Brampton 'ਚ Mehak Radio ਦੇ Studio 'ਚ ਹਜ਼ਾਰਾਂ ਡਾਲਰ ਦਾ ਸਾਮਾਨ ਹੋਇਆ ਚੋਰੀ

ਮਹਿਕ ਰੇਡੀਓ ਦੇ ਬਰੈਂਪਟਨ ਸਥਿਤ ਸਟੂਡੀਓ ਵਿੱਚ ਅੱਧੀ ਰਾਤ ਸਮੇਂ ਵੱਡੀ ਚੋਰੀ ਦੀ ਵਾਰਦਾਤ ਨੇ ਸਥਾਨਕ ਮੀਡੀਆ ਭਾਈਚਾਰੇ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਰੇਡੀਓ ਸਟੇਸ਼ਨ ਦੇ ਮਾਲਕ ਜਗਰਾਜ ਸਿੱਧੂ ਮੁਤਾਬਕ ਅਣਪਛਾਤੇ ਚੋਰਾਂ ਨੇ ਸਟੂਡੀਓ ਦੀ ਪਿਛਲੀ ਕੰਧ ਤੋੜ ਕੇ ਅੰਦਰ ਦਾਖ਼ਲ ਹੋਏ ਅਤੇ ਕਰੀਬ 25 ਹਜ਼ਾਰ ਡਾਲਰ ਮੁੱਲ ਦਾ ਕੀਮਤੀ ਸਾਮਾਨ ਚੋਰੀ ਕਰ ਲਿਆ। ਚੋਰੀ ਹੋਏ ਸਾਮਾਨ ਵਿੱਚ ਪ੍ਰੋਫੈਸ਼ਨਲ ਕੈਮਰੇ, ਰਿਕਾਰਡਿੰਗ ਉਪਕਰਣ ਅਤੇ ਕਈ ਆਈਫੋਨ ਸ਼ਾਮਲ ਹਨ, ਜੋ ਪ੍ਰੋਗਰਾਮਿੰਗ ਅਤੇ ਲਾਈਵ ਕਵਰੇਜ ਲਈ ਵਰਤੇ ਜਾਂਦੇ ਸਨ। ਸਟੂਡੀਓ ਪ੍ਰਬੰਧਕਾਂ ਦੇ ਅਨੁਸਾਰ, ਇਹ ਉਪਕਰਣ ਸਟੇਸ਼ਨ ਦੀ ਰੋਜ਼ਾਨਾ ਕਾਰਗੁਜ਼ਾਰੀ ਲਈ ਬਹੁਤ ਜ਼ਰੂਰੀ ਸਨ ਅਤੇ ਇਸ ਨੁਕਸਾਨ ਨਾਲ ਕੰਮਕਾਜ ‘ਤੇ ਅਸਰ ਪੈ ਸਕਦਾ ਹੈ। ਸਵੇਰੇ ਜਦੋਂ ਸਟਾਫ਼ ਰੁਟੀਨ ਮੁਤਾਬਕ ਸਟੂਡੀਓ ਪਹੁੰਚਿਆ ਤਾਂ ਕੰਧ ਵਿੱਚ ਸੁਰਾਖ਼ ਅਤੇ ਅੰਦਰ ਖੰਗਾਲਿਆ ਹੋਇਆ ਸਾਮਾਨ ਦੇਖ ਕੇ ਉਹ ਹੈਰਾਨ ਰਹਿ ਗਏ।

ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਜਾਂਚ ਅਧਿਕਾਰੀਆਂ ਨੇ ਮੌਕੇ ‘ਤੇ ਪਹੁੰਚ ਕੇ ਸਬੂਤ ਇਕੱਠੇ ਕੀਤੇ ਅਤੇ ਆਸ-ਪਾਸ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਇਹ ਵੀ ਪਤਾ ਲਗਾ ਰਹੀ ਹੈ ਕਿ ਚੋਰ ਪਹਿਲਾਂ ਤੋਂ ਸਟੂਡੀਓ ਦੀ ਬਣਤਰ ਅਤੇ ਸੁਰੱਖਿਆ ਪ੍ਰਬੰਧਾਂ ਨਾਲ ਜਾਣੂ ਸਨ ਜਾਂ ਨਹੀਂ। ਇਲਾਕੇ ਦੇ ਹੋਰ ਕਾਰੋਬਾਰੀਆਂ ਨਾਲ ਵੀ ਪੁੱਛਗਿੱਛ ਕੀਤੀ ਜਾ ਰਹੀ ਹੈ ਕਿ ਕੀ ਉਨ੍ਹਾਂ ਨੇ ਕੋਈ ਸ਼ੱਕੀ ਹਲਚਲ ਵੇਖੀ ਸੀ। ਇਸ ਘਟਨਾ ਤੋਂ ਬਾਅਦ ਸਥਾਨਕ ਵਪਾਰੀਆਂ ਅਤੇ ਮੀਡੀਆ ਹਾਊਸਾਂ ਵਿੱਚ ਚਿੰਤਾ ਵੱਧ ਗਈ ਹੈ। ਕਈ ਲੋਕਾਂ ਨੇ ਸੁਰੱਖਿਆ ਪ੍ਰਬੰਧ ਹੋਰ ਮਜ਼ਬੂਤ ਕਰਨ ਦੀ ਮੰਗ ਕੀਤੀ ਹੈ ਤਾਂ ਜੋ ਭਵਿੱਖ ਵਿੱਚ ਇਸ ਤਰ੍ਹਾਂ ਦੀਆਂ ਵਾਰਦਾਤਾਂ ਨੂੰ ਰੋਕਿਆ ਜਾ ਸਕੇ। ਪੁਲਿਸ ਨੇ ਜਨਤਾ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਇਸ ਮਾਮਲੇ ਨਾਲ ਸੰਬੰਧਤ ਕੋਈ ਜਾਣਕਾਰੀ ਹੋਵੇ ਤਾਂ ਤੁਰੰਤ ਅੱਗੇ ਆ ਕੇ ਸਾਂਝੀ ਕਰੇ।