ਲੇਡੀ ਕਾਂਸਟੇਬਲ ਅਮਨਦੀਪ ਕੌਰ ਮਾਮਲੇ ਵਿਚ ਵੱਡਾ ਖੁਲਾਸਾ

ਸਾਥੀ ਬਲਵਿੰਦਰ ਸਿੰਘ ਦੀ ਨਸ਼ਾ ਤਸਕਰੀ ਅਤੇ ਅਪਰਾਧਿਕ ਪਿਛੋਕੜ: ਮਾਪਿਆਂ ਨੇ ਘਰੋਂ ਕੱਢਿਆ, ਫਿਰ ਵੀ ਨਹੀਂ ਮੰਨਿਆ

ਸਿਰਸਾ : ਪੰਜਾਬ ਪੁਲਿਸ ਦੀ ਲੇਡੀ ਕਾਂਸਟੇਬਲ ਅਮਨਦੀਪ ਕੌਰ, ਜਿਸ ਨੂੰ ਹਾਲ ਹੀ ਵਿੱਚ ਹੈਰੋਇਨ ਸਮੇਤ ਗਿਰਫ਼ਤਾਰ ਕੀਤਾ ਗਿਆ ਸੀ, ਉਸਦੇ ਸਾਥੀ ਬਲਵਿੰਦਰ ਸਿੰਘ ਉਰਫ਼ ਸੋਨੂੰ ਦੀ ਜ਼ਿੰਦਗੀ ਬਾਰੇ ਹੈਰਾਨ ਕਰ ਦੇਣ ਵਾਲੇ ਖੁਲਾਸੇ ਹੋ ਰਹੇ ਹਨ। ਬਲਵਿੰਦਰ, ਜੋ ਪਹਿਲਾਂ ਖੇਤੀਬਾੜੀ ਅਤੇ ਪਸ਼ੂ ਪਾਲਣ ਕਰਦਾ ਸੀ, ਹੁਣ ਨਸ਼ਾ ਤਸਕਰੀ ਅਤੇ ਅਪਰਾਧਿਕ ਗਤੀਵਿਧੀਆਂ ਦਾ ਹਿੱਸਾ ਬਣ ਚੁੱਕਾ ਹੈ।

ਬਲਵਿੰਦਰ ਸ਼ੁਰੂ ਵਿੱਚ ਪਰਿਵਾਰ ਨਾਲ ਮਿਲ ਕੇ ਖੇਤਾਂ ਵਿਚ ਕੰਮ ਕਰਦਾ ਸੀ। ਪਰ ਜਦੋਂ ਉਸਨੇ ਨਸ਼ਿਆਂ ਦੀ ਦੁਨੀਆ ਵਿੱਚ ਕਦਮ ਰੱਖਿਆ ਅਤੇ ਅਮਨਦੀਪ ਕੌਰ ਨਾਲ ਸੰਪਰਕ 'ਚ ਆਇਆ, ਉਸਦੇ ਰਵੱਈਏ 'ਚ ਵੱਡਾ ਬਦਲਾਅ ਆ ਗਿਆ। ਉਨ੍ਹਾਂ ਦੀਆਂ ਹਰਕਤਾਂ ਦੇ ਚਲਦਿਆਂ, ਮਾਪਿਆਂ ਨੇ ਪਹਿਲਾਂ ਸਮਰਥਨ ਕੀਤਾ ਪਰ ਬਾਅਦ 'ਚ ਉਸਨੂੰ ਘਰੋਂ ਕੱਢ ਦਿੱਤਾ। ਪਰਿਵਾਰ ਨੇ ਉਸਦੇ ਘਰ ਆਉਣ 'ਤੇ ਵੀ ਪਾਬੰਦੀ ਲਾ ਦਿੱਤੀ, ਪਰ ਉਹ ਮੰਨਣ ਵਾਲਾ ਨਹੀਂ ਸੀ।

ਪੁਲਿਸ ਦੀ ਨਜ਼ਰ 'ਚ ਆਇਆ ਪਰਿਵਾਰ ਅਤੇ ਨਾਨਕਪੁਰ-ਅਭੋਲੀ ਪਿੰਡ

ਪੰਜਾਬ ਪੁਲਿਸ ਨੇ ਬਲਵਿੰਦਰ ਦੀ ਗਤੀਵਿਧੀਆਂ ਨੂੰ ਲੈ ਕੇ ਸਿਰਸਾ ਜ਼ਿਲ੍ਹੇ ਦੇ ਪਿੰਡ ਨਾਨਕਪੁਰ ਅਤੇ ਅਭੋਲੀ 'ਚ ਲਗਾਤਾਰ ਛਾਪੇਮਾਰੀ ਕੀਤੀ। ਡੀਐਸਪੀ, ਐਸਐਚਓ ਅਤੇ ਸੀਆਈਏ ਦੀ ਟੀਮ ਨੇ ਇਨ੍ਹਾਂ ਪਿੰਡਾਂ ਵਿੱਚ ਦਬਿਸਾਂ ਦਿੰਦਿਆਂ ਸਬੂਤ ਇਕੱਠੇ ਕੀਤੇ। ਬਲਵਿੰਦਰ ਦੇ ਨਾਨਕੇ ਅਤੇ ਮਾਸੀ ਦੇ ਘਰ ਵੀ ਰਡਾਰ 'ਚ ਹਨ। ਇਨ੍ਹਾਂ ਛਾਪਿਆਂ ਦੌਰਾਨ ਪਿੰਡ ਦੀ ਗ੍ਰਾਮ ਪੰਚਾਇਤ ਵੱਲੋਂ ਪੁਲਿਸ ਨੂੰ ਪੂਰਾ ਸਹਿਯੋਗ ਦਿੱਤਾ ਗਿਆ।

ਘਟਨਾ ਵਾਲੇ ਦਿਨ ਦੀ ਜਾਣਕਾਰੀ

ਸੂਤਰਾਂ ਦੇ ਅਨੁਸਾਰ, ਘਟਨਾ ਵਾਲੇ ਦਿਨ ਬਲਵਿੰਦਰ ਬੁਲੇਟ 'ਤੇ ਬਠਿੰਡਾ ਤੋਂ ਸਿਰਸਾ ਆਇਆ। ਪਹਿਲਾਂ ਉਹ ਅਭੋਲੀ ਗਿਆ ਅਤੇ ਬਾਅਦ 'ਚ ਨਾਨਕਪੁਰ। ਉੱਥੇ ਗਲੀ 'ਚ ਬੁਲੇਟ ਖੜ੍ਹੀ ਕਰਕੇ ਭੱਜ ਗਿਆ। ਇਹ ਬਾਈਕ ਬਾਅਦ 'ਚ ਸਿਰਸਾ ਪੁਲਿਸ ਵੱਲੋਂ ਕਬਜ਼ੇ 'ਚ ਲੈ ਕੇ ਥਾਣੇ ਲਿਆਂਦੀ ਗਈ।

2019 ਦੀ ਗੋਲੀਬਾਰੀ ਅਤੇ ਪਰਿਵਾਰਕ ਵਿਵਾਦ

ਬਲਵਿੰਦਰ ਦਾ ਨਾਮ 2019 ਵਿੱਚ ਹੋਏ ਪਲਾਟ ਵਿਵਾਦ 'ਚ ਵੀ ਆ ਚੁੱਕਾ ਹੈ। ਨਾਨਕਪੁਰ ਨਿਵਾਸੀ ਔਰਤ ਪ੍ਰਵੀਨ ਦੇ ਅਨੁਸਾਰ, ਉਸਨੇ ਅਤੇ ਉਸਦੀ ਨੂੰਹ ਰੇਣੂ ਰਾਣੀ ਨੇ ਬਲਵਿੰਦਰ ਨੂੰ ਪਲਾਟ 'ਤੇ ਛੱਤ ਲਾਉਣ ਤੋਂ ਰੋਕਿਆ, ਜਿਸ ਕਾਰਨ ਗੁੱਸੇ 'ਚ ਆ ਕੇ ਉਸਨੇ ਔਰਤਾਂ 'ਤੇ ਹਮਲਾ ਕੀਤਾ ਅਤੇ ਬਾਅਦ 'ਚ ਹੋਰ ਮੁੰਡਿਆਂ ਨਾਲ ਮਿਲ ਕੇ ਗੋਲੀਆਂ ਚਲਾਈਆਂ। ਉਸ ਵੇਲੇ ਵੀ, ਪਰਿਵਾਰ ਦੇ ਕੁਝ ਮੈਂਬਰ ਉਸਦਾ ਸਾਥ ਦਿੰਦੇ ਦੇਖੇ ਗਏ।

ਪੁਲਿਸ ਦੀ ਜਾਂਚ ਜਾਰੀ

ਹੁਣ ਪੰਜਾਬ ਅਤੇ ਸਿਰਸਾ ਪੁਲਿਸ ਦੀ ਸਾਂਝੀ ਟੀਮ ਇਸ ਗਿਰੋਹ ਦੀ ਜੜ੍ਹ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪੁਲਿਸ ਨੇ ਸਿਰਸਾ ਪੁਲਿਸ ਤੋਂ ਬਲਵਿੰਦਰ ਦੇ ਪੁਰਾਣੇ ਅਪਰਾਧਿਕ ਰਿਕਾਰਡ ਦੀ ਵੀ ਮੰਗ ਕੀਤੀ ਹੈ।