ਮੁਕਾਬਲੇ 'ਚ ਦੋਹੇ ਲੱਤਾਂ ਗਵਾਉਣ ਵਾਲਾ ਹੁਣ ਜਾਵੇਗਾ ਰਾਜ ਸਭਾ ਵਿਚ

ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਨੇ ਭਾਰਤੀ ਸੰਵਿਧਾਨ ਅਧੀਨ ਆਪਣੀਆਂ ਸ਼ਕਤੀਆਂ ਦੀ ਵਰਤੋਂ ਕਰਦਿਆਂ ਚਾਰ ਉੱਘੀਆਂ ਸ਼ਖਸੀਅਤਾਂ ਨੂੰ ਰਾਜ ਸਭਾ ਲਈ ਨਾਮਜ਼ਦ ਕੀਤਾ ਹੈ। ਇਨ੍ਹਾਂ ਵਿੱਚ ਕੇਰਲ ਦੇ ਪ੍ਰਸਿੱਧ ਅਧਿਆਪਕ ਅਤੇ ਸਮਾਜ ਸੇਵਕ ਸੀ. ਸਦਾਨੰਦਨ ਮਾਸਟਰ ਵੀ ਸ਼ਾਮਲ ਹਨ, ਜਿਨ੍ਹਾਂ ਦੀ ਜ਼ਿੰਦਗੀ ਸਿੱਖਿਆ, ਹਿੰਮਤ ਅਤੇ ਸੰਘਰਸ਼ ਦੀ ਪ੍ਰੇਰਕ ਮਿਸਾਲ ਹੈ। ਉਨ੍ਹਾਂ ਦੇ ਨਾਮ ਦਾ ਐਲਾਨ ਹੋਣ 'ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਉਨ੍ਹਾਂ ਨੂੰ ਵਧਾਈ ਦਿੱਤੀ।

ਪ੍ਰਧਾਨ ਮੰਤਰੀ ਮੋਦੀ ਨੇ ਆਪਣੇ ਟਵੀਟ ਵਿੱਚ ਲਿਖਿਆ, "ਸੀ. ਸਦਾਨੰਦਨ ਮਾਸਟਰ ਦਾ ਜੀਵਨ ਹਿੰਮਤ ਅਤੇ ਨੈਤਿਕਤਾ ਦਾ ਪ੍ਰਤੀਕ ਹੈ। ਹਿੰਸਾ ਅਤੇ ਧਮਕੀਆਂ ਉਨ੍ਹਾਂ ਦੇ ਜਜ਼ਬੇ ਨੂੰ ਕਦੇ ਨਹੀਂ ਡਗਮਗਾ ਸਕੀਆਂ। ਇੱਕ ਅਧਿਆਪਕ ਅਤੇ ਸਮਾਜ ਸੇਵਕ ਵਜੋਂ ਉਨ੍ਹਾਂ ਦੇ ਯਤਨਾਂ ਨੂੰ ਸਲਾਮ। ਉਨ੍ਹਾਂ ਦੀ ਯੁਵਾ ਸਸ਼ਕਤੀਕਰਨ ਲਈ ਵਚਨਬੱਧਤਾ ਕਾਬਿਲ-ਏ-ਤਾਰੀਫ਼ ਹੈ। ਰਾਜ ਸਭਾ ਮੈਂਬਰ ਵਜੋਂ ਉਨ੍ਹਾਂ ਦੀ ਭੂਮਿਕਾ ਲਈ ਸ਼ੁਭਕਾਮਨਾਵਾਂ।"

ਸੀ. ਸਦਾਨੰਦਨ ਮਾਸਟਰ: ਇੱਕ ਪ੍ਰੇਰਕ ਯਾਤਰਾ

ਸੀ. ਸਦਾਨੰਦਨ ਮਾਸਟਰ 1999 ਤੋਂ ਕੇਰਲਾ ਦੇ ਤ੍ਰਿਸੂਰ ਜ਼ਿਲ੍ਹੇ ਦੇ ਪੇਰਾਮੰਗਲਮ ਦੇ ਸ਼੍ਰੀ ਦੁਰਗਾ ਵਿਲਾਸਮ ਹਾਇਰ ਸੈਕੰਡਰੀ ਸਕੂਲ ਵਿੱਚ ਸਮਾਜਿਕ ਵਿਗਿਆਨ ਦੇ ਅਧਿਆਪਕ ਹਨ। ਉਨ੍ਹਾਂ ਨੇ ਗੁਹਾਟੀ ਯੂਨੀਵਰਸਿਟੀ ਤੋਂ ਬੀ.ਕਾਮ ਅਤੇ ਕਾਲੀਕਟ ਯੂਨੀਵਰਸਿਟੀ ਤੋਂ ਬੀ.ਐੱਡ ਕੀਤਾ। ਉਹ ਕੇਰਲਾ ਰਾਸ਼ਟਰੀ ਅਧਿਆਪਕ ਸੰਘ ਦੇ ਉਪ-ਪ੍ਰਧਾਨ ਅਤੇ ਇਸਦੇ ਮੈਗਜ਼ੀਨ 'ਦੇਸ਼ੀਆ ਅਧਿਆਪਕ ਵਾਰਤਾ' ਦੇ ਸੰਪਾਦਕ ਵੀ ਹਨ।

ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਸਭ ਤੋਂ ਵੱਡਾ ਮੋੜ 25 ਜਨਵਰੀ 1994 ਨੂੰ ਆਇਆ, ਜਦ ਉਹ ਸਿਰਫ਼ 30 ਸਾਲ ਦੇ ਸਨ। ਕੰਨੂਰ ਜ਼ਿਲ੍ਹੇ ਵਿੱਚ, ਉਨ੍ਹਾਂ ਦੇ ਘਰ ਨੇੜੇ ਉਨ੍ਹਾਂ 'ਤੇ ਹਮਲਾ ਕੀਤਾ ਗਿਆ, ਜਿਸ ਵਿੱਚ ਉਨ੍ਹਾਂ ਦੀਆਂ ਦੋਵੇਂ ਲੱਤਾਂ ਕੱਟਣੀਆਂ ਪਈਆਂ। ਦੱਸਿਆ ਜਾਂਦਾ ਹੈ ਕਿ ਇਹ ਹਮਲਾ ਸੀਪੀਆਈ (ਐਮ) ਵਰਕਰਾਂ ਵੱਲੋਂ ਉਨ੍ਹਾਂ ਦੀ ਵਿਚਾਰਧਾਰਕ ਅਸਹਿਮਤੀ ਕਾਰਨ ਕੀਤਾ ਗਿਆ। ਹਾਲਾਂਕਿ, ਇਸ ਹਾਦਸੇ ਤੋਂ ਬਾਅਦ ਵੀ ਉਨ੍ਹਾਂ ਨੇ ਹੌਸਲਾ ਨਹੀਂ ਹਾਰਿਆ ਅਤੇ ਸਮਾਜਿਕ ਤੇ ਵਿਦਿਅਕ ਖੇਤਰ ਵਿੱਚ ਆਪਣੀ ਸਰਗਰਮੀਆਂ ਜਾਰੀ ਰੱਖੀਆਂ।

ਉਹ ਪਹਿਲਾਂ ਕੰਨੂਰ ਦੀ ਕੂਥੁਪਰੰਬਾ ਵਿਧਾਨ ਸਭਾ ਸੀਟ ਤੋਂ ਚੋਣ ਵੀ ਲੜ ਚੁੱਕੇ ਹਨ ਅਤੇ ਭਾਰਤੀ ਵਿਚਾਰ ਕੇਂਦਰਮ ਵਰਗੇ ਵਿਚਾਰਧਾਰਕ ਸੰਗਠਨਾਂ ਨਾਲ ਵੀ ਜੁੜੇ ਰਹੇ ਹਨ। ਉਹ ਰਾਜਨੀਤਿਕ ਹਿੰਸਾ ਦੇ ਵਿਰੋਧੀ ਹਨ ਅਤੇ ਵਿਦਿਅਕ ਸੁਧਾਰਾਂ, ਸ਼ਾਂਤੀ ਅਤੇ ਵਿਚਾਰਧਾਰਕ ਸੰਤੁਲਨ ਦੀ ਵਕਾਲਤ ਕਰਦੇ ਹਨ।

ਉਨ੍ਹਾਂ ਦੀ ਪਤਨੀ ਵਨੀਤਾ ਰਾਣੀ ਵੀ ਅਧਿਆਪਕਾ ਹੈ ਅਤੇ ਧੀ ਯਮੁਨਾ ਭਾਰਤੀ ਬੀ.ਟੈਕ ਦੀ ਵਿਦਿਆਰਥਣ ਹੈ। ਉਨ੍ਹਾਂ ਦਾ ਪਰਿਵਾਰ ਸਿੱਖਿਆ ਅਤੇ ਸਮਾਜ ਸੇਵਾ ਵਿੱਚ ਹਮੇਸ਼ਾ ਅੱਗੇ ਰਿਹਾ ਹੈ।