ਸਾਰੇ ਨਾਗਰਿਕਾਂ ਨੂੰ ਮਿਲ ਕੇ ਕੰਮ ਕਰਨ ਦੀ ਅਪੀਲ ਕੀਤੀ ਹੈ। ਗੁਜਰਾਤ ਇਸ ਟੀਚੇ ਨੂੰ ਪ੍ਰਾਪਤ ਕਰਨ ਵੱਲ ਅੱਗੇ ਵਧ ਰਿਹਾ ਹੈ, ਜਦਕਿ ਮੇਘਾਲਿਆ ਨੇ 4500 ਟੀਬੀ ਮਰੀਜ਼ਾਂ ਨੂੰ ਗੋਦ ਲੈ ਕੇ 100 ਦਿਨਾਂ ਦੀ ਤੀਬਰ ਮੁਹਿੰਮ ਸ਼ੁਰੂ ਕੀਤੀ ਹੈ।

ਵਿਸ਼ਵ ਤਪਦਿਕ ਦਿਵਸ ‘ਤੇ ਰਾਸ਼ਟਰਪਤੀ ਦਾ ਸੰਦੇਸ਼

24 ਮਾਰਚ, ਜੋ ਕਿ ਵਿਸ਼ਵ ਤਪਦਿਕ (ਟੀਬੀ) ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ, ਇਸ ਮੌਕੇ ਤੇ ਰਾਸ਼ਟਰਪਤੀ ਨੇ ਕਿਹਾ, "ਇਹ ਦਿਨ ਸਾਨੂੰ ਟੀਬੀ ਦੇ ਜਲਦੀ ਪਤਾ ਲਗਾਉਣ, ਇਲਾਜ ਅਤੇ ਰੋਕਥਾਮ ਦੀ ਮਹੱਤਤਾ ਯਾਦ ਦਿਵਾਉਂਦਾ ਹੈ। ਮੈਨੂੰ ਭਾਰਤ ਨੂੰ ਟੀਬੀ-ਮੁਕਤ ਬਣਾਉਣ ਲਈ ਸਾਰਿਆਂ ਦੇ ਸਹਿਯੋਗ ਦੀ ਉਮੀਦ ਹੈ।"

ਭਾਰਤ ਸਰਕਾਰ ਦੀ ਟੀਬੀ ਖ਼ਤਮ ਕਰਨ ਦੀ ਯੋਜਨਾ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ 2025 ਤੱਕ ਭਾਰਤ ਵਿੱਚੋਂ ਟੀਬੀ ਨੂੰ ਖ਼ਤਮ ਕਰਨ ਦਾ ਟੀਚਾ ਰੱਖਿਆ ਹੈ। ਇਸ ਦੇ ਤਹਿਤ, 2022 ਵਿੱਚ ਸ਼ੁਰੂ ਕੀਤੇ ‘ਨਿਕਸ਼ੇ ਮਿੱਤਰ’ ਪ੍ਰੋਗਰਾਮ ਅਧੀਨ ਨਿੱਜੀ ਅਤੇ ਸਰਕਾਰੀ ਸੰਸਥਾਵਾਂ ਨੇ ਟੀਬੀ ਮਰੀਜ਼ਾਂ ਨੂੰ ਗੋਦ ਲੈਣ ਦੀ ਪਹਿਲ ਕੀਤੀ, ਤਾਂ ਜੋ ਉਨ੍ਹਾਂ ਨੂੰ ਪੋਸ਼ਣ ਅਤੇ ਵਧੀਆ ਇਲਾਜ ਮਿਲ ਸਕੇ।

ਮੇਘਾਲਿਆ ਦਾ ਯੂਨੀਵਰਸਲ ਨਿਕਸ਼ੇ ਮਿੱਤਰ ਮਾਡਲ

ਮੇਘਾਲਿਆ ਨੇ ਆਪਣੇ ਰਾਜ ਦੇ ਸਾਰੇ ਟੀਬੀ ਮਰੀਜ਼ਾਂ ਨੂੰ ਗੋਦ ਲੈ ਕੇ ‘ਯੂਨੀਵਰਸਲ ਨਿਕਸ਼ੇ ਮਿੱਤਰ’ ਬਣਨ ਦੀ ਪਹਲ ਕੀਤੀ। ਇਸ ਮਿਸਾਲੀ ਉਪਰਾਲੇ ਤਹਿਤ, ਪੂਰਬੀ ਖਾਸੀ ਪਹਾੜੀਆਂ ਦੀ 33 ਸਾਲਾ ਰਿਡਾਲਿਨ ਸ਼ੁਲਾਈ ਨੇ ਐਮ.ਡੀ.ਆਰ.-ਟੀਬੀ (ਮਲਟੀ-ਡਰੱਗ ਰੈਜ਼ਿਸਟੈਂਟ ਟੀਬੀ) ਨਾਲ ਲੰਬੀ ਲੜਾਈ ਲੜੀ। ਭਾਵੇਂ ਉਸਦਾ ਖੱਬਾ ਫੇਫੜਾ ਬੇਕਾਰ ਹੋ ਗਿਆ, ਪਰ ਹੁਣ ਉਹ ਸਿਰਫ਼ ਆਪਣੇ ਸੱਜੇ ਫੇਫੜੇ ਨਾਲ ਹੀ ਸਿਹਤਮੰਦ ਜੀਵਨ ਬਤੀਤ ਕਰ ਰਹੀ ਹੈ।

ਗੁਜਰਾਤ ਨੇ 95% ਟੀਚਾ ਪੂਰਾ ਕੀਤਾ

ਗੁਜਰਾਤ, ਜੋ ਕਿ ਨੀਤੀ ਆਯੋਗ ਵੱਲੋਂ ਟੀਬੀ ਖ਼ਤਮ ਕਰਨ ਦੀ ਰੈਟਿੰਗ ‘ਚ ਅੱਗੇ ਹੈ, ਨੇ 95% ਟੀਚਾ ਹਾਸਲ ਕਰ ਲਿਆ ਹੈ। ਇਸ ਦੇ ਨਾਲ, ਹੋਰ ਰਾਜ ਵੀ ਭਾਰਤ ਨੂੰ 2025 ਤੱਕ ਟੀਬੀ-ਮੁਕਤ ਬਣਾਉਣ ਦੀ ਦਿਸ਼ਾ ਵਿੱਚ ਉੱਦਮ ਕਰ ਰਹੇ ਹਨ।