ਆਇਰਲੈਂਡ ਦੀ ਇਤਿਹਾਸਕ ਜਿੱਤ, T20 'ਚ ਪਹਿਲੀ ਵਾਰ ਇੰਗਲੈਂਡ ਨੂੰ ਹਰਾਇਆ

ਇੰਗਲੈਂਡ : ਆਇਰਲੈਂਡ ਦੀ ਮਹਿਲਾ ਟੀਮ ਨੇ ਇਤਿਹਾਸ ਰਚ ਦਿੱਤਾ ਜਦੋਂ ਉਸ ਨੇ ਇੰਗਲੈਂਡ ਖਿਲਾਫ ਦੂਜੇ ਟੀ-20 ਵਿੱਚ 5 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ। ਟੀ-20 ਕ੍ਰਿਕਟ ਦੇ ਇਤਿਹਾਸ 'ਚ ਆਇਰਲੈਂਡ ਦੀ ਇੰਗਲੈਂਡ 'ਤੇ ਇਹ ਪਹਿਲੀ ਜਿੱਤ ਸੀ। ਇਸ ਤੋਂ ਪਹਿਲਾਂ ਦੋਵਾਂ ਟੀਮਾਂ ਵਿਚਾਲੇ ਖੇਡੀ ਗਈ ਵਨਡੇ ਸੀਰੀਜ਼ 'ਚ ਆਇਰਲੈਂਡ ਦੀ ਟੀਮ ਨੇ ਇੰਗਲੈਂਡ ਨੂੰ ਇਕ ਮੈਚ 'ਚ ਹਰਾਇਆ ਸੀ। ਆਇਰਲੈਂਡ 23 ਸਾਲ ਬਾਅਦ ਵਨਡੇ 'ਚ ਇੰਗਲੈਂਡ ਨੂੰ ਹਰਾਉਣ 'ਚ ਸਫਲ ਰਿਹਾ। ਆਇਰਲੈਂਡ ਦੀ 12 ਸਾਲਾਂ ਵਿੱਚ ਟੀ-20 ਵਿੱਚ ਇਹ ਪਹਿਲੀ ਜਿੱਤ ਹੈ। ਆਇਰਲੈਂਡ ਅਤੇ ਇੰਗਲੈਂਡ ਵਿਚਾਲੇ ਪਹਿਲਾ ਟੀ-20 2012 'ਚ ਖੇਡਿਆ ਗਿਆ ਸੀ। ਉਦੋਂ ਤੋਂ ਲੈ ਕੇ ਹੁਣ ਤੱਕ ਇੰਗਲੈਂਡ ਨੇ ਆਇਰਲੈਂਡ ਦੀ ਟੀਮ ਨੂੰ ਤਿੰਨ ਵਾਰ ਹਰਾਇਆ ਹੈ, ਜਦਕਿ ਆਇਰਲੈਂਡ ਨੇ ਹੁਣ ਪਹਿਲਾ ਟੀ-20 ਜਿੱਤ ਕੇ ਆਪਣਾ ਖਾਤਾ ਖੋਲ੍ਹ ਲਿਆ ਹੈ।

ਆਇਰਲੈਂਡ ਦੀ ਨਾਇਕਾ ਓਰਲਾ ਪ੍ਰੈਂਡਰਗਾਸਟ , ਜਿਸ ਨੇ 170 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ 80 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਓਰਲਾ ਨੇ ਇਸ ਪਾਰੀ 'ਚ 51 ਗੇਂਦਾਂ ਦਾ ਸਾਹਮਣਾ ਕੀਤਾ ਜਿਸ 'ਚ ਉਸ ਨੇ 13 ਚੌਕੇ ਲਗਾਏ। ਇਸ ਦੌਰਾਨ ਉਸ ਦਾ ਸਾਥ ਕਪਤਾਨ ਗੈਬੀ ਲੁਈਸ ਨੇ ਦਿੱਤਾ ਜਿਸ ਨੇ 38 ਦੌੜਾਂ ਦੀ ਪਾਰੀ ਖੇਡੀ ਅਤੇ ਲੀਹ ਪਾਲ ਨੇ 27 ਦੌੜਾਂ ਦੀ ਪਾਰੀ ਖੇਡੀ। ਆਇਰਲੈਂਡ ਨੇ ਇਹ ਟੀਚਾ 1 ਗੇਂਦ ਅਤੇ 5 ਵਿਕਟਾਂ ਬਾਕੀ ਰਹਿੰਦਿਆਂ ਹਾਸਲ ਕਰ ਲਿਆ।