ਭ੍ਰਿਸ਼ਟਾਚਾਰ ਦੇ ਫੈਲਦੇ ਦਾਇਰੇ

-ਦਰਬਾਰਾ ਸਿੰਘ ਕਾਹਲੋਂ

ਇਹ ਵਿਸ਼ਵ ਵਿਆਪੀ ਸੱਚਾਈ ਹੈ ਕਿ ਜਦੋਂ ਕਿਸੇ ਸਮਾਜ, ਧਰਮ ਜਾਂ ਰਾਸ਼ਟਰ ਵਿਚ ਨੈਤਿਕਤਾ, ਸਦਾਚਾਰ ਅਤੇ ਚੰਗਿਆਈ ਅਸਫਲ ਹੋ ਜਾਂਦੇ ਹਨ ਤਾਂ ਉੱਥੇ ਅਨੈਤਿਕਤਾ, ਦੁਰਾਚਾਰ ਅਤੇ ਭ੍ਰਿਸ਼ਟਾਚਾਰੀ ਬਦੀ ਭਾਰੂ ਹੋ ਜਾਂਦੇ ਹਨ। ਮਨੁੱਖ ਹੀ ਨਹੀਂ ਸਮਾਜ, ਧਰਮ ਅਤੇ ਰਾਸ਼ਟਰ ਨਾਲ ਸਬੰਧਿਤ ਸੰਸਥਾਵਾਂ ਵੀ ਅਨੈਤਿਕਤਾ, ਦੁਰਾਚਾਰ ਅਤੇ ਭ੍ਰਿਸ਼ਟਾਚਾਰ ਦਾ ਸ਼ਿਕਾਰ ਹੋ ਜਾਂਦੀਆਂ ਹਨ। ਕਮਜ਼ੋਰ ਸਮਾਜ, ਧਰਮ ਅਤੇ ਰਾਸ਼ਟਰ ਹੀ ਨਹੀਂ ਬਲਕਿ ਬਲਵਾਨ ਤੋਂ ਵੀ ਇਨ੍ਹਾਂ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਸਭ ਤੋਂ ਖ਼ਤਰਨਾਕ ਸਥਿੱਤੀ ਉਦੋਂ ਉਤਪਨ ਹੁੰਦੀ ਹੈ ਜਦੋਂ ਇੰਨਾਂ ਨੂੰ ਅੰਦਰੂਨੀ ਅਤੇ ਬਾਹਰੀ ਤੌਰ ਅਨੈਤਿਕਤਾ, ਦੁਰਾਚਾਰਤਾ ਅਤੇ ਭ੍ਰਿਸ਼ਟਾਚਾਰਤਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇੰਨ੍ਹਾਂ ਦਾ ਮਾਨਵ, ਸਮਾਜਿਕ, ਧਾਰਮਿਕ ਅਤੇ ਰਾਸ਼ਟਰੀ ਵਿਕਾਸ ’ਤੇ ਬਹੁਤ ਬੁਰਾ ਅਸਰ ਪੈਂਦਾ ਹੈ। ਕੌਮਾਂਤਰੀ ਅਤੇ ਬਾਹਰੀ ਤੌਰ ’ਤੇ ਭਰੋਸੇਯੋਗਤਾ ਨੂੰ ਵੱਡੀ ਸੱਟ ਲੱਗਦੀ ਹੈ।

ਭ੍ਰਿਸ਼ਟਾਚਾਰ : ਭ੍ਰਿਸ਼ਟਾਚਾਰ ਮਨੁੱਖੀ ਸੁਭਾਅ ਦੀ ਕਮਜ਼ੋਰੀ ਨਾਲ ਜੁੜੀ ਹੋਈ ਅਨੈਤਿਕ ਬਦੀ ਹੈ। ਜਦੋਂ ਇਸਨੂੰ ਸੱਤਾ ਸ਼ਕਤੀ ਪ੍ਰਾਪਤ ਹੋ ਜਾਂਦੀ ਹੈ ਤਾਂ ਇਹ ਅਨਰਥ ਵੱਲ ਵੱਧਦੀ ਹੈ। ਮਨੁੱਖੀ ਭਰੋਸੇਯੋਗਤਾ ਦੇ ਖ਼ਾਤਮੇ ਬਾਅਦ ਇਹ ਸਮਾਜਿਕ, ਧਾਰਮਿਕ ਅਤੇ ਰਾਸ਼ਟਰੀ ਭਰੋਸੇਯੋਗਤਾ ਦੇ ਖ਼ਾਤਮੇ ਨੂੰ ਆਪਣੇ ਪ੍ਰਦੂਸ਼ਤ ਦਾਇਰੇ ਵਿਚ ਸਮੇਟਣਾ ਸ਼ੁਰੂ ਕਰ ਦਿੰਦੀ ਹੈ। ਜੇਕਰ ਰਾਸ਼ਟਰ, ਸਮਾਜਿਕ ਅਤੇ ਧਾਰਮਿਕ ਸੰਸਥਾਵਾਂ ਨਾਲ ਸਬੰਧਿਤ ਚੌਕਸੀ ਏਜੰਸੀਆਂ ਭ੍ਰਿਸ਼ਟਾਚਾਰ, ਅਨੈਤਿਕਤਾ ਅਤੇ ਦੁਰਾਚਾਰਤਾ ਦੇ ਫੈਲਦੇ ਦਾਇਰਿਆਂ ਤੇ ਸਮੇਂ ਸਿਰ ਲਗਾਮ ਨਹੀਂ ਲਗਾਉਂਦੀਆਂ ਜਾਂ ਲਗਾਉਣੋਂ ਅਸਰਮਥ ਸਾਬਤ ਹੁੰਦੀਆਂ ਹਨ ਤਾਂ ਇਸ ਦੇ ਸਿੱਟੇ ਬਹੁਤ ਹੀ ਮਾੜੇ ਨਿਕਲਦੇ ਹਨ। ਇਹ ਸੰਸਥਾਵਾਂ ਭ੍ਰਿਸ਼ਟਾਚਾਰੀ, ਧੋਖਾਘੜੀ ਅਤੇ ਦਗਾਬਾਜ਼ ਦੇਸੀ ਅਤੇ ਵਿਦੇਸ਼ੀ ਸੰਸਥਾਵਾਂ ਤੱਕ ਸੀਮਤ ਹੋ ਕੇ ਰਹਿ ਜਾਂਦੀਆਂ ਹਨ, ਇਵੇਂ ਹੀ ਇੰਨ੍ਹਾਂ ’ਤੇ ਕਾਬਜ਼ ਮਨੁੱਖ।

ਸਨਸਨੀਖੇਜ਼ ਖੁਲਾਸੇ :

ਭਾਰਤੀ ਪਾਰਲੀਮੈਂਟ ਵਿਚ ਇੱਕ ਵਾਰ ਇੱਕ ਸਾਂਸਦ ਨੇ ਪ੍ਰਧਾਨ ਮੰਤਰੀ ਪੰਡਤ ਜਵਾਹਰ ਲਾਲ ਨਹਿਰ ਨੂੰ ਰਾਜਨੀਤੀਵਾਨਾਂ ਅਤੇ ਅਫਸਰਸ਼ਾਹਾਂ ਵਿਚ ਵੱਧ ਰਹੇ ਭ੍ਰਿਸਟਾਚਾਰ ਬਾਰੇ ਪੁੱਛਿਆ। ਉਨ੍ਹਾਂ ਕਿਹਾ ਕਿ ਬੈਠ ਜਾਉ। ਇਹ ਲੋਕ ਭ੍ਰਿਸ਼ਟਾਚਾਰ ਰਾਹੀਂ ਲੁੱਟਿਆ ਧੰਨ ਦੇਸ਼ ਵਿਚ ਹੀ ਖਰਚਣਗੇ ਕਿਤੇ ਵਿਦੇਸ਼ ਨਹੀਂ ਲਿਜਾਣਗੇ। ਜਦੋਂ ਕਿਸੇ ਦੇਸ਼ ਦੇ ਪ੍ਰਧਾਨ ਮੰਤਰੀ ਦੇ ਭ੍ਰਿਸ਼ਟਾਚਾਰ ਬਾਰੇ ਐਸੇ ਵਿਚਾਰ ਹੋਣਗੇ ਤਾਂ ਕਿਹੜੀ ਭ੍ਰਿਸ਼ਟਾਚਾਰ ਰੋਕੂ ਰਾਜ ਏਜੰਸੀ ਇਸ ਨੂੰ ਰੋਕਣ ਲਈ ਸੰਜੀਦਗੀ ਜਾਂ ਰਾਜਨੀਤਕ ਇੱਛਾ ਸ਼ਕਤੀ ਬਲਬੂਤੇ ਅੱਗੇ ਆਏਗੀ। ਕਿਵੇਂ ਇਸ ਦੇਸ਼ ਦੇ ਚਾਰਾ, ਕਾਮਨਵੈਲਥ, ਕੋਲਾ, ਸੰਚਾਰ, ਆਦਰਸ਼, ਚੌਪਰ, ਬੋਫੋਰਸ ਆਦਿ ਘੋਟਾਲਿਆਂ ਵਿਸ਼ਵ ਵਿਆਪੀ ਤਰਥੱਲੀ ਮਚਾਈ, ਸਭ ਵਾਕਿਫ ਹਨ। ਅੱਜ ਦੇਸ਼ ਦੇ ਸਭ ਤੋਂ ਤਾਕਤਵਰ ਅਡਾਨੀ, ਅੰਬਾਨੀ ਕਾਰਪੋਰੇਟ ਘਰਾਣੇ, ਰਾਜਨੀਤੀਵਾਨ ਅਤੇ ਅਫਸਰਸ਼ਾਹ ਇੰਨ੍ਹਾਂ ਵਿਚ ਸ਼ਾਮਿਲ ਹਨ। ਦੇਸ਼ ਦਾ 5 ਟ੍ਰਿਲੀਅਨ ਡਾਲਰ ਧੰਨ ਵਿਦੇਸ਼ੀ ਬੈਂਕਾਂ ਅਤੇ ਹਵਾਲਾ ਸੰਸਥਾਵਾਂ ਵਿਚ ਜਮ੍ਹਾਂ ਹੈ।

ਇਸੇ ਸਮੇਂ ਅਸੀਂ ਆਪਣੇ ਸੁਹਿਰਦ ਪਾਠਕਾ ਅਤੇ ਕੌਮਾਂਤਰੀ ਭਾਈਚਾਰੇ ਸਾਹਮਣੇ ਇੱਕ ਵਿਸ਼ਵ ਦੇ ਕਦੇ ਪਹਿਲੇ-ਦੋ ਤਿੰਨ ਵਧੀਆ ਦੇਸ਼ਾਂ ਵਿਚ ਸ਼ੁਮਾਰ ਕੈਨੇਡਾ ਅਤੇ ਨਿਕੰਮੇ ਭ੍ਰਿਸ਼ਟਾਚਾਰੀ ਦੇਸ਼ਾਂ ਵਿਚ ਸ਼ੁਮਾਰ ਬੰਗਲਾ ਦੇਸ਼ ਦੇ ਸਨਸਨੀ ਖੇਜ਼ ਭ੍ਰਿਸ਼ਟਾਚਾਰੀ ਸਕੈਂਡਲ ਉਜਾਗਰ ਕਰ ਰਹੇ ਹਾਂ।

ਬਰਾਂਪਟਨ ਘੋਟਾਲਾ : ਕੈਨੇਡਾ ਵਿਸ਼ਵ ਦੇ ਪਹਿਲੇ ਚਾਰ-ਪੰਜ ਭ੍ਰਿਸ਼ਟਾਚਾਰ ਰਹਿਤ ਵਧੀਆ ਦੇਸ਼ਾਂ ਵਿਚ ਸ਼ੁਮਾਰ ਹੁੰਦਾ ਸੀ। ਪਰ ਪਿੱਛਲੇ ਕੁੱਝ ਸਮੇਂ ਤੋਂ ਇਸ ਵਿਚ ਭ੍ਰਿਸ਼ਟਾਚਾਰ, ਗਬਨ, ਵਿੱਤੀ ਧੋਖਾਘੜੀ, ਫਿਰੌਤੀਆਂ ਦੇ ਵਾਧੇ ਕਰਕੇ ਹੁਣ ਇਹ 15ਵੀਂ ਪੁਜ਼ੀਸ਼ਨ ’ਤੇ ਪੁੱਜ ਗਿਆ ਹੈ। ਪੈਸੇਫਿਕ ਚੋਣਾਂ ਅਤੇ ਰੇਲ ਕੰਟੈਕਟ ਘੋਟਾਲੇ ਕਰਕੇ ਇਸਦੇ ਪਹਿਲੇ ਪ੍ਰਧਾਨ ਮੰਤਰੀ ਨੂੰ ਅਸਤੀਫਾ ਦੇਣ ਲਈ ਮਜ਼ਬੂਰ ਹੋਣਾ ਪਿਆ ਸੀ। ਕਦੇ ਐਸੀ ਸੁਅੱਛ ਸਾਸ਼ਨ ਅਤੇ ਪ੍ਰਸਾਸ਼ਨ ਵਾਲੀ ਛਵੀ ਹੁੰਦੀ ਸੀ ਇਸ ਦੇਸ਼ ਦੀ।

11 ਅਕਤੂਬਰ, 2025 ਨੂੰ ਕੈਨੇਡਾ ਦੀ ਨਾਮਵਰ ਅਖਬਾਰ ‘ਟਰਾਂਟੋ ਸਟਾਰ’ ਵਿਚ ਇਸ ਦੇ ਜਾਂਚਕਰਤਾ ਰਿਪੋਰਟਰ ਕੇਵਿਨ ਡੋਨੋਵਾਨ ਨੇ ਬਰਾਂਪਟਨ ਸਿਟੀ ਦੇ ਮੇਅਰ ਪੈਟਰਿਕ ਬਰਾਊਨ ਵੱਲੋਂ 18 ਦਸੰਬਰ, 2023 ਨੂੰ ਇੱਕ ਦਫ਼ਤਰੀ ਇਮਾਰਤ ਸਬੰਧੀ ਕੀਤੇ ਸਨਸਨਖ਼ੇਜ਼ ਸੌਦੇ ਤੋਂ ਪਰਤ ਦਰ ਪਰਤ ਪਰਦੇ ਹਟਾ ਕੇ ਪੂਰੇ ਕੈਨੇਡਾ ਅੰਦਰ ਰਾਜਨੀਤਕ, ਪ੍ਰਸਾਸ਼ਨਿਕ, ਵਿੱਤੀ ਕਾਰੋਬਾਰੀ ਬਿਕਰਮ ਢਿਲੋਂ ਵਲੋਂ ਖਰੀਖਦੀ ਇਹ ਇਮਾਰਤ ਸੰਨ 2023 ਵਿਚ ਬਰਾਂਪਟਨ ਸਿਟੀ ਵਲੋਂ 77.9 ਮਿਲੀਅਨ ਡਾਲਰ ਵਿੱਚ ਖਰੀਦੀ ਜਿਸ ਕਰੇ ਕਾਰੋਬਾਰੀ ਨੂੰ 45 ਮਿਲੀਅਨ ਡਾਲਰ ਕਰੀਬ ਲਾਭ ਹੋਇਆ। ਇਹ ‘ਵਿੰਡਫਾਲ’ ਨੰਗਾ ਚਿੱਟਾ ਘੋਟਾਲਾ ਹੈ।

175 ਸੰਦਲਵੁੱਡ ਪਾਰਕ ਵੇਅ ਪੱਛਮ ਦੋ ਮੰਜਲਾ ਇਮਾਰਤ, ਉੱਤਰ-ਪੂਰਬ ਬਰਾਂਪਟਨ ਵਿਚ 16 ਏਕੜ ਸਨਅਤੀ ਜ਼ੋਨ ਵਿਚ ਪਿੰਕ ਸਟੋਨ ਅਤੇ ਸ਼ੀਸੇ ਨਾਲ ਉਸਾਰੀ ਕਦੇ ਓਂਟਾਰੀਓ ਪ੍ਰਾਂਤ ਦੇ 17 ਭਾਈਚਾਰਿਆਂ ਲਈ ਬਿਜਲੀ ਸਪਲਾਈ ਕਰਨ ਵਾਲੀ ਏਲੈਕਟਰਾ ਯੂਟਿਲਟੀ ਕੰਪਨੀ ਦੀ ਜਾਇਦਾਦ ਸੀ। ਸੰਨ 2020 ਵਿਚ ਇਸ ਕੰਪਨੀ ਨੂੰ ਹੋਰ ਦਫ਼ਤਰਾਂ ਦੀ ਲੋੜ ਕਰਕੇ ਇਸ ਦੇ ਬੁਲਾਰੇ ਬਲੇਅਰ ਪੇਬਰਡੀ ਅਨੁਸਾਰ ਇੱਕ ਨੰਬਰਡ ਕੰਪਨੀ ਨੂੰ ਵੇਚ ਦਿਤੀ 32.5 ਮਿਲੀਅਨ ਡਾਲਰ ਵਿਚ 1 ਤਿੰਨ ਹਫ਼ਤੇ ਬਾਅਦ ਇਸਨੂੰ ਬੀ.ਵੀ.ਡੀ. ਪੈਟਰੋਲੀਅਮ ਕੰਪਨੀ ਮਾਲਿਕ ਨੇ 21 ਮਿਲੀਅਨ ਮਾਰਗੇਜ਼ ਮਾਰਫਤ ਇਹ ਖਰੀਦ ਲਈ। ਉਸਨੇ ਤਿੰਨ ਸਾਲ ਲਈ 5.3 ਮਿਲੀਅਨ ਡਾਲਰ ਲੀਜ਼ ਤੇ ਇਸ ਦੀ ਪਹਿਲੀ ਏਲੈਕਟਰਾ ਯੂਟਿਲਟੀ ਕੰਪਨੀ ਨੇ ਲੈ ਲਈ।

ਸਤੰਬਰ 20, 2023 ਨੂੰ ਸਪੈਸ਼ਲ ਸਿਟੀ ਕੌਂਸਲ ਮੀਟਿੰਗ ਵਿਚ ਸਪੀਡ ਕੈਮਰਾ ਹੱਬ ਦਾ ਮੁੱਦਾ ਵਿਚਾਰਿਆ ਪਰ ਮੇਅਰ ਪੈਟਰਿਕ ਬਰਾਊਨ ਨੇ ਇਸ ਲਈ ਸੰਦਲਵੁੱਡ ਪਾਰਕ ਦਫ਼ਤਰ ਖਰੀਦਣ ਬਾਰੇ ਗੱਲ ਨਾ ਕੀਤੀ। ਸਤੰਬਰ 29 ਦੀ ਮੀਟਿੰਗ ਬੰਦ ਕਮਰੇ ਵਿਚ ਹੋਈ ਜਿਸ ਵਿਚ ਮੇਅਰ ਨੇ ਦੱਸਿਆ ਕਿ ਉਸਨੇ ਸਟਾਫ ਨੂੰ 77.9 ਮਿਲੀਅਨ ਦੀ ਸੰਦਲ ਵੱੁਡ ਇਮਾਰਤ ਖਰੀਦਣ ਲਈ ਕਿਹਾ ਹੈ। ਉਸਨੇ ਇਸਦਾ ਪ੍ਰਸਤਾਵ ਪੇਸ਼ ਕੀਤਾ ਜਿਸ ਦੀ ਤਾਈਦ ਕੌਂਸਲਰ ਰੋਵਨਾ ਸਨਤੋਸ ਨੇ ਕੀਤੀ। ਬਾਕੀ ਮੈਂਬਰ ਗੁੰਗੇ ਬਣੇ ਬੈਠੇ ਰਹੇ। ਭਾਵੇਂ ਇੱਕ ਐੱਮ.ਪੀ.ਆਰ. ਮੁਲਾਂਕਣ ਕੰਪਨੀ ਨੇ ਇਸ ਦੀ ਕੀਮਤ 67.5 ਮਿਲੀਅਨ ਲਗਾਈ ਪਰ ਇਸ ਨੂੰ ਖਰੀਦਿਆ 77.9 ਮਿਲੀਅਨ ਵਿਚ। ਬਸ ਇਥੋਂ ਇਸ ਘੁਟਾਲੇ, ਇਸਦੇ ਸ਼ਾਜਸ਼ਕਾਰ ਮੇਅਰ ਅਤੇ ਕਾਰੋਬਾਰੀ ਤੇ ਸ਼ਕ ਉਜਾਗਰ ਹੁੰਦਾ ਹੈ।

ਟੁਰਾਂਟੋ ਸਟਾਰ ਵੱਲੋਂ ਜਾਣਕਾਰੀ ਮੰਗਣ ’ਤੇ ਇਸ ਨੂੰ ‘ਗੁਪਤ ਅਧਿਕਾਰ’ ਅਤੇ ‘ਕਾਰੋਬਾਰੀ ਗੁੱਪਤੱਤਾ’ ਦੇ ਢੁੱਚਰ ਹੇਠ ਨਾਂਹ ਕਰ ਦਿਤੀ ਜਦਕਿ ਸੂਚਨਾ ਦੇ ਅਧਿਕਾਰ ਹੇਠ ਜੋ ਸੌਦਾ ਪਬਲਿਕ ਡੋਮੇਨ ਵਿਚ ਆ ਜਾਵੇ ਉਸ ਦੀ ਜਾਣਕਾਰੀ ਦੇਣੀ ਬਣਦੀ ਹੈ।

ਕਾਰੋਬਾਰੀ ਬਿਕਰਮ ਢਿੱਲੋਂ ਨੇ ‘ਸਟਾਰ’ ਵੱਲੋਂ ਲਿਖਤੀ, ਟੈਲੀਫੋਨ ਕਾਲਾਂ, ਈ ਮੇਲ ਅਤੇ ਨਿੱਜੀ ਤੌਰ ’ਤੇ ਜਾਣਕਾਰੀ ਦੇਣ ਤੋਂ ਟਾਲਾ ਵੱਟੀ ਰਖਿਆ। ਮੇਅਰ ਨੇ ਈਮੇਲ ਰਾਹੀਂ ਦੱਸਿਆ ਕਿ ਇਹ ਸਿਟੀ ਲਈ ਜ਼ਰੂਰੀ ਸੀ ਅਤੇ ਵਧੀਆ ਸੌਦਾ ਸੀ।

ਜਿਸ ਮੰਤਵ ਲਈ ਇਹ ਇਮਾਰਤ ਖਰੀਦੀ ਪਿੱਛਲੇ ਦੋ ਸਾਲ ਤੋਂ ਉਸ ਲਈ ਨਹੀਂ ਵਰਤੀ ਗਈ। ਬਿਕਰਮ ਢਿੱਲੋਂ ਮੇਅਰ ਦਾ ਚਹੇਤਾ ਹੈ ਜਿਸ ਨੂੰ ਅਗਸਤ, 2023 ਵਿਚ ‘ਸ਼ਹਿਰ ਦਾ ਸਰਵੋਤਮ ਨਾਗਰਿਕ’ ਵਜੋਂ ਸਨਮਾਨਿਤ ਕੀਤਾ। ਉਹ ਕਈ ਸਮਾਗਮਾਂ ਉਸ ਨਾਲ ਵੇਖਿਆ ਗਿਆ।

ਜਨਰੇਸ਼ਨਲ ਫੰਡ : ਬਰਾਂਪਟਨ ਲਈ ਜਨਰੇਸ਼ਨਲ ਪ੍ਰਾਜੈਕਟ ਫੰਡ 100 ਮਿਲੀਅਨ ਡਾਲਰ ਰਖਿਆ ਸੀ ਜੋ ਸੰਨ 2023 ਵਿਚ 20 ਮਿਲੀਅਨ, ਮਾਰਚ, 2025 ਵਿਚ ਸਿਰਫ 11 ਮਿਲੀਅਨ ਰਹਿ ਗਿਆ ਹੈ। ਸਟਾਰ ਨੇ ਰਾਇਲ ਕੈਨੇਡੀਅਨ ਮਾਉਂਟਿਡ ਪੁਲਸ ਵੱਲੋਂ ਸੰਦਲ ਵੁੱਡ ਘੁਟਾਲੇ ਦੀ ਜਾਂਚ ਦੀ ਮੰਗ ਕੀਤੀ ਹੈ। ਕਦੇ ਓਂਟਾਰੀਓ ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ਦੇ ਉਮੀਦਵਾਰ ਰਹੇ ਮੇਅਰ ਪੈਟਰਿਕ ਬਰਾਊਨ ਵਿਰੁੱਧ ਪ੍ਰੀਮੀਅਰ ਡਗ ਫੋਰਡ ਨੂੰ ਸੰਦਲਵੁੱਡ ਅਤੇ ਜਨਰੇਸ਼ਨਲ ਪ੍ਰਾਜੈਕਟ ਫੰਡ ਘੋਟਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਅਤੇ ਜਾਂਚ ਕਰਾਉਣੀ ਚਾਹੀਦੀ ਹੈ।

ਬੰਗਲਾ ਦੇਸ਼ ਭ੍ਰਿਸ਼ਟਾਚਾਰ : 5 ਅਕਤੂਬਰ, 2025 ਨੂੰ ਬੰਗਲਾ ਦੇਸ਼ ਦੀ ਸਭ ਤੋਂ ਵੱਡੀ ਅਖ਼ਬਾਰ ‘ਪ੍ਰਤੀਦਿਨ’ ਨੇ ਦੇਸ਼ ਅੰਦਰ ਸਨਸਨੀ ਖੇਜ ‘ਬੇਗਮਪਾਰਾ’ ਨਾਮਕ ਭ੍ਰਿਸ਼ਟਾਚਾਰ ਨੂੰ ਬੇਨਕਾਬ ਕੀਤਾ ਹੈ। 24 ਅਗਸਤ, 2025 ਨੂੰ ਅੰਤ੍ਰਿਮ ਸਰਕਾਰ ਨੇ ਧਨਾਢ, ਚੋਰ, ਭ੍ਰਿਸ਼ਟਾਚਾਰੀ ਬੰਗਲਾਦੇਸ਼ੀ ਰਾਜਨੀਤੀਵਾਨਾਂ, ਅਫਸ਼ਰਸ਼ਾਹਾਂ ਅਤੇ ਕਾਰੋਬਾਰੀਆਂ ਵੱਲੋਂ ਬਿਲੀਅਨ ਡਾਲਰ ਗਲਤ ਢੰਗ ਨਾਲ ਦੇਸ਼ ਵਿਚੋਂ ਲਿਜਾ ਕੇ ਵਿਦੇਸ਼ਾਂ ਵਿਚ ਜੋ ਜਾਇਦਾਦਾਂ ਖਰੀਦਣ ਅਤੇ ਕਾਰੋਬਾਰਾਂ ਲਗਾਏ ਹਨ, ਉਨ੍ਹਾਂ ਦੀ ਰਿਕਵਰੀ ਦੇ ਹੁੱਕਮਾਂ ਦਾ ਖੁਲਾਸਾ ਵੀ ਕੀਤਾ ਹੈ।

ਕਰੀਬ 1000 ਬੰਗਲਾ ਦੇਸ਼ੀ ਰਾਜਨੀਤੀਵਾਨਾਂ, ਉੱਚ ਅਫ਼ਸਰਸ਼ਾਹਾਂ, ਕਾਰੋਬਾਰੀਆਂ ਦੇ ਨਾਂਅ ਇਸ ਵਿਚ ਸ਼ਾਮਿਲ ਹਨ ਜਿਨ੍ਹਾਂ ਕੈਨੇਡਾ ਵਿਚ ਸਥਾਈ ਨਾਗਰਿਕਤਾ ਲਈ ਨਿਵੇਸ਼ ਕੀਤਾ। ਸੰਨ 2006 ਤੋਂ 2024 ਤੱਕ 44000 ਬੰਗਲਾ ਦੇਸ਼ੀਆਂ ਕੈਨੇਡਾ ਦੀ ਪੀ ਆਰ ਪ੍ਰਾਪਤ ਕੀਤੀ। ਆਮ ਪ੍ਰਵਾਸੀ ਨੂੰ ਇਸ ਲਈ ਸਖ਼ਤ ਮਿਹਨਤ ਕਰਨੀ ਪੈਂਦੀ ਹੈ ਜਦ ਕਿ ਭ੍ਰਿਸ਼ਟਾਚਾਰੀ ਇਸ ਨੂੰ ਲੁੱਟੇ ਧੰਨ ਨਾਲ ਖਰੀਦ ਲੈਂਦੇ ਹਨ।

‘ਬਗਮਪਾਰਾ’ ਬੰਗਲਾ ਵਿਚ ‘ਔਰਤਾਂ ਦੀ ਕਲੋਨੀ’ ਕਹੀ ਜਾਂਦੀ ਹੈ। ਧਨਾਢ ਭ੍ਰਿਸ਼ਟਾਚਾਰੀ ਬੰਗਲਾ ਦੇਸ਼ੀਆਂ ਨੇ ਔਰਤਾਂ ਅਤੇ ਬੱਚਿਆਂ ਨੂੰ ਵਿਦੇਸ਼ਾਂ ਵਿਚ ਵੱਸਣ ਲਈ ਇਹ ਢੰਗ ਵਰਤਿਆ। ਮਿਸਾਲ ਵੱਜੋਂ ਇੱਕ ਸਾਬਕਾ ਪ੍ਰਧਾਨ ਮੰਤਰੀ ਦੇ ਪ੍ਰਿੰਸੀਪਲ ਸਕੱਤਰ ਡਾ. ਅਹਮਦ ਕਲਕੌਸ ਸਟੱਡੀ ਲੀਵ ’ਤੇ ਅਮਰੀਕਾ ਜਾਂਦਾ ਹੈ, ਉੱਥੇ ਜਾਅਲੀ ਕੰਪਨੀਆਂ ਪੰਜੀਿਤ ਕਰਦਾ ਹੈ ਆਪਣੇ ਪਰਿਵਾਰ ਦੇ ਨਾਂਅ ’ਤੇ। ਉੱਥੇ ਨਾਗਰਿਕਤਾ ਪ੍ਰਾਪਤ ਕਰਦਾ ਹੈ। ਫਿਰ ਉਨ੍ਹਾਂ ਨੂੰ ਕੈਨੇਡਾ ਸ਼ਿਫਟ ਕਰਕੇ ਬੇਗਮ ’ਤੇ ਪਰਿਵਾਰ ਨੂੰ ਉੱਥੇ ਭੇਜ ਦਿੰਦਾ ਹੈ।

ਇਵੇਂ ਬੰਗਲਾ ਦੇਸ਼ ਸਰਕਾਰੀ ਟੀ.ਵੀ. ਚੈਨਲ ਦੀ ਕਾਰਜਕਾਰੀ ਅਧਿਕਾਰੀ ਆਪਣੇ ਪਤੀ ਨੂੰ ਕੈਨੇਡਾ ਭੇਜ ਕੇ ਹਵਾਲਾ ਰਾਹੀਂ ਲੱਖਾਂ ਡਾਲਰ ਭੇਜ ਕੇ ਉੱਥੇ ਵੱਸਦੀ ਹੈ। ਬੰਗਲਾ ਦੇਸ਼ ਦੀ ਇਸ ਜਮਾਤ ਕੋਲ ਰਿਚਮੰਡ ਹਿੱਲ ਅਤੇ ਓਕਵਿਲ ਵਿਚ ਵੱਡੇ-ਵੱਡੇ ਘਰ ਮੌਜੂਦ ਹਨ। ਜੀ.ਟੀ.ਏ. (ਗਰਾਂਡ ਟਰਾਂਟੋ ਏਰੀਆ) ਵਿਚ ਇਨ੍ਹਾਂ ਕੋਲ 200 ਦੇ ਕਰੀਬ ਬਹੁ ਕਰੋੜੀ ਬੰਗਲੇ, ਜਾਇਦਾਦਾਂ ਬੇਨਾਮੀ ਕੰਪਨੀਆਂ, ਪਰਿਵਾਰਿਕ ਟਰਸਟਾਂ ਅਤੇ ਕਾਰੋਬਾਰੀ ਨਾਵਾਂ ਹੇਠ ਪੰਜੀਿਤ ਹਨ। ਇੰਨਾਂ ਆਪਣੀ ਪਹਿਚਾਣ ਲੁਕੋ ਕੇ ਰੱਖੀ ਹੈ। ਡਰ ਹੈ ਕਿ ਕਿਤੇ ਪੋਲ ਨਾ ਖੁੱਲ੍ਹ ਜਾਏ।

ਨਵੇਂ ਕੈਨੇਡੀਅਨ ਕਾਨੂੰਨਾਂ ਦੇ ਬਾਵਜੂਦ ਇਹ ਲੋਕ ਆਪਣੀ ਜਾਇਦਾਦ ਦੇ ਸ੍ਰੋਤ ਉਜਾਗਰ ਨਹੀਂ ਕਰਦੇ। ਇਨ੍ਹਾਂ ਨੇ ਸਿੰਗਾਪੁਰ, ਦੁਬੱਈ, ਯੂ.ਕੇ. ਰੂਟ ਰਾਹੀਂ ਧੰਨ ਵਾਈਟ ਕਰਕੇ ਲਿਆਂਦਾ ਹੋਇਆ ਹੈ। ਇਵੇਂ ਇਹ ਦੇਸ਼ੀ ਅਤੇ ਵਿਦੇਸ਼ੀ ਕਾਨੂੰਨ ਤੋਂ ਬੱਚ ਨਿਕਲਦੇ ਹਨ। ਬੰਗਲਾਦੇਸ਼ ਅੰਤ੍ਰਿਮ ਸਰਕਾਰ ਕੀ ਇੰਨਾਂ ਤੋਂ ਧੰਨ ਰਿਕਵਰ ਕਰ ਸਕੇਗੀ, ਇਹ ਸੰਭਵ ਨਹੀਂ ਲਗਦਾ।

ਭਾਰਤ ਦੇ ਰਾਜਨੀਤੀਵਾਨਾਂ, ਉੱਚ ਅਫਸਰਸ਼ਾਹਾਂ, ਤਸਕਰਾਂ, ਗੈਂਗਸਟਰਾਂ, ਧੋਖੇਬਾਜ਼ ਵਿੱਤੀ ਅਪਰਾਧੀਆਂ ਨੇ ਵੀ ਆਪਣੇ ਪਰਿਵਾਰਾਂ ਦੇ ਇੱਕ-ਦੋ ਮੈਂਬਰ ਕੈਨੇਡਾ, ਅਮਰੀਕਾ, ਅਸਟ੍ਰੇਲੀਆ, ਯੂ.ਕੇ. ਜਾਂ ਹੋਰ ਥਾਵਾਂ ’ਤੇ ਭ੍ਰਿਸ਼ਟਾਚਾਰ ਰਾਹੀਂ ਲੁੱਟਿਆ ਧੰਨ ਨਿਵੇਸ਼ ਕਰਨ ਲਈ ਵਸਾਏ ਹੋਏ ਹਨ। ਕੀ ਐਸੇ ਦੇਸ਼ਾਂ ਨੇ ਕਦੇ ਅੰਤਰਝਾਤ ਮਾਰਨ ਦੀ ਕੋਸ਼ਿਸ਼ ਕੀਤੀ ਜਾਂ ਜਾਂਚ ਕਰਨ ਦਾ ਯਤਨ ਕੀਤਾ ਕਿ ਪ੍ਰਵਾਸੀ ਭ੍ਰਿਸ਼ਟਾਚਾਰੀ ਇੰਨਾਂ ਦੇਸ਼ਾਂ ਵਿਚ ਕੈਸਾ ਧੰਨ ਲਿਆ ਰਹੇ ਹਨ? ਐਸਾ ਧੰਨ ਸਵੀਕਾਰ ਕਰਨਾ ਕੈਸੀ ਰਾਸ਼ਟਰੀ ਨੈਤਿਕਤਾ ਹੈ?

ਕੈਨੇਡਾ ਗਲੋਬਲ ਪੱਧਰ ’ਤੇ ਇੱਕ ਭ੍ਰਿਸ਼ਟਾਚਾਰ ਰਹਿਤ, ਖੂਬਸੂਰਤ, ਕਾਨੂੰਨ ਦੇ ਰਾਜ ਵਾਲਾ ਦੇਸ਼ ਅਖਵਾਉਂਦਾ ਹੈ। ਪਰ ਇਸ ਅੰਦਰ ਕਾਲਾ ਧੰਨ ਬੜੀ ਸਾਫਗੋਈ ਲਾਲ ਬਗੈਰ ਪੁੱਛ ਪ੍ਰਤੀਤ ਦੇ ਆ ਰਿਹਾ ਹੈ। ਇਥੇ ਕਾਨੂੰਨ ਸਹੀ ਹਨ ਪਰ ਅਮਲ ਸਹੀ ਨਹੀਂ। ਇੰਨਾਂ ਨੂੰ ਚੀਰ ਕੇ ਭ੍ਰਿਸ਼ਟਾਚਾਰ, ਭ੍ਰਿਸ਼ਟਾਚਾਰੀ, ਭ੍ਰਿਸ਼ਟਾਚਾਰੀ ਧੰਨ ਆ ਸਮੋ ਰਿਹਾ ਹੈ ਜੋ ਇਸਦੀ ਸਦਾਚਾਰਕ ਅਤੇ ਸਾਫ਼ ਸ਼ਵੀ ਨੂੰ ਪਲੀਤ ਕਰ ਰਿਹਾ ਹੈ। ਕੈਨੇਡਾ ਦੇ ਉੱਜਲ ਭਵਿੱਖ ਲਈ ਇੰਨਾਂ ’ਤੇ ਰੋਕ ਲਗਣੀ ਅਤਿ ਜ਼ਰੂਰੀ ਹੈ।

ਸਾਬਕਾ ਰਾਜ ਸੂਚਨਾ ਕਮਿਸ਼ਨਰ ਪੰਜਾਬ,

ਕਿੰਗਸਟਨਕੈਨੇਡਾ।

+12898292929