ਗਰਭਵਤੀ ਪਤਨੀ ਅਤੇ 3 ਧੀਆਂ ਦਾ ਗਲਾ ਵੱਢ ਕੇ ਕੀਤਾ ਕਤਲ

ਕਰਜ਼ੇ ਅਤੇ ਸੱਟੇਬਾਜ਼ੀ ਨੇ ਉਜਾੜਿਆ ਹੱਸਦਾ-ਵਸਦਾ ਪਰਿਵਾਰ

ਨਵੀਂ ਦਿੱਲੀ: 2 ਮਾਰਚ, 2026 

ਦਿੱਲੀ ਦੇ ਸਮੈਪੁਰ ਬਾਦਲੀ ਇਲਾਕੇ ਵਿੱਚ ਵਾਪਰੇ ਇੱਕ ਦਿਲ ਕੰਬਾਊ ਕਾਂਡ ਵਿੱਚ ਇੱਕ ਵਿਅਕਤੀ ਨੇ ਆਪਣੀ ਗਰਭਵਤੀ ਪਤਨੀ ਅਤੇ ਤਿੰਨ ਮਾਸੂਮ ਧੀਆਂ ਦੀ ਬੇਰਹਿਮੀ ਨਾਲ ਹੱਤਿਆ ਕਰ ਦਿੱਤੀ। ਪੁਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਦੋਸ਼ੀ ਮੁੰਚੁਨ ਕੇਵਟ ਨੇ ਪੁੱਛਗਿੱਛ ਦੌਰਾਨ ਜੋ ਖੁਲਾਸੇ ਕੀਤੇ ਹਨ, ਉਹ ਰੂਹ ਕੰਬਾਊ ਹਨ। ਮੂਲ ਰੂਪ ਵਿੱਚ ਬਿਹਾਰ ਦਾ ਰਹਿਣ ਵਾਲਾ ਮੁੰਚੁਨ ਆਜ਼ਾਦਪੁਰ ਮੰਡੀ ਵਿੱਚ ਸਬਜ਼ੀ ਵੇਚਦਾ ਸੀ, ਪਰ ਉਹ ਕ੍ਰਿਕਟ ਅਤੇ ਹੋਰ ਖੇਡਾਂ 'ਤੇ ਆਨਲਾਈਨ ਸੱਟੇਬਾਜ਼ੀ ਕਰਨ ਦਾ ਆਦੀ ਹੋ ਗਿਆ ਸੀ। ਇਸ ਲਤ ਕਾਰਨ ਉਹ ਭਾਰੀ ਕਰਜ਼ੇ ਵਿੱਚ ਡੁੱਬ ਗਿਆ ਅਤੇ ਅੰਤ ਵਿੱਚ ਉਸ ਨੇ ਖ਼ੌਫ਼ਨਾਕ ਕਦਮ ਚੁੱਕਦਿਆਂ ਆਪਣੇ ਪੂਰੇ ਪਰਿਵਾਰ ਨੂੰ ਖ਼ਤਮ ਕਰ ਦਿੱਤਾ।

ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਮੁੰਚੁਨ ਨੇ ਆਪਣੇ ਸਹੁਰੇ ਪਰਿਵਾਰ ਤੋਂ ਕਰਜ਼ਾ ਉਤਾਰਨ ਲਈ 2 ਲੱਖ ਰੁਪਏ ਉਧਾਰ ਲਏ ਸਨ, ਪਰ ਉਸ ਨੇ ਉਨ੍ਹਾਂ ਵਿੱਚੋਂ 1 ਲੱਖ ਰੁਪਏ ਵੀ ਜੂਏ ਵਿੱਚ ਹਾਰ ਦਿੱਤੇ। ਉਸ ਨੇ ਦੱਸਿਆ ਕਿ ਮਿਥਿਲੇਸ਼ ਨਾਮਕ ਇੱਕ ਕਰਜ਼ਾਦਾਤਾ ਉਸ ਨੂੰ ਲਗਾਤਾਰ ਪੈਸਿਆਂ ਲਈ ਧਮਕਾ ਰਿਹਾ ਸੀ। 23 ਫਰਵਰੀ ਨੂੰ ਮਿਥਿਲੇਸ਼ ਨੇ ਫ਼ੋਨ 'ਤੇ ਧਮਕੀ ਦਿੱਤੀ ਕਿ ਜੇਕਰ ਪੈਸੇ ਨਾ ਮਿਲੇ ਤਾਂ ਉਹ ਉਸ ਦੀ ਪਤਨੀ ਅਨੀਤਾ ਨੂੰ ਚੁੱਕ ਕੇ ਲੈ ਜਾਵੇਗਾ ਅਤੇ ਬੱਚਿਆਂ ਤੋਂ ਕੰਮ ਕਰਵਾਏਗਾ। ਇਸ ਗੱਲ ਤੋਂ ਗੁੱਸੇ ਵਿੱਚ ਆ ਕੇ ਮੁੰਚੁਨ ਨੇ ਪੂਰੇ ਪਰਿਵਾਰ ਨੂੰ ਮਾਰਨ ਦੀ ਯੋਜਨਾ ਬਣਾਈ ਅਤੇ ਬਾਜ਼ਾਰ ਵਿੱਚੋਂ 90 ਰੁਪਏ ਦਾ ਇੱਕ ਤੇਜ਼ਧਾਰ ਚਾਕੂ ਖਰੀਦ ਲਿਆ।

ਕਤਲ ਵਾਲੀ ਰਾਤ ਤੋਂ ਪਹਿਲਾਂ ਮੁੰਚੁਨ ਆਪਣੇ ਪਰਿਵਾਰ ਨੂੰ ਹੋਲੀ ਦੀ ਖਰੀਦਦਾਰੀ ਕਰਵਾਉਣ ਵੀ ਲੈ ਕੇ ਗਿਆ ਸੀ। ਰਾਤ ਨੂੰ ਜਦੋਂ ਪਤਨੀ ਅਤੇ ਬੱਚੇ ਸੌਂ ਰਹੇ ਸਨ, ਤਾਂ ਸਵੇਰੇ ਕਰੀਬ 4 ਵਜੇ ਉਸ ਨੇ ਸਭ ਤੋਂ ਪਹਿਲਾਂ ਆਪਣੀ ਪਤਨੀ ਦਾ ਗਲਾ ਵੱਢਿਆ। ਮਾਂ ਦੀਆਂ ਚੀਕਾਂ ਸੁਣ ਕੇ ਜਦੋਂ ਵੱਡੀ ਧੀ ਜਾਗ ਪਈ, ਤਾਂ ਮੁੰਚੁਨ ਨੇ ਉਸ ਦਾ ਅਤੇ ਫਿਰ ਬਾਕੀ ਦੋ ਧੀਆਂ ਦਾ ਵੀ ਗਲਾ ਵੱਢ ਦਿੱਤਾ। ਅਨੀਤਾ ਦੋ ਮਹੀਨਿਆਂ ਦੀ ਗਰਭਵਤੀ ਸੀ, ਜਿਸ ਕਾਰਨ ਇਸ ਘਟਨਾ ਵਿੱਚ ਕੁੱਲ ਪੰਜ ਜਾਨਾਂ ਗਈਆਂ। ਵਾਰਦਾਤ ਤੋਂ ਬਾਅਦ ਦੋਸ਼ੀ ਰਾਜਸਥਾਨ ਭੱਜ ਗਿਆ ਸੀ, ਪਰ ਦਿੱਲੀ ਪੁਲਿਸ ਨੇ ਕਰੀਬ 800 ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕਰਨ ਤੋਂ ਬਾਅਦ ਉਸ ਨੂੰ ਕਿਸ਼ਨਗੜ੍ਹ ਰੇਲਵੇ ਸਟੇਸ਼ਨ ਤੋਂ ਗ੍ਰਿਫ਼ਤਾਰ ਕਰ ਲਿਆ।