ਇਜ਼ਰਾਈਲ ਦੇ ਹਮਲੇ ਵਿਚ ਹਮਾਸ ਦਾ ਇੱਕ ਹੋਰ ਕਮਾਂਡਰ ਢੇਰ

ਯੇਰੂਸ਼ਲਮ, 21 ਅਕਤੂਬਰ, ਨਿਰਮਲ : ਇਜ਼ਰਾਈਲ ਨੇ ਗਾਜ਼ਾ ਪੱਟੀ ਵਿੱਚ ਹਮਾਸ ਦੇ 100 ਤੋਂ ਵੱਧ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਇਸ ਵਿੱਚ ਇਸ ਦੀਆਂ ਸੁਰੰਗਾਂ ਅਤੇ ਹਥਿਆਰਾਂ ਦੇ ਡਿਪੂ ਸ਼ਾਮਲ ਹਨ। ਹਮਾਸ ਦਾ ਇਕ ਹੋਰ ਚੋਟੀ ਦਾ ਕਮਾਂਡਰ ਮਾਬੇਦੁਹ ਸ਼ਾਲਾਬੀ ਵੀ ਇਜ਼ਰਾਇਲੀ ਹਵਾਈ ਹਮਲੇ ਵਿਚ ਮਾਰਿਆ ਗਿਆ ਹੈ। ਇਜ਼ਰਾਈਲ ਨੇ ਸਪੱਸ਼ਟ ਕੀਤਾ ਹੈ ਕਿ ਗਾਜ਼ਾ ਪੱਟੀ ਵਿਚ ਹਮਾਸ ਦੀ ਅਗਵਾਈ ਅਤੇ ਉਸ ਦੀ ਫੌਜੀ ਸਮਰੱਥਾ ਨੂੰ ਪੂਰੀ ਤਰ੍ਹਾਂ ਖਤਮ ਕਰਨ ਤੋਂ ਬਾਅਦ ਉਸ ਦੀ ਮੁਹਿੰਮ ਨੂੰ ਪੂਰਾ ਕੀਤਾ ਜਾਵੇਗਾ। ਰੱਖਿਆ ਮੰਤਰੀ ਯੋਵ ਗੈਲੈਂਟ ਨੇ ਕਿਹਾ ਕਿ ਉਨ੍ਹਾਂ ਦੀ ਗਾਜ਼ਾ ਪੱਟੀ ’ਤੇ ਕਬਜ਼ਾ ਕਰਨ ਦੀ ਕੋਈ ਯੋਜਨਾ ਨਹੀਂ ਹੈ।

ਇਜ਼ਰਾਈਲੀ ਫੌਜ ਨੇ ਕਬਜ਼ੇ ਵਾਲੇ ਪੱਛਮੀ ਕੰਢੇ ’ਚ ਇਕ ਆਪਰੇਸ਼ਨ ’ਚ 5 ਬੱਚਿਆਂ ਸਮੇਤ 13 ਫਲਸਤੀਨੀਆਂ ਨੂੰ ਵੀ ਮਾਰ ਦਿੱਤਾ। ਸ਼ਾਲਾਬੀ ਸਮੁੰਦਰ ਰਾਹੀਂ ਇਜ਼ਰਾਈਲ ਦੇ ਖਿਲਾਫ ਅੱਤਵਾਦੀ ਹਮਲਿਆਂ ਵਿੱਚ ਸ਼ਾਮਲ ਸੀ। ਉਸ ਨੂੰ ਹਮਾਸ ਦੇ ਆਪਰੇਸ਼ਨਲ ਕਮਾਂਡ ਸੈਂਟਰ ’ਤੇ ਨਿਸ਼ਾਨਾ ਬਣਾਇਆ ਗਿਆ ਸੀ। ਇਸ ਦੇ ਨਾਲ ਹੀ ਗਾਜ਼ਾ ਪੱਟੀ ’ਚ ਜ਼ਮੀਨੀ ਹਮਲੇ ਤੋਂ ਪਹਿਲਾਂ ਇਜ਼ਰਾਇਲੀ ਫੌਜ ਨੇ ਲੈਬਨਾਨ ਨਾਲ ਲੱਗਦੀ ਸਰਹੱਦ ’ਤੇ ਸਥਿਤ ਆਪਣੇ ਸਭ ਤੋਂ ਵੱਡੇ ਸ਼ਹਿਰ ਕਿਰਿਆਤ ਸ਼ਮੋਨਾ ਨੂੰ ਖਾਲੀ ਕਰਨ ਦਾ ਹੁਕਮ ਦਿੱਤਾ ਹੈ। ਇਜ਼ਰਾਈਲ ਨੂੰ ਹਿਜ਼ਬੁੱਲਾ ਦੇ ਹਮਲੇ ਦਾ ਡਰ ਹੈ। ਇਜ਼ਰਾਈਲ ਦੇ ਰੱਖਿਆ ਮੰਤਰੀ ਯੋਵ ਗੈਲੈਂਟ ਨੇ ਕਿਹਾ ਕਿ ਗਾਜ਼ਾ ’ਤੇ ਹਮਲੇ ਲਈ ਤਿੰਨ ਪੜਾਅ ਤਿਆਰ ਕੀਤੇ ਗਏ ਹਨ। ਪਹਿਲਾ ਪੜਾਅ ਮੌਜੂਦਾ ਫੌਜੀ ਕਾਰਵਾਈ ਹੈ ਜਿਸਦਾ ਉਦੇਸ਼ ਹਮਾਸ ਦੇ ਬੁਨਿਆਦੀ ਢਾਂਚੇ ਨੂੰ ਤਬਾਹ ਕਰਨਾ ਹੈ। ਦੂਸਰਾ ਪੜਾਅ ਘੱਟ ਹਮਲਾਵਰ ਹੋਵੇਗਾ, ਜਿਸ ਵਿੱਚ ਇਧਰੋਂ-ਉਧਰੋਂ ਪੈਦਾ ਹੋਏ ਵਿਰੋਧ ਨੂੰ ਖਤਮ ਕਰ ਦਿੱਤਾ ਜਾਵੇਗਾ।

ਇਜ਼ਰਾਈਲੀ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਫਲਸਤੀਨੀ ਰੈਡ ਕ੍ਰੀਸੈਂਟ ਸੋਸਾਇਟੀ ਨੇ ਸ਼ੁੱਕਰਵਾਰ ਨੂੰ ਉਤਰੀ ਗਾਜ਼ਾ ਵਿੱਚ ਅਲ ਕੁਦਸ ਹਸਪਤਾਲ ਨੂੰ ਤੁਰੰਤ ਖਾਲੀ ਕਰਨ ਦੀ ਅਪੀਲ ਕੀਤੀ। ਉਸ ਦਾ ਕਹਿਣਾ ਹੈ ਕਿ ਅਲ-ਅਹਲੀ ਹਸਪਤਾਲ ਵਰਗੀ ਇੱਕ ਹੋਰ ਦੁਖਦਾਈ ਘਟਨਾ ਨੂੰ ਰੋਕਣ ਲਈ ਇਹ ਅਪੀਲ ਕੀਤੀ ਗਈ ਹੈ। ਹਸਪਤਾਲ ਵਿੱਚ 400 ਤੋਂ ਵੱਧ ਮਰੀਜ਼ ਅਤੇ ਲਗਭਗ 12,000 ਵਿਸਥਾਪਿਤ ਨਾਗਰਿਕ ਹਨ। ਸੋਸਾਇਟੀ ਦਾ ਕਹਿਣਾ ਹੈ ਕਿ ਅੰਤਰਰਾਸ਼ਟਰੀ ਭਾਈਚਾਰੇ ਨੂੰ ਇਜ਼ਰਾਇਲੀ ਹਮਲੇ ਦੇ ਖਿਲਾਫ ਤੁਰੰਤ ਕਾਰਵਾਈ ਕਰਨੀ ਚਾਹੀਦੀ ਹੈ।

ਇਜ਼ਰਾਈਲ ਦੇ ਖੇਤੀਬਾੜੀ ਅਤੇ ਪੇਂਡੂ ਵਿਕਾਸ ਮੰਤਰੀ ਅਵੀ ਡਿਕਟਰ ਨੇ ਕਿਹਾ ਕਿ ਹਮਾਸ ਸਮੂਹ ਨੇ ਜਾਨਵਰਾਂ ਵਾਂਗ ਵਿਵਹਾਰ ਕੀਤਾ ਹੈ। ਉਸ ਦਾ ਦੇਸ਼ ਯੁੱਧ ਦੌਰਾਨ ਅਤੇ ਬਾਅਦ ਵਿਚ ਹਮਾਸ ਦੇ ਅੱਤਵਾਦੀਆਂ ਨੂੰ ਜਾਨਵਰਾਂ ਵਾਂਗ ਨਿਸ਼ਾਨਾ ਬਣਾਏਗਾ। ਉਨ੍ਹਾਂ ਕਿਹਾ ਕਿ ਹਮਾਸ ਵਰਗੇ ਸਮੂਹਾਂ ਵਿਰੁੱਧ ਲੜਨ ਲਈ ਕਿਸੇ ਜਾਇਜ਼ ਦੀ ਲੋੜ ਨਹੀਂ ਹੈ ਜਿਨ੍ਹਾਂ ਨੇ ਇੱਕ ਜਾਨਵਰ ਦੂਜੇ ਜਾਨਵਰ ਦਾ ਸ਼ਿਕਾਰ ਕਰਨ ਵਰਗਾ ਵਿਵਹਾਰ ਕੀਤਾ ਹੈ। ਅਸੀਂ ਜੰਗ ਨੂੰ ਰੋਕਣ ਵਾਲੇ ਨਹੀਂ ਹਾਂ। ਕਿਸੇ ਨੂੰ ਨਹੀਂ ਛੱਡਾਂਗਾ।