ਆਮਿਰ ਨੇ ਆਪਣੀ ਜ਼ਿੰਦਗੀ ਦੇ ਸਭ ਤੋਂ ਮੁਸ਼ਕਲ ਦੌਰ ਬਾਰੇ ਕੀਤਾ ਖੁਲਾਸਾ

ਬਾਲੀਵੁੱਡ ਦੇ ਮਸ਼ਹੂਰ ਅਦਾਕਾਰ ਆਮਿਰ ਖਾਨ ਇਨ੍ਹਾਂ ਦਿਨੀਂ ਆਪਣੀ ਨਵੀਂ ਫਿਲਮ 'ਸਿਤਾਰੇ ਜ਼ਮੀਨ ਪਰ' ਦੀ ਕਾਮਯਾਬੀ ਕਰਕੇ ਚਰਚਾ ਵਿੱਚ ਹਨ। ਪਰ ਇੱਕ ਹਾਲੀਆ ਇੰਟਰਵਿਊ ਵਿੱਚ ਆਮਿਰ ਨੇ ਆਪਣੀ ਜ਼ਿੰਦਗੀ ਦੇ ਸਭ ਤੋਂ ਮੁਸ਼ਕਲ ਦੌਰ ਬਾਰੇ ਖੁਲਾਸਾ ਕੀਤਾ ਹੈ। ਆਮਿਰ ਨੇ ਦੱਸਿਆ ਕਿ ਪਹਿਲੀ ਪਤਨੀ ਰੀਨਾ ਦੱਤਾ ਤੋਂ ਤਲਾਕ ਤੋਂ ਬਾਅਦ ਉਹ ਡਿੱਪਰੈਸ਼ਨ ਵਿੱਚ ਚਲੇ ਗਏ ਸਨ ਅਤੇ ਲੰਬੇ ਸਮੇਂ ਤੱਕ ਸ਼ਰਾਬ ਦੀ ਆਦਤ ਵਿੱਚ ਡੁੱਬੇ ਰਹੇ।

ਤਲਾਕ ਤੋਂ ਬਾਅਦ ਡਿੱਪਰੈਸ਼ਨ ਵਿੱਚ ਚਲੇ ਗਏ ਆਮਿਰ

ਆਮਿਰ ਖਾਨ ਅਤੇ ਰੀਨਾ ਦੱਤਾ ਦਾ ਵਿਆਹ ਬਹੁਤ ਛੋਟੀ ਉਮਰ ਵਿੱਚ ਹੋ ਗਿਆ ਸੀ, ਪਰ 2001 ਵਿੱਚ ਦੋਵਾਂ ਵੱਖ ਹੋ ਗਏ। ਆਮਿਰ ਨੇ ਦੱਸਿਆ, "ਜਿਸ ਸ਼ਾਮ ਰੀਨਾ ਘਰ ਛੱਡ ਕੇ ਗਈ, ਮੈਂ ਬਹੁਤ ਖਾਲੀਪਨ ਮਹਿਸੂਸ ਕਰ ਰਿਹਾ ਸੀ। ਮੈਨੂੰ ਸਮਝ ਨਹੀਂ ਆਉਂਦੀ ਸੀ ਕਿ ਕੀ ਕਰਾਂ।" ਉਸਨੇ ਕਿਹਾ ਕਿ ਇਸ ਦਰਦ ਨੂੰ ਘਟਾਉਣ ਲਈ ਉਹ ਸ਼ਰਾਬ ਪੀਣ ਲੱਗ ਪਿਆ। "ਮੈਂ ਪਹਿਲੀ ਵਾਰੀ ਪੂਰੀ ਬੋਤਲ ਪੀ ਲਈ। ਫਿਰ ਇਹ ਆਦਤ ਬਣ ਗਈ ਅਤੇ ਡੇਢ ਸਾਲ ਤੱਕ ਹਰ ਰਾਤ ਸ਼ਰਾਬ ਪੀਂਦਾ ਰਿਹਾ। ਮੈਨੂੰ ਨੀਂਦ ਨਹੀਂ ਆਉਂਦੀ ਸੀ, ਕਈ ਵਾਰ ਤਾਂ ਮੈਂ ਬੇਹੋਸ਼ ਹੋ ਜਾਂਦਾ ਸੀ।"

ਦੋਸਤਾਂ ਨੇ ਦਿੱਤਾ ਸਾਥ

ਆਮਿਰ ਨੇ ਦੱਸਿਆ ਕਿ ਉਸ ਸਮੇਂ ਜੂਹੀ ਚਾਵਲਾ ਅਤੇ ਸਲਮਾਨ ਖਾਨ ਵਰਗੇ ਦੋਸਤਾਂ ਨੇ ਉਨ੍ਹਾਂ ਦਾ ਹੌਸਲਾ ਵਧਾਇਆ। "ਅਚਾਨਕ ਜੂਹੀ ਚਾਵਲਾ ਦਾ ਫ਼ੋਨ ਆਇਆ। ਉਹ ਮੇਰੇ ਘਰ ਆਈ ਅਤੇ ਕਿਹਾ ਕਿ ਤੁਸੀਂ ਰੀਨਾ ਨਾਲ ਸਮਝੌਤਾ ਕਰ ਲਵੋ।" ਸਲਮਾਨ ਖਾਨ ਵੀ ਰਾਤ ਦੇ ਖਾਣੇ ਲਈ ਆਉਂਦੇ ਅਤੇ ਘੰਟਿਆਂ ਗੱਲਾਂ ਕਰਦੇ। "ਉਹ ਸਮਾਂ ਮੇਰੇ ਲਈ ਬਹੁਤ ਮੁਸ਼ਕਲ ਸੀ, ਪਰ ਇਨ੍ਹਾਂ ਦੋਸਤਾਂ ਨੇ ਮੇਰਾ ਹੌਸਲਾ ਬਣਾਇਆ," ।

ਨਵੀਂ ਸ਼ੁਰੂਆਤ

ਆਮਿਰ ਨੇ ਦੱਸਿਆ ਕਿ ਹੌਲੀ-ਹੌਲੀ ਉਹ ਇਸ ਡਿੱਪਰੈਸ਼ਨ ਤੋਂ ਬਾਹਰ ਆਏ ਅਤੇ ਆਪਣੀ ਜ਼ਿੰਦਗੀ ਨੂੰ ਨਵੀਂ ਦਿਸ਼ਾ ਦਿੱਤੀ। ਅੱਜ ਉਹ ਆਪਣੀ ਫਿਲਮ 'ਸਿਤਾਰੇ ਜ਼ਮੀਨ ਪਰ' ਦੀ ਕਾਮਯਾਬੀ ਦਾ ਜਸ਼ਨ ਮਨਾ ਰਹੇ ਹਨ ਅਤੇ ਆਪਣੇ ਪੁਰਾਣੇ ਦੌਰ ਨੂੰ ਸਿਰਫ਼ ਇੱਕ ਸਿੱਖਿਆ ਵਜੋਂ ਯਾਦ ਕਰਦੇ ਹਨ।