ਸਾਬਕਾ ਡੀਜੀਪੀ ਓਮ ਪ੍ਰਕਾਸ਼ ਕੌਣ ਸਨ ਜੋ ਮ੍ਰਿਤਕ ਪਾਏ ਗਏ ?

ਕਰਨਾਟਕ ਦੇ ਸਾਬਕਾ ਡੀਜੀਪੀ ਓਮ ਪ੍ਰਕਾਸ਼ ਦੀ ਰਹੱਸਮਈ ਹਤਿਆ, ਬੈਂਗਲੁਰੂ ਦੇ ਘਰ ਵਿਚ ਲਾਸ਼ ਮਿਲੀ

ਬੈਂਗਲੁਰੂ | 21 ਅਪ੍ਰੈਲ 2025:

ਕਰਨਾਟਕ ਦੇ ਸਾਬਕਾ ਪੁਲਿਸ ਡਾਇਰੈਕਟਰ ਜਨਰਲ (ਡੀਜੀਪੀ) ਓਮ ਪ੍ਰਕਾਸ਼ ਦੀ ਲਾਸ਼ ਉਨ੍ਹਾਂ ਦੇ ਬੈਂਗਲੁਰੂ ਸਥਿਤ ਘਰ ਵਿੱਚ ਸੱਟਾਂ ਨਾਲ ਭਰੀ ਮਿਲਣ 'ਤੇ ਹੜਕੰਪ ਮਚ ਗਿਆ। 1981 ਬੈਚ ਦੇ ਆਈਪੀਐਸ ਅਧਿਕਾਰੀ ਰਹੇ ਪ੍ਰਕਾਸ਼ ਬਿਹਾਰ ਦੇ ਚੰਪਾਰਨ ਜ਼ਿਲ੍ਹੇ ਨਾਲ ਸਬੰਧਤ ਸਨ।

ਪੁਲਿਸ ਅਨੁਸਾਰ, ਉਨ੍ਹਾਂ ਦੀ ਲਾਸ਼ ਐਚਐਸਆਰ ਲੇਆਉਟ ਸਥਿਤ ਤਿੰਨ ਮੰਜ਼ਿਲਾ ਕੋਠੀ ਦੀ ਜ਼ਮੀਨੀ ਮੰਜ਼ਿਲ 'ਤੇ ਖੂਨ ਨਾਲ ਲੱਥਪੱਥ ਮਿਲੀ। ਵਧੀਕ ਪੁਲਿਸ ਕਮਿਸ਼ਨਰ ਵਿਕਾਸ ਕੁਮਾਰ ਨੇ ਦੱਸਿਆ ਕਿ ਲਗਦਾ ਹੈ ਇਹ ਹਮਲਾ ਕਿਸੇ ਤੇਜ਼ਧਾਰ ਹਥਿਆਰ ਨਾਲ ਕੀਤਾ ਗਿਆ ਸੀ, ਜਿਸ ਨਾਲ ਉਨ੍ਹਾਂ ਦੀ ਮੌਤ ਹੋ ਗਈ।

ਅਜੇ ਤੱਕ ਕਤਲ ਦੀ ਵਜ੍ਹਾ ਸਾਫ਼ ਨਹੀਂ ਹੋ ਸਕੀ ਅਤੇ ਕੋਈ ਗ੍ਰਿਫ਼ਤਾਰੀ ਵੀ ਨਹੀਂ ਹੋਈ। ਪਰ ਪੁਲਿਸ ਨੇ ਉਨ੍ਹਾਂ ਦੀ ਪਤਨੀ ਅਤੇ ਧੀ ਤੋਂ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ। ਸ਼ੁਰੂਆਤੀ ਜਾਂਚ ਦੱਸਦੀ ਹੈ ਕਿ ਇਹ ਘਟਨਾ ਘਰੇਲੂ ਤਨਾਅ ਜਾਂ ਪਰਿਵਾਰਕ ਝਗੜੇ ਦਾ ਨਤੀਜਾ ਹੋ ਸਕਦੀ ਹੈ।

ਪੁਲਿਸ ਨੂੰ ਇਹ ਵੀ ਪਤਾ ਲੱਗਿਆ ਹੈ ਕਿ ਓਮ ਪ੍ਰਕਾਸ਼ ਨੇ ਹਾਲ ਹੀ ਵਿੱਚ ਕੁਝ ਨਜ਼ਦੀਕੀ ਸਾਥੀਆਂ ਨੂੰ ਆਪਣੀ ਜਾਨ ਨੂੰ ਲੱਗ ਰਹੇ ਖ਼ਤਰੇ ਬਾਰੇ ਜਾਣਕਾਰੀ ਦਿੱਤੀ ਸੀ। ਪਰਿਵਾਰ ਵਿੱਚ ਜਾਇਦਾਦ ਨੂੰ ਲੈ ਕੇ ਵੀ ਚਰਚਾ ਚੱਲ ਰਹੀ ਸੀ, ਜੋ ਇਸ ਹਤਿਆ ਦੇ ਪਿੱਛੇ ਹੋ ਸਕਦੀ ਹੈ।

ਕੌਣ ਸਨ ਓਮ ਪ੍ਰਕਾਸ਼?

ਭੂ-ਵਿਗਿਆਨ ਵਿੱਚ ਮਾਸਟਰ ਕਰ ਚੁੱਕੇ ਓਮ ਪ੍ਰਕਾਸ਼ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਹਰਪਨਹੱਲੀ ਵਿੱਚ ਵਧੀਕ ਪੁਲਿਸ ਸੁਪਰਡੈਂਟ ਵਜੋਂ ਕੀਤੀ। ਬਾਅਦ ਵਿੱਚ ਉਹ ਬਲਾਰੀ, ਚਿੱਕਮਗਲੁਰੂ ਅਤੇ ਉੱਤਰਾ ਕੰਨੜ ਸਮੇਤ ਕਈ ਜ਼ਿਲ੍ਹਿਆਂ ਦੇ ਐਸਪੀ ਰਹੇ। ਉਨ੍ਹਾਂ ਨੇ ਲੋਕਾਯੁਕਤ, ਫਾਇਰ ਐਂਡ ਐਮਰਜੈਂਸੀ ਅਤੇ ਸੀ.ਆਈ.ਡੀ. ਵਿੱਚ ਵੀ ਉੱਚ ਅਹੁਦਿਆਂ 'ਤੇ ਕੰਮ ਕੀਤਾ।

ਉਹ 1 ਮਾਰਚ 2015 ਨੂੰ ਕਰਨਾਟਕ ਦੇ ਡੀਜੀਪੀ ਬਣੇ ਅਤੇ 2017 ਵਿੱਚ ਸੇਵਾਮੁਕਤ ਹੋ ਗਏ।

ਪੁਲਿਸ ਮਾਮਲੇ ਦੀ ਵਿਸਥਾਰਤ ਜਾਂਚ ਕਰ ਰਹੀ ਹੈ। ਕਤਲ ਦੇ ਪਿੱਛੇ ਦਾ ਕਾਰਨ ਅਤੇ ਦੋਸ਼ੀਆਂ ਦੀ ਪਛਾਣ ਜਲਦੀ ਕੀਤੇ ਜਾਣ ਦੀ ਉਮੀਦ ਹੈ।