NASA ਦਾ ਇਤਿਹਾਸਕ Artemis-2 mission launch: 54 ਸਾਲਾਂ ਬਾਅਦ ਚੰਦਰਮਾ ਦੀ ਯਾਤਰਾ

ਫਲੋਰੀਡਾ:  ਅਮਰੀਕੀ ਪੁਲਾੜ ਏਜੰਸੀ ਨਾਸਾ (NASA) ਨੇ ਅੱਜ ਵੀਰਵਾਰ, 2 ਅਪ੍ਰੈਲ ਨੂੰ ਪੁਲਾੜ ਵਿਗਿਆਨ ਦੇ ਖੇਤਰ ਵਿੱਚ ਇੱਕ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਫਲੋਰੀਡਾ ਸਥਿਤ ਕੈਨੇਡੀ ਸਪੇਸ ਸੈਂਟਰ (Kennedy Space Center) ਤੋਂ ਸਵੇਰੇ 4:05 ਵਜੇ ਆਰਟੇਮਿਸ-2 (Artemis-2) ਮੂਨ ਮਿਸ਼ਨ ਨੂੰ ਸਫ਼ਲਤਾਪੂਰਵਕ ਲਾਂਚ ਕੀਤਾ ਗਿਆ। ਇਸ ਮਿਸ਼ਨ ਰਾਹੀਂ 1972 ਦੇ ਅਪੋਲੋ-17 ਮਿਸ਼ਨ ਤੋਂ ਲਗਭਗ 54 ਸਾਲਾਂ ਬਾਅਦ ਪਹਿਲੀ ਵਾਰ ਇਨਸਾਨ ਧਰਤੀ ਦੇ ਲੋਅਰ ਅਰਥ ਆਰਬਿਟ (LEO) ਨੂੰ ਪਾਰ ਕਰਕੇ ਚੰਦਰਮਾ ਦੀ ਯਾਤਰਾ 'ਤੇ ਨਿਕਲਿਆ ਹੈ। ਇਸ ਮਿਸ਼ਨ ਵਿੱਚ ਚਾਰ ਪੁਲਾੜ ਯਾਤਰੀ—ਰੀਡ ਵਾਈਜ਼ਮੈਨ, ਵਿਕਟਰ ਗਲੋਵਰ, ਕ੍ਰਿਸਟੀਨਾ ਕੋਚ ਅਤੇ ਜੇਰੇਮੀ ਹੈਨਸਨ—ਓਰੀਅਨ ਪੁਲਾੜ ਯਾਨ (Orion Spacecraft) ਵਿੱਚ ਸਵਾਰ ਹੋ ਕੇ ਚੰਦਰਮਾ ਵੱਲ ਰਵਾਨਾ ਹੋਏ ਹਨ।

ਇਸ ਇਤਿਹਾਸਕ ਲਾਂਚਿੰਗ ਦੌਰਾਨ ਉਸ ਵੇਲੇ ਭਾਰੀ ਤਣਾਅ ਪੈਦਾ ਹੋ ਗਿਆ ਜਦੋਂ ਲਾਂਚ ਤੋਂ ਮਹਿਜ਼ 60 ਮਿੰਟ ਪਹਿਲਾਂ ਲਾਂਚ ਅਬੌਰਟ ਸਿਸਟਮ (Launch Abort System) ਵਿੱਚ ਤਕਨੀਕੀ ਖਰਾਬੀ ਆ ਗਈ। ਇਹ ਸਿਸਟਮ ਪੁਲਾੜ ਯਾਤਰੀਆਂ ਦੀ ਸੁਰੱਖਿਆ ਲਈ ਬੇਹੱਦ ਅਹਿਮ ਹੈ ਕਿਉਂਕਿ ਇਹ ਕਿਸੇ ਵੀ ਅਣਸੁਖਾਵੀਂ ਘਟਨਾ ਵੇਲੇ ਯਾਤਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਵਿੱਚ ਮਦਦ ਕਰਦਾ ਹੈ। ਹਾਲਾਂਕਿ, ਨਾਸਾ ਦੇ ਇੰਜੀਨੀਅਰਾਂ ਨੇ ਮੁਸਤੈਦੀ ਦਿਖਾਉਂਦੇ ਹੋਏ ਇਸ ਸਮੱਸਿਆ ਨੂੰ ਹੱਲ ਕਰ ਲਿਆ, ਜਿਸ ਕਾਰਨ ਮਿਸ਼ਨ 10 ਮਿੰਟ ਦੀ ਦੇਰੀ ਨਾਲ ਸਪੇਸ ਲਾਂਚ ਸਿਸਟਮ (SLS) ਰਾਕੇਟ ਰਾਹੀਂ ਰਵਾਨਾ ਕੀਤਾ ਗਿਆ।

10 ਦਿਨਾਂ ਦਾ ਇਹ ਚਾਲਕ ਦਲ ਵਾਲਾ ਮਿਸ਼ਨ (Crewed Mission) ਮੁੱਖ ਤੌਰ 'ਤੇ ਓਰੀਅਨ ਪੁਲਾੜ ਯਾਨ ਦੀ ਜਾਂਚ ਅਤੇ ਇਸਦੇ ਲਾਈਫ ਸਪੋਰਟ ਸਿਸਟਮ (Life Support System) ਦੀ ਪੁਸ਼ਟੀ ਕਰਨ ਲਈ ਭੇਜਿਆ ਗਿਆ ਹੈ। ਇਹ ਯਾਨ ਚੰਦਰਮਾ ਦੀ ਪਰਿਕਰਮਾ ਕਰੇਗਾ ਪਰ ਸਤ੍ਹਾ 'ਤੇ ਨਹੀਂ ਉਤਰੇਗਾ। ਇਸ ਮਿਸ਼ਨ ਦੀ ਸਫ਼ਲਤਾ ਭਵਿੱਖ ਦੇ ਮੰਗਲਯਾਨ (Mars Mission) ਅਤੇ ਆਰਟੇਮਿਸ-3 ਮਿਸ਼ਨਾਂ ਲਈ ਰਾਹ ਪੱਧਰਾ ਕਰੇਗੀ। ਨਾਸਾ ਦੀ ਯੋਜਨਾ ਅਨੁਸਾਰ, ਜੇਕਰ ਸਭ ਕੁਝ ਠੀਕ ਰਿਹਾ ਤਾਂ 2027 ਵਿੱਚ ਆਰਟੇਮਿਸ-3 ਲਾਂਚ ਕੀਤਾ ਜਾਵੇਗਾ ਅਤੇ 2028 ਦੇ ਆਰਟੇਮਿਸ-4 ਮਿਸ਼ਨ ਰਾਹੀਂ ਇਨਸਾਨ ਇੱਕ ਵਾਰ ਫਿਰ ਚੰਦਰਮਾ ਦੀ ਸਤ੍ਹਾ 'ਤੇ ਪੈਰ ਰੱਖੇਗਾ।