Air India ਵਿੱਚ ਵੱਡਾ ਉਲਟਫੇਰ: CEO Campbell Wilson ਨੇ ਦਿੱਤਾ ਅਸਤੀਫ਼ਾ

ਨਵੀਂ ਦਿੱਲੀ: ਟਾਟਾ ਗਰੁੱਪ (Tata Group) ਦੀ ਮਲਕੀਅਤ ਵਾਲੀ ਦਿੱਗਜ ਏਅਰਲਾਈਨ ਏਅਰ ਇੰਡੀਆ (Air India) ਤੋਂ ਅੱਜ ਇੱਕ ਹੈਰਾਨੀਜਨਕ ਖ਼ਬਰ ਸਾਹਮਣੇ ਆਈ ਹੈ। ਕੰਪਨੀ ਨੇ ਅਧਿਕਾਰਤ ਤੌਰ 'ਤੇ ਆਪਣੇ ਚੀਫ਼ ਐਗਜ਼ੀਕਿਊਟਿਵ ਅਫਸਰ (CEO) ਅਤੇ ਮੈਨੇਜਿੰਗ ਡਾਇਰੈਕਟਰ (MD) ਕੈਂਪਬੈਲ ਵਿਲਸਨ ਦੇ ਅਸਤੀਫ਼ੇ ਦਾ ਐਲਾਨ ਕਰ ਦਿੱਤਾ ਹੈ। ਸ਼੍ਰੀ ਵਿਲਸਨ ਨੇ ਸਾਲ 2024 ਵਿੱਚ ਹੀ ਏਅਰ ਇੰਡੀਆ ਦੇ ਚੇਅਰਮੈਨ ਐਨ. ਚੰਦਰਸ਼ੇਖਰਨ ਨੂੰ 2026 ਵਿੱਚ ਅਹੁਦਾ ਛੱਡਣ ਦੇ ਆਪਣੇ ਇਰਾਦੇ ਬਾਰੇ ਜਾਣੂ ਕਰਵਾ ਦਿੱਤਾ ਸੀ ਅਤੇ ਉਹ ਉਦੋਂ ਤੋਂ ਹੀ ਸੰਗਠਨ ਵਿੱਚ ਇੱਕ ਸਥਿਰ ਲੀਡਰਸ਼ਿਪ (Leadership) ਤਬਦੀਲੀ ਯਕੀਨੀ ਬਣਾਉਣ ਲਈ ਕੰਮ ਕਰ ਰਹੇ ਸਨ। ਹਾਲਾਂਕਿ ਉਹ ਆਪਣੇ ਉੱਤਰਾਧਿਕਾਰੀ (Successor) ਦਾ ਐਲਾਨ ਹੋਣ ਤੱਕ ਇਸ ਅਹੁਦੇ 'ਤੇ ਬਣੇ ਰਹਿਣਗੇ।

ਆਪਣੇ ਅਸਤੀਫ਼ੇ ਬਾਰੇ ਬੋਲਦਿਆਂ ਸ਼੍ਰੀ ਵਿਲਸਨ ਨੇ ਕਿਹਾ ਕਿ ਨਿੱਜੀਕਰਨ (Privatization) ਤੋਂ ਬਾਅਦ ਪਿਛਲੇ ਚਾਰ ਸਾਲਾਂ ਵਿੱਚ ਏਅਰ ਇੰਡੀਆ ਨੇ ਚਾਰ ਏਅਰਲਾਈਨਾਂ ਦੇ ਸਫਲ ਰਲੇਵੇਂ (Merger) ਅਤੇ ਫਲੀਟ (Fleet) ਵਿੱਚ 100 ਵਾਧੂ ਜਹਾਜ਼ਾਂ ਦੇ ਸ਼ਾਮਲ ਹੋਣ ਵਰਗੇ ਕਈ ਮੀਲ ਪੱਥਰ ਤੈਅ ਕੀਤੇ ਹਨ। ਉਨ੍ਹਾਂ ਦੱਸਿਆ ਕਿ ਪੁਰਾਣੇ ਨੈਰੋਬਾਡੀ ਜਹਾਜ਼ਾਂ ਦੀ ਇੰਟੀਰੀਅਰ ਮੁਰੰਮਤ (Retrofitting) ਲਗਭਗ ਪੂਰੀ ਹੋ ਚੁੱਕੀ ਹੈ ਅਤੇ ਨਵੇਂ ਕਸਟਮ-ਡਿਜ਼ਾਈਨ ਕੀਤੇ ਵਾਈਡਬਾਡੀ ਜਹਾਜ਼ਾਂ ਦੀ ਡਿਲੀਵਰੀ ਹੁਣ ਸ਼ੁਰੂ ਹੋ ਗਈ ਹੈ। ਇਸ ਦੇ ਨਾਲ ਹੀ ਦੱਖਣੀ ਏਸ਼ੀਆ ਦੀ ਸਭ ਤੋਂ ਵੱਡੀ ਟ੍ਰੇਨਿੰਗ ਅਕੈਡਮੀ (Training Academy) ਅਤੇ ਫਲਾਇੰਗ ਸਕੂਲ ਵਰਗੇ ਬੁਨਿਆਦੀ ਢਾਂਚੇ (Infrastructure) ਦੀ ਸਥਾਪਨਾ ਵੀ ਕੀਤੀ ਗਈ ਹੈ। ਉਨ੍ਹਾਂ ਮੁਤਾਬਕ, ਕਿਉਂਕਿ ਹੁਣ ਏਅਰਲਾਈਨ ਦੇ ਉਭਾਰ ਦਾ ਅਗਲਾ ਪੜਾਅ ਸ਼ੁਰੂ ਹੋਣ ਵਾਲਾ ਹੈ, ਇਸ ਲਈ ਵਾਗਡੋਰ ਸੌਂਪਣ ਦਾ ਇਹ ਸਹੀ ਸਮਾਂ ਹੈ।

ਏਅਰ ਇੰਡੀਆ ਦੇ ਚੇਅਰਮੈਨ ਐਨ. ਚੰਦਰਸ਼ੇਖਰਨ ਨੇ ਕੈਂਪਬੈਲ ਵਿਲਸਨ ਦੀ ਲੀਡਰਸ਼ਿਪ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਕੋਵਿਡ (COVID) ਤੋਂ ਬਾਅਦ ਸਪਲਾਈ ਚੇਨ (Supply Chain) ਦੀਆਂ ਰੁਕਾਵਟਾਂ ਅਤੇ ਭੂ-ਰਾਜਨੀਤਿਕ (Geopolitical) ਚੁਣੌਤੀਆਂ ਦੇ ਬਾਵਜੂਦ ਕੈਂਪਬੈਲ ਨੇ ਨਵੀਂ ਏਅਰ ਇੰਡੀਆ ਦੇ ਨਿਰਮਾਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ। ਕੰਪਨੀ ਦੇ ਬੋਰਡ ਨੇ ਹੁਣ ਇੱਕ ਵਿਸ਼ੇਸ਼ ਕਮੇਟੀ ਦਾ ਗਠਨ ਕੀਤਾ ਹੈ ਜੋ ਆਉਣ ਵਾਲੇ ਕੁਝ ਮਹੀਨਿਆਂ ਵਿੱਚ ਨਵੇਂ ਮੁੱਖ ਕਾਰਜਕਾਰੀ ਅਧਿਕਾਰੀ ਦੀ ਭਾਲ ਕਰੇਗੀ, ਜਿਸ 'ਤੇ ਹੁਣ ਸਭ ਦੀਆਂ ਨਜ਼ਰਾਂ ਟਿਕੀਆਂ ਹੋਈਆਂ ਹਨ।