ਫਲੋਰਿਡਾ ਦੀ ਇੱਕ ਔਰਤ ਵੱਲੋਂ ਇੱਕੋ ਦਿਨ ਵਿੱਚ ਆਪਣੇ ਸਾਬਕਾ ਦੋ ਪਤੀਆਂ ਦੀ ਹੱਤਿਆ
ਵੈਲਜ ਨੇ ਕਿਹਾ ਹੈ ਕਿ ਜਾਂਚਕਾਰਾਂ ਦਾ ਵਿਸ਼ਵਾਸ਼ ਹੈ ਕਿ ਅਵਾਲੋਨ ਨੇ ਪਹਿਲਾਂ ਹਿਲਜਬਰੌਘ ਵਿੱਚ ਦੂਸਰੇ ਸਾਬਕਾ ਪਤੀ ਦੀ ਹੱਤਿਆ ਕੀਤੀ ਤੇ ਬਾਅਦ ਵਿੱਚ ਉਸ ਨੇ ਮੈਨਾਟੀ ਕਾਊਂਟੀ ਵਿੱਚ ਉਸੇ ਦਿਨ
By : Gill
ਗ੍ਰਿਫਤਾਰ
ਸੈਕਰਾਮੈਂਟੋ,ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ)- ਫਲੋਰਿਡਾ ਦੀ ਸੂਸਾਨ ਏਰਿਕਾ ਅਵਾਲੋਨ ਨਾਮੀ ਔਰਤ ਦੁਆਰਾ ਇੱਕੋ ਦਿਨ ਵਿੱਚ ਆਪਣੇ ਦੋ ਸਾਬਕਾ ਪਤੀਆਂ ਦੀ ਹੱਤਿਆ ਕਰ ਦੇਣ ਦੀ ਖਬਰ ਹੈ। ਮੈਨਾਟੀ ਕਾਊਂਟੀ ਸ਼ੈਰਿਫ ਦਫਤਰ ਅਨੁਸਾਰ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਤੇ ਫਿਲਹਾਲ ਉਸ ਵਿਰੁੱਧ ਇੱਕ ਮਾਮਲੇ ਵਿੱਚ ਦੂਸਰਾ ਦਰਜਾ ਹੱਤਿਆ ਦੇ ਦੋਸ਼ ਲਾਏ ਗਏ ਹਨ ਜਿਨਾਂ ਦੋਸ਼ਾਂ ਵਿੱਚ ਛੇਤੀ ਵਾਧਾ ਕੀਤੇ ਜਾਣ ਦਾ ਸੰਭਾਵਨਾ ਹੈ। ਮੈਨਾਟੀ ਕਾਊਂਟੀ ਸ਼ੈਰਿਫ ਰਿਕ ਵੈਲਜ ਨੇ ਕਿਹਾ ਹੈ ਕਿ ਇੱਕ ਘਰ ਵਿੱਚ ਗੋਲੀਬਾਰੀ ਉਪਰੰਤ ਮੌਕੇ 'ਤੇ ਪੁੱਜੀ ਪੁਲਿਸ ਨੂੰ ਇੱਕ 54 ਸਾਲਾ ਵਿਅਕਤੀ ਜਖਮੀ ਹਾਲਤ ਵਿੱਚ ਮਿਲਿਆ।
ਜਿਸ ਨੂੰ ਹਸਪਤਾਲ ਪਹੁੰਚਾਇਆ ਗਿਆ ਜਿਥੇ ਉਸ ਦੀ ਮੌਤ ਹੋ ਗਈ ਪਰੰਤੂ ਮਰਨ ਤੋਂ ਪਹਿਲਾਂ ਉਸ ਨੇ ਪੁਲਿਸ ਨੂੰ ਦਸਿਆ ਕਿ ਸ਼ੂਟਰ ਸੰਭਾਵੀ ਤੌਰ 'ਤੇ ਉਸ ਦੀ ਸਾਬਕਾ ਪਤਨੀ ਹੈ। ਜਦੋਂ ਪੁਲਿਸ ਅਫਸਰਾਂ ਨੇ ਅਵਾਲੋਨ ਨੂੰ ਉਸ ਦੇ ਸਾਬਕਾ ਪਤੀ ਬਾਰੇ ਪੁੱਛਿਆ ਤਾਂ ਉਸ ਨੇ ਕਿਹਾ ਕਿ ਕਿਹੜੇ ਸਾਬਕਾ ਪਤੀ ਦੀ ਗੱਲ ਕਰ ਰਹੇ ਹੋ। ਇਸ 'ਤੇ ਪੁੁਲਿਸ ਨੂੰ ਪਤਾ ਲੱਗਾ ਕਿ ਉਸ ਦਾ ਇੱਕ ਹੋਰ ਸਾਬਕਾ ਪਤੀ ਹੈ ਜੋ ਟਾਂਪਾ ਖੇਤਰ ਵਿੱਚ ਰਹਿੰਦਾ ਹੈ। ਸ਼ੈਰਿਫ ਦਫਤਰ ਨੇ ਟਾਂਪਾ ਪੁਲਿਸ ਵਿਭਾਗ ਨਾਲ ਸੰਪਰਕ ਕੀਤਾ ਜਿਨਾਂ ਨੇ ਤੁਰੰਤ ਹਿਲਜਬਰੌਘ ਕਾਊਂਟੀ ਵਿੱਚ ਇੱਕ ਘਰ ਵਿੱਚ ਪੁਲਿਸ ਅਫਸਰ ਭੇਜੇ ਜਿਥੋਂ ਇਕ ਵਿਅਕਤੀ ਮ੍ਰਿਤਕ ਹਾਲਤ ਵਿੱਚ ਮਿਲਿਆ ਜਿਸ ਦੇ ਗੋਲੀਆਂ ਵੱਜੀਆਂ ਹੋਈਆਂ ਸਨ। ਵੈਲਜ ਨੇ ਕਿਹਾ ਹੈ ਕਿ ਜਾਂਚਕਾਰਾਂ ਦਾ ਵਿਸ਼ਵਾਸ਼ ਹੈ ਕਿ ਅਵਾਲੋਨ ਨੇ ਪਹਿਲਾਂ ਹਿਲਜਬਰੌਘ ਵਿੱਚ ਦੂਸਰੇ ਸਾਬਕਾ ਪਤੀ ਦੀ ਹੱਤਿਆ ਕੀਤੀ ਤੇ ਬਾਅਦ ਵਿੱਚ ਉਸ ਨੇ ਮੈਨਾਟੀ ਕਾਊਂਟੀ ਵਿੱਚ ਉਸੇ ਦਿਨ ਆਪਣੇ ਪਹਿਲੇ ਪਤੀ ਦੀ ਹੱਤਿਆ ਕੀਤੀ। ਵੈਲਜ ਨੇ ਕਿਹਾ ਕਿ ਅਵਾਲੋਨ ਵਿਰੁੱਧ ਪਹਿਲਾ ਦਰਜਾ ਹੱਤਿਆਵਾਂ ਦੇ ਦੋਸ਼ ਲਾਏ ਜਾਣ ਦੀ ਸੰਭਾਵਨਾ ਹੈ ਜਿਨਾਂ ਦੋਸ਼ਾਂ ਤਹਿਤ ਉਸ ਨੂੰ ਮੌਤ ਦੀ ਸਜ਼ਾ ਹੋ ਸਕਦੀ ਹੈ।
