ਅਡਾਨੀ ਜੋੜੀ ਦੀ ਕੈਪਟਨ ਅਮਰਿੰਦਰ ਸਿੰਘ ਨਾਲ਼ ਖ਼ਾਸ ਮੁਲਾਕਾਤ

ਸੀਸਵਾਂ ਫ਼ਾਰਮ–ਹਾਊਸ 'ਚ ਹੋਈ ਇਹ ਮੀਟਿੰਗ

ਸ਼ਿਮਲਾ ਤੇ ਹਿਮਾਚਲ ਦੇ ਹੋਰ ਖੇਤਰਾਂ ਦੇ ਦੌਰੇ ਪਿੱਛੋਂ ਪੁੱਜੇ ਨਿਊ ਚੰਡੀਗੜ੍ਹ

ਨਵਾਂ ਚੰਡੀਗੜ੍ਹ (ਮੋਹਾਲੀ): ਭਾਰਤ ਦੇ ਬਹੁ–ਚਰਚਿਤ ਉਦਯੋਗਪਤੀ ਗੌਤਮ ਅਡਾਨੀ ਅਤੇ ਉਨ੍ਹਾਂ ਦੀ ਪਤਨੀ ਪ੍ਰੀਤੀ ਅਡਾਨੀ ਨੇ ਵੀਰਵਾਰ ਸ਼ਾਮ ਨੂੰ ਕੈਪਟਨ ਅਮਰਿੰਦਰ ਸਿੰਘ ਨਾਲ ਇੱਕ ਵਿਸ਼ੇਸ਼ ਮੀਟਿੰਗ ਕੀਤੀ। ਉਨ੍ਹਾਂ ਨੇ ਮਿਲ਼ ਕੇ ਖਾਣਾ ਖਾਧਾ। ਇਹ ਮੁਲਾਕਾਤ ਕੈਪਟਨ ਅਮਰਿੰਦਰ ਸਿੰਘ ਦੇ ਨਵਾਂ ਚੰਡੀਗੜ੍ਹ ਲਾਗੇ ਸੀਸਵਾਂ ਫਾਰਮਹਾਊਸ ਉੱਤੇ ਹੋਈ। ਮੀਟਿੰਗ ਬਹੁਤ ਘਰੇਲੂ ਅਤੇ ਗਰਮਜੋਸ਼ੀ ਵਾਲੀ ਰਹੀ।

ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਮੀਟਿੰਗ ਦੀ ਇੱਕ ਤਸਵੀਰ ਆਪਣੇ ਫੇਸਬੁੱਕ ਅਕਾਊਂਟ ਉੱਤੇ ਸ਼ੇਅਰ ਕੀਤੀ ਅਤੇ ਲਿਖਿਆ: “ਗੌਤਮ ਅਤੇ ਪ੍ਰੀਤੀ ਅਡਾਣੀ ਨੂੰ ਰਾਤ ਦੇ ਖਾਣੇ ਲਈ ਬੁਲਾਉਣਾ ਬਹੁਤ ਖੁਸ਼ੀ ਵਾਲੀ ਗੱਲ ਰਿਹਾ। ਉਹ ਦੇਸ਼ ਲਈ ਜੋ ਕੰਮ ਕਰ ਰਿਹਾ ਹੈ, ਉਹ ਮੈਨੂੰ ਹੈਰਾਨ ਕਰਦਾ ਹੈ। ਮੈਂ ਉਸ ਨੂੰ ਇੱਕ ਉੱਜਲ ਭਵਿੱਖ ਦੀ ਕਾਮਨਾ ਕਰਦਾ ਹਾਂ। ਭਾਰਤ ਨੂੰ ਉਸ ਵਰਗੇ ਲੋਕਾਂ ਦੀ ਲੋੜ ਹੈ।”

ਗੌਤਮ ਅਡਾਲੀ ਅਤੇ ਪ੍ਰੀਤੀ ਅਡਾਣੀ ਸ਼ਿਮਲਾ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਹੋਰ ਕੁਝ ਇਲਾਕਿਆਂ ਦਾ ਦੌਰਾ ਕਰ ਰਹੇ ਸਨ। ਗੌਤਮ ਅਡਾਨੀ ਨੇ ਖੁਦ ਕੈਪਟਨ ਅਮਰਿੰਦਰ ਸਿੰਘ ਨੂੰ ਫੋਨ ਕੀਤਾ ਅਤੇ ਇਸ ਘਰੇਲੂ ਮੁਲਾਕਾਤ ਦਾ ਪ੍ਰੋਗਰਾਮ ਬਣਾਇਆ ਗਿਆ।

ਸੂਤਰਾਂ ਅਨੁਸਾਰ ਮੀਟਿੰਗ ਵਿਚ ਪੰਜਾਬ ਦੀ ਰਾਜਨੀਤਿਕ ਸਥਿਤੀ ਤੋਂ ਲੈ ਕੇ ਰਾਸ਼ਟਰੀ ਮੁੱਦਿਆਂ ਤੱਕ ਚਰਚਾ ਹੋਈ। ਗੌਤਮ ਅਡਾਨੀ ਨੇ ਆਪਣੀਆਂ ਚੱਲ ਰਹੀਆਂ ਉਦਯੋਗਿਕ ਯੋਜਨਾਵਾਂ, ਉਤਪਾਦਨ ਗਤੀਵਿਧੀਆਂ ਅਤੇ ਭਾਰਤ ਦੇ ਵਿਕਾਸ ਲਈ ਆਪਣੀਆਂ ਦੂਰਅੰਦੇਸ਼ ਯੋਜਨਾਵਾਂ ਬਾਰੇ ਵੀ ਜਾਣਕਾਰੀ ਦਿੱਤੀ। ਇਸ ਮੀਟਿੰਗ ਵਿੱਚ ਸਿਰਫ਼ ਕੁਝ ਨਜ਼ਦੀਕੀ ਜਾਣਕਾਰ ਹੀ ਮੌਜੂਦ ਰਹੇ।

ਕੈਪਟਨ ਅਮਰਿੰਦਰ ਸਿੰਘ ਦਾ ਫੇਸਬੁੱਕ ਪੋਸਟ ਮੀਟਿੰਗ ਤੋਂ ਤੁਰੰਤ ਬਾਅਦ ਕੈਪਟਨ ਅਮਰਿੰਦਰ ਸਿੰਘ ਨੇ ਤਸਵੀਰ ਸ਼ੇਅਰ ਕੀਤੀ। ਤਸਵੀਰ ਵਿਚ ਤਿੰਨੇ ਵਿਅਕਤੀ ਫਾਰਮਹਾਊਸ ਵਿਚ ਲੱਗੀ ਇੱਕ ਵੱਡੀ ਤਸਵੀਰ ਤੋਂ ਅੱਗੇ ਖੜ੍ਹੇ ਹਨ। ਕੈਪਟਨ ਅਮਰਿੰਦਰ ਗੁਲਾਬੀ ਪਗੜੀ ਅਤੇ ਗੂੜ੍ਹੇ ਨੀਲੇ ਲਿਬਾਸ ਵਿਚ ਅਤੇ ਗੌਤਮ ਅਡਾਨੀ ਚਿੱਟੀ ਕਮੀਜ਼ ਉੱਤੇ ਬਲੈਕ ਵੈਸਟ ਪਾਏ ਹੋਏ ਨਜ਼ਰ ਆ ਰਹੇ ਹਨ। ਪ੍ਰੀਤੀ ਅਡਾਨੀ ਰਵਾਇਤੀ ਲਾਲ ਲਿਬਾਸ ਵਿਚ ਹਨ।

ਇਹ ਮੁਲਾਕਾਤ ਇਸ ਲਈ ਖਾਸ ਹੈ ਕਿਉਂਕਿ ਕੈਪਟਨ ਅਮਰਿੰਦਰ ਸਿੰਘ ਕਾਂਗਰਸ ਛੱਡਣ ਤੋਂ ਬਾਅਦ ਭਾਜਪਾ ਨਾਲ ਨਜ਼ਦੀਕੀ ਰੱਖਦੇ ਹਨ। ਉਂਝ ਵੀ ਪੰਜਾਬ ਦੀ ਰਾਜਨੀਤੀ ਵਿਚ ਉਨ੍ਹਾਂ ਦੀ ਆਵਾਜ਼ ਅਜੇ ਵੀ ਬਹੁਤ ਮਜ਼ਬੂਤ ਹੈ। ਇਸ ਤੋਂ ਇਲਾਵਾ ਗੌਤਮ ਅਡਾਨੀ ਭਾਰਤ ਦੇ ਸਭ ਤੋਂ ਵੱਡੇ ਸਨਅਤਕਾਰਾਂ ਵਿਚੋਂ ਇੱਕ ਹਨ, ਜਿਨ੍ਹਾਂ ਦੀਆਂ ਬੁਨਿਆਦੀ ਢਾਂਚਾ, ਊਰਜਾ ਅਤੇ ਉਦਯੋਗ ਯੋਜਨਾਵਾਂ ਦੇਸ਼ ਭਰ ਵਿਚ ਚੱਲ ਰਹੀਆਂ ਹਨ। ਇਹ ਮੀਟਿੰਗ ਰਾਜਨੀਤਿਕ ਅਤੇ ਵਪਾਰਕ ਗਲਿਆਰਿਆਂ ਵਿਚ ਚਰਚਾ ਦਾ ਵਿਸ਼ਾ ਬਣ ਗਈ ਹੈ।