ਮਹਾਰਾਸ਼ਟਰ 'ਚ ਫੈਲੀ ਰਹੱਸਮਈ ਬੀਮਾਰੀ

73 ਲੋਕ ਪ੍ਰਭਾਵਿਤ; ਸਰਕਾਰ ਸੁਚੇਤ

ਪੁਣੇ : ਮਹਾਰਾਸ਼ਟਰ ਦੇ ਪੁਣੇ ਵਿੱਚ ਇੱਕ ਰਹੱਸਮਈ ਬਿਮਾਰੀ ਦੇ ਮਾਮਲੇ ਸਾਹਮਣੇ ਆਏ ਹਨ, ਜਿਸ ਕਾਰਨ ਸਰਕਾਰ ਨੇ ਚੌਕਸੀ ਵਧਾ ਦਿੱਤੀ ਹੈ। ਹੁਣ ਤੱਕ 73 ਲੋਕ ਇਸ ਬਿਮਾਰੀ ਤੋਂ ਪ੍ਰਭਾਵਿਤ ਹੋ ਚੁੱਕੇ ਹਨ। ਪੁਣੇ ਦੇ ਤਿੰਨ ਹਸਪਤਾਲਾਂ ਨੇ ਇਸ ਸੰਬੰਧੀ ਸਥਾਨਕ ਅਧਿਕਾਰੀਆਂ ਨੂੰ ਅਲਰਟ ਕੀਤਾ ਹੈ। ਇਹ ਬਿਮਾਰੀ ਨਵਜੰਮੇ ਬੱਚਿਆਂ ਨੂੰ ਵੀ ਪ੍ਰਭਾਵਿਤ ਕਰ ਰਹੀ ਹੈ।

ਸਿਹਤ ਵਿਭਾਗ ਦੀ ਰਿਪੋਰਟ ਅਨੁਸਾਰ, ਇਹ ਬੀਮਾਰੀ ਗੁਇਲੇਨ-ਬੈਰੇ ਸਿੰਡਰੋਮ (ਜੀ.ਬੀ.ਐੱਸ.) ਹੈ, ਜੋ ਮਨੁੱਖੀ ਇਮਿਊਨ ਸਿਸਟਮ ਨੂੰ ਨਿਸ਼ਾਨਾ ਬਣਾਉਂਦੀ ਹੈ। ਖੁਸ਼ੀ ਦੀ ਗੱਲ ਹੈ ਕਿ ਇਸ ਬਿਮਾਰੀ ਦਾ ਇਲਾਜ ਸੰਭਵ ਹੈ।

ਮਰੀਜ਼ਾਂ ਦੀ ਗਿਣਤੀ ਵਿੱਚ ਅਚਾਨਕ ਵਾਧਾ ਹੋਣ ਕਾਰਨ ਸਿਹਤ ਵਿਭਾਗ ਨੇ ਘਰ-ਘਰ ਸਰਵੇਖਣ ਕਰਕੇ 7200 ਘਰਾਂ ਦੀ ਜਾਂਚ ਕੀਤੀ। ਸਰਵੇਖਣ ਦੌਰਾਨ, ਲੋਕਾਂ ਨੂੰ ਬਿਮਾਰੀ ਦੇ ਲੱਛਣਾਂ ਬਾਰੇ ਜਾਣਕਾਰੀ ਦਿੱਤੀ ਗਈ। ਜੀ.ਬੀ.ਐੱਸ. ਦੇ ਆਮ ਲੱਛਣਾਂ ਵਿੱਚ ਅੰਗਾਂ ਦਾ ਸੁੰਨ ਹੋਣਾ ਅਤੇ ਲੰਬੇ ਸਮੇਂ ਤੱਕ ਦਸਤ ਲੱਗਣਾ ਸ਼ਾਮਲ ਹਨ।

ਮਾਹਿਰਾਂ ਮੁਤਾਬਕ, ਜੀ.ਬੀ.ਐੱਸ. ਦਾ ਮੁੱਖ ਕਾਰਨ ਕੈਂਪੀਲੋਬੈਕਟਰ ਜੇਜੂਨੀ ਬੈਕਟੀਰੀਆ ਹੈ, ਜੋ ਮਨੁੱਖੀ ਇਮਿਊਨ ਸਿਸਟਮ 'ਤੇ ਹਮਲਾ ਕਰਦਾ ਹੈ। ਹਸਪਤਾਲਾਂ ਵਿੱਚ ਕੀਤੇ ਗਏ ਸਟੂਲ ਟੈਸਟਾਂ ਵਿੱਚ ਵੀ ਇਹੀ ਬੈਕਟੀਰੀਆ ਪਾਇਆ ਗਿਆ ਹੈ।

ਕੇਂਦਰੀ ਸਿਹਤ ਮੰਤਰਾਲੇ ਨੇ ਵੀ ਇਸ ਮਾਮਲੇ ਦੀ ਸੰਜੀਦਗੀ ਨੂੰ ਸਮਝਦੇ ਹੋਏ ਨੋਟਿਸ ਲਿਆ ਹੈ। ਕੇਂਦਰੀ ਨਿਗਰਾਨੀ ਯੂਨਿਟ (ਸੀਐਸਯੂ) ਨੇ ਪੁਣੇ ਵਿੱਚ ਵਧ ਰਹੇ ਮਾਮਲਿਆਂ ਦੀ ਜਾਂਚ ਕਰਨ ਲਈ ਇੱਕ ਟੀਮ ਭੇਜਣ ਦਾ ਫੈਸਲਾ ਕੀਤਾ ਹੈ।

ਪੁਣੇ ਵਿੱਚ 16 ਜੀ.ਬੀ.ਐੱਸ. ਮਰੀਜ਼ ਸੈਸੂਨ ਹਸਪਤਾਲ ਵਿੱਚ ਇਲਾਜ ਅਧੀਨ ਹਨ। 73 ਮਰੀਜ਼ਾਂ ਵਿੱਚੋਂ 44 ਪੁਣੇ ਦਿਹਾਤੀ ਖੇਤਰਾਂ ਤੋਂ ਹਨ, 11 ਪੁਣੇ ਕਾਰਪੋਰੇਸ਼ਨ ਖੇਤਰ ਅਤੇ 15 ਪਿੰਪਰੀ-ਚਿੰਚਵੜ ਨਗਰ ਨਿਗਮ ਖੇਤਰ ਦੇ ਹਨ। ਸਭ ਤੋਂ ਵੱਧ ਮਰੀਜ਼ ਕਿਰਕਿਟਵਾੜੀ (14), ਡੀਐਸਕੇ ਵਿਸ਼ਵਾ (8), ਨਾਂਦੇੜ ਸ਼ਹਿਰ (7) ਅਤੇ ਖੜਕਵਾਸਲਾ (6) ਤੋਂ ਹਨ।

ਮਰੀਜ਼ਾਂ ਦੀ ਉਮਰ ਸੰਬੰਧੀ ਵਿਸ਼ਲੇਸ਼ਣ ਅਨੁਸਾਰ, 3 ਮਰੀਜ਼ 5 ਸਾਲ ਤੋਂ ਘੱਟ ਉਮਰ ਦੇ, 18 ਮਰੀਜ਼ 6-15 ਸਾਲ ਦੀ ਉਮਰ ਦੇ, ਅਤੇ 7 ਮਰੀਜ਼ 60 ਸਾਲ ਤੋਂ ਵੱਧ ਉਮਰ ਦੇ ਹਨ।