ਪਾਕਿਸਤਾਨ 'ਤੇ ਏਸ਼ੀਆ ਕੱਪ ਟਰਾਫੀ ਅਤੇ ਮੈਡਲ ਚੋਰੀ ਕਰਨ ਦਾ ਦੋਸ਼

ਬੀ.ਸੀ.ਸੀ.ਆਈ. ਦੀ ਨਕਵੀ ਵਿਰੁੱਧ ਕਾਰਵਾਈ ਦੀ ਤਿਆਰੀ

ਭਾਰਤ ਦੀ ਏਸ਼ੀਆ ਕੱਪ 2025 ਦੀ ਜਿੱਤ ਤੋਂ ਬਾਅਦ ਪੈਦਾ ਹੋਇਆ ਵਿਵਾਦ ਹੋਰ ਗਹਿਰਾ ਹੋ ਗਿਆ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਦੇ ਸਕੱਤਰ ਦੇਵਜੀਤ ਸੈਕੀਆ ਨੇ ਦੋਸ਼ ਲਗਾਇਆ ਹੈ ਕਿ ਏਸ਼ੀਅਨ ਕ੍ਰਿਕਟ ਕੌਂਸਲ (ਏ.ਸੀ.ਸੀ.) ਦੇ ਪ੍ਰਧਾਨ ਮੋਹਸਿਨ ਨਕਵੀ ਟੀਮ ਇੰਡੀਆ ਦੀ ਟਰਾਫੀ ਅਤੇ ਮੈਡਲ ਲੈ ਕੇ ਚਲੇ ਗਏ ਹਨ। ਇਸ ਮਾਮਲੇ 'ਤੇ ਬੀ.ਸੀ.ਸੀ.ਆਈ. ਅਗਲੇ ਮਹੀਨੇ ਹੋਣ ਵਾਲੀ ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ਆਈ.ਸੀ.ਸੀ.) ਦੀ ਮੀਟਿੰਗ ਵਿੱਚ ਨਕਵੀ ਵਿਰੁੱਧ ਰਸਮੀ ਵਿਰੋਧ ਦਰਜ ਕਰਵਾਏਗਾ।

ਟਰਾਫੀ ਵਿਵਾਦ ਦਾ ਮੂਲ

ਭਾਰਤ ਨੇ ਫਾਈਨਲ ਵਿੱਚ ਪਾਕਿਸਤਾਨ ਨੂੰ ਹਰਾਉਣ ਤੋਂ ਬਾਅਦ, ਟੀਮ ਨੇ ਮੋਹਸਿਨ ਨਕਵੀ ਤੋਂ ਟਰਾਫੀ ਲੈਣ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ। ਇਹ ਫੈਸਲਾ ਨਕਵੀ ਦੇ ਹਾਲ ਹੀ ਦੇ ਭਾਰਤ ਵਿਰੋਧੀ ਬਿਆਨਾਂ ਦੇ ਵਿਰੋਧ ਵਜੋਂ ਲਿਆ ਗਿਆ ਸੀ। ਸੈਕੀਆ ਨੇ ਕਿਹਾ ਕਿ ਟੀਮ ਨੇ ਸਿਰਫ਼ ਨਕਵੀ ਤੋਂ ਟਰਾਫੀ ਲੈਣ ਤੋਂ ਇਨਕਾਰ ਕੀਤਾ ਸੀ, ਪਰ ਇਸ ਦਾ ਇਹ ਮਤਲਬ ਨਹੀਂ ਕਿ ਉਹ ਟਰਾਫੀ ਅਤੇ ਮੈਡਲ ਚੋਰੀ ਕਰਕੇ ਲੈ ਜਾਣ। ਉਨ੍ਹਾਂ ਨੇ ਇਸ ਨੂੰ "ਬਹੁਤ ਹੀ ਮੰਦਭਾਗਾ ਅਤੇ ਬੇਇਨਸਾਫ਼ੀ" ਦੱਸਿਆ ਅਤੇ ਉਮੀਦ ਪ੍ਰਗਟਾਈ ਕਿ ਟਰਾਫੀ ਅਤੇ ਮੈਡਲ ਜਲਦ ਤੋਂ ਜਲਦ ਭਾਰਤ ਨੂੰ ਵਾਪਸ ਕਰ ਦਿੱਤੇ ਜਾਣਗੇ।

ਬੀ.ਸੀ.ਸੀ.ਆਈ. ਦਾ ਸਖ਼ਤ ਰੁਖ਼

ਸੈਕੀਆ ਨੇ ਇਸ ਘਟਨਾ ਨੂੰ "ਆਪ੍ਰੇਸ਼ਨ ਕਿਲਾ" ਦਾ ਨਾਮ ਦਿੱਤਾ, ਜੋ ਕਿ ਭਾਰਤੀ ਫੌਜ ਦੁਆਰਾ ਸਰਹੱਦ 'ਤੇ ਕੀਤੀ ਗਈ ਕਾਰਵਾਈ ਨਾਲ ਮਿਲਦਾ-ਜੁਲਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਦੁਬਈ ਵਿੱਚ ਹੋਈ ਇਹ ਘਟਨਾ ਉਨ੍ਹਾਂ ਸਾਰੇ "ਬੇਤੁਕੀਆਂ ਹਰਕਤਾਂ" ਦਾ ਢੁਕਵਾਂ ਜਵਾਬ ਹੈ ਜੋ ਕੁਝ ਦੇਸ਼ ਕਰਦੇ ਹਨ। ਸੈਕੀਆ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਭਾਰਤ ਸਰਕਾਰ ਦੀ ਨੀਤੀ ਅਨੁਸਾਰ, ਭਾਰਤੀ ਟੀਮਾਂ ਦੁਵੱਲੇ ਟੂਰਨਾਮੈਂਟਾਂ ਵਿੱਚ ਪਾਕਿਸਤਾਨ ਨਾਲ ਨਹੀਂ ਖੇਡਦੀਆਂ, ਪਰ ਅੰਤਰਰਾਸ਼ਟਰੀ ਫੈਡਰੇਸ਼ਨਾਂ ਦੁਆਰਾ ਲਗਾਈਆਂ ਪਾਬੰਦੀਆਂ ਤੋਂ ਬਚਣ ਲਈ ਬਹੁ-ਰਾਸ਼ਟਰੀ ਟੂਰਨਾਮੈਂਟਾਂ ਵਿੱਚ ਹਿੱਸਾ ਲੈਣਾ ਜ਼ਰੂਰੀ ਹੈ।