19 ਸਾਲਾ ਗੱਭਰੂ ਨੂੰ ਗਊ ਰੱਖਿਅਕਾਂ ਨੇ ਮਾਰੀ ਗੋਲੀ, ਮੌਤ, ਤਸਕਰੀ ਦਾ ਸੀ ਸ਼ੱਕ
By : BikramjeetSingh Gill
ਫਰੀਦਾਬਾਦ : ਦੇਸ਼ ਦੀ ਰਾਜਧਾਨੀ ਦਿੱਲੀ ਦੇ ਨਾਲ ਲੱਗਦੇ ਹਰਿਆਣਾ ਦੇ ਫਰੀਦਾਬਾਦ ਤੋਂ ਇੱਕ ਬਹੁਤ ਹੀ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ 12ਵੀਂ ਜਮਾਤ ਵਿੱਚ ਪੜ੍ਹਦੇ 19 ਸਾਲਾ ਵਿਦਿਆਰਥੀ ਦੀ ਕਥਿਤ ਗਊ ਰੱਖਿਅਕਾਂ ਨੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਦੋਸਤਾਂ ਨਾਲ ਮੈਗੀ ਖਾਣ ਲਈ ਆਪਣੀ ਕਾਰ 'ਚ ਨਿਕਲੇ ਆਰੀਅਨ ਮਿਸ਼ਰਾ ਦਾ 30 ਕਿਲੋਮੀਟਰ ਤੱਕ ਪਿੱਛਾ ਕੀਤਾ ਗਿਆ ਅਤੇ ਫਿਰ ਕਤਲ ਕਰ ਦਿੱਤਾ ਗਿਆ। ਪੁਲਸ ਨੇ ਕਤਲ ਦੇ ਦੋਸ਼ 'ਚ 5 ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਮੁਲਜ਼ਮਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਇਸੇ ਤਰ੍ਹਾਂ ਦੀ ਕਾਰ ਵਿੱਚ ਤਸਕਰਾਂ ਦੇ ਆਉਣ ਦੀ ਸੂਚਨਾ ਮਿਲੀ ਸੀ।
ਆਰੀਅਨ ਮਿਸ਼ਰਾ ਕਤਲ ਕੇਸ ਵਿੱਚ ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਸੌਰਭ, ਅਨਿਲ ਕੌਸ਼ਿਕ, ਵਰੁਣ, ਕ੍ਰਿਸ਼ਨਾ ਅਤੇ ਆਦੇਸ਼ ਵਜੋਂ ਹੋਈ ਹੈ। ਪੁਲੀਸ ਨੇ ਸਾਰਿਆਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਜੇਲ੍ਹ ਭੇਜ ਦਿੱਤਾ ਹੈ। ਫਰੀਦਾਬਾਦ ਪੁਲੀਸ ਦੀ ਅਪਰਾਧ ਸ਼ਾਖਾ ਸੈਕਟਰ-30 ਦੀ ਟੀਮ ਇਸ ਕਤਲ ਦੀ ਜਾਂਚ ਕਰ ਰਹੀ ਹੈ।
ਘਟਨਾ ਵਾਲੇ ਦਿਨ 23 ਅਗਸਤ ਦੀ ਰਾਤ ਨੂੰ ਆਰੀਅਨ ਮਿਸ਼ਰਾ ਆਪਣੇ ਮਕਾਨ ਮਾਲਕ ਅਤੇ ਜਾਣ-ਪਛਾਣ ਵਾਲਿਆਂ ਨਾਲ ਡਸਟਰ ਕਾਰ 'ਚ ਮੈਗੀ ਖਾਣ ਲਈ ਬਡਖਲ ਦੇ ਇਕ ਮਾਲ 'ਚ ਗਿਆ ਸੀ। ਦੇਰ ਰਾਤ ਉਥੋਂ ਵਾਪਸ ਆਉਂਦੇ ਸਮੇਂ ਮੁਲਜ਼ਮਾਂ ਨੇ ਪਟੇਲ ਚੌਕ 'ਤੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ। ਇਸ 'ਤੇ ਕਾਰ ਚਲਾ ਰਹੇ ਆਰੀਅਨ ਦੇ ਇੱਕ ਜਾਣਕਾਰ ਨੇ ਡਰ ਦੇ ਮਾਰੇ ਕਾਰ ਦੀ ਸਪੀਡ ਵਧਾ ਦਿੱਤੀ। ਇਸ ਤੋਂ ਬਾਅਦ ਮੁਲਜ਼ਮਾਂ ਨੇ ਮ੍ਰਿਤਕ ਅਤੇ ਉਸ ਦੇ ਜਾਣਕਾਰਾਂ ਦਾ ਕਰੀਬ 30 ਕਿਲੋਮੀਟਰ ਤੱਕ ਪਿੱਛਾ ਕੀਤਾ। ਫਿਰ, ਦਿੱਲੀ-ਆਗਰਾ ਹਾਈਵੇਅ ਦੇ ਗਦਪੁਰੀ ਟੋਲ ਦੇ ਬਿਲਕੁਲ ਅੱਗੇ, ਗਊ ਰੱਖਿਅਕ ਹੋਣ ਦਾ ਦਾਅਵਾ ਕਰਨ ਵਾਲੇ ਮੁਲਜ਼ਮ ਨੇ ਆਰੀਅਨ ਨੂੰ ਇਹ ਸੋਚ ਕੇ ਗੋਲੀ ਮਾਰ ਦਿੱਤੀ ਕਿ ਉਹ ਪਸ਼ੂ ਤਸਕਰ ਹੈ। ਗੋਲੀ ਲੱਗਣ ਨਾਲ ਜ਼ਖਮੀ ਹੋਏ ਆਰੀਅਨ ਦੀ ਇਲਾਜ ਦੌਰਾਨ ਮੌਤ ਹੋ ਗਈ।
ਗ੍ਰਿਫਤਾਰੀ ਤੋਂ ਬਾਅਦ ਅਨਿਲ ਕੌਸ਼ਿਕ ਆਦਿ ਨੇ ਪੁਲਸ ਪੁੱਛਗਿੱਛ ਦੌਰਾਨ ਦੱਸਿਆ ਸੀ ਕਿ ਉਨ੍ਹਾਂ ਨੇ ਆਰੀਅਨ ਮਿਸ਼ਰਾ ਨੂੰ ਨਾਜਾਇਜ਼ ਹਥਿਆਰ ਨਾਲ ਗੋਲੀ ਮਾਰੀ ਸੀ। ਪੁਲਿਸ ਨੇ ਅਨਿਲ ਕੌਸ਼ਿਕ ਦੇ ਘਰੋਂ ਨਜਾਇਜ਼ ਹਥਿਆਰ ਬਰਾਮਦ ਕੀਤੇ ਹਨ। ਵਾਰਦਾਤ 'ਚ ਵਰਤੀ ਗਈ ਕਾਰ ਵੀ ਬਰਾਮਦ ਕੀਤੀ ਗਈ ਹੈ।
ਪੁਲੀਸ ਸੂਤਰਾਂ ਅਨੁਸਾਰ ਮੁਲਜ਼ਮਾਂ ਨੇ ਪੁੱਛਗਿੱਛ ਦੌਰਾਨ ਦੱਸਿਆ ਕਿ 23 ਅਗਸਤ ਦੀ ਰਾਤ ਨੂੰ ਉਨ੍ਹਾਂ ਨੂੰ ਕਿਸੇ ਮੁਖਬਰ ਤੋਂ ਸੂਚਨਾ ਮਿਲੀ ਸੀ ਕਿ ਡਸਟਰ ਅਤੇ ਫਾਰਚੂਨਰ ਕਾਰਾਂ ਵਿੱਚ ਸਵਾਰ ਕੁਝ ਪਸ਼ੂ ਤਸਕਰ ਸ਼ਹਿਰ ਵਿੱਚ ਰੇਕੀ ਕਰ ਰਹੇ ਹਨ। ਇਸ ਸੂਚਨਾ ਤੋਂ ਬਾਅਦ ਅਨਿਲ ਕੌਸ਼ਿਕ ਅਤੇ ਉਸਦੇ ਸਾਥੀ ਸ਼ਹਿਰ ਵਿੱਚ ਕਾਰਾਂ ਵਿੱਚ ਘੁੰਮ ਰਹੇ ਪਸ਼ੂ ਤਸਕਰਾਂ ਦੀ ਭਾਲ ਕਰ ਰਹੇ ਸਨ। ਇਸ ਦੌਰਾਨ ਉਨ੍ਹਾਂ ਨੇ ਪਟੇਲ ਚੌਕ 'ਤੇ ਇਕ ਡਸਟਰ ਕਾਰ ਦੇਖੀ। ਮੁਲਜ਼ਮਾਂ ਨੇ ਕਾਰ ਚਾਲਕ ਨੂੰ ਰੁਕਣ ਲਈ ਕਿਹਾ ਪਰ ਕਾਰ ਚਲਾ ਰਹੇ ਵਿਅਕਤੀ ਨੇ ਡਰ ਦੇ ਮਾਰੇ ਕਾਰ ਦੀ ਰਫ਼ਤਾਰ ਵਧਾ ਦਿੱਤੀ। ਇਸ ਕਾਰਨ ਗਲਤਫਹਿਮੀ ਕਾਰਨ ਉਸ ਨੇ ਕਾਰ ਦਾ ਪਿੱਛਾ ਕਰਦੇ ਹੋਏ ਗੋਲੀ ਚਲਾ ਦਿੱਤੀ, ਜਿਸ ਨਾਲ ਆਰੀਅਨ ਮਿਸ਼ਰਾ ਦੀ ਮੌਤ ਹੋ ਗਈ।
