Chandigarh property dealer murder case ਮਾਮਲੇ ਵਿਚ ਹੋਰ ਵੱਡੇ ਖੁਲਾਸੇ

ਚੰਡੀਗੜ੍ਹ: 20 ਮਾਰਚ, 2026  

ਮੋਹਾਲੀ ਦੇ ਕੁੱਬਹੇੜੀ ਦੇ ਰਹਿਣ ਵਾਲੇ ਪ੍ਰਾਪਰਟੀ ਡੀਲਰ ਚਮਨਪ੍ਰੀਤ ਸਿੰਘ ਦੇ ਦਿਨ-ਦਿਹਾੜੇ ਹੋਏ ਕਤਲ ਮਾਮਲੇ ਵਿੱਚ ਹੈਰਾਨੀਜਨਕ ਖ਼ੁਲਾਸੇ ਹੋਏ ਹਨ। ਪੰਜਾਬ ਪੁਲਿਸ ਦੀ ਐਂਟੀ ਗੈਂਗਸਟਰ ਟਾਸਕ ਫੋਰਸ (AGTF) ਨੇ ਹਰਿਆਣਾ ਪੁਲਿਸ ਨਾਲ ਮਿਲ ਕੇ ਇੱਕ ਸਾਂਝੇ ਆਪ੍ਰੇਸ਼ਨ ਦੌਰਾਨ ਦੋ ਸ਼ੂਟਰਾਂ ਨੂੰ ਕੈਥਲ ਵਿੱਚ ਹੋਏ ਮੁਕਾਬਲੇ ਤੋਂ ਬਾਅਦ ਗ੍ਰਿਫ਼ਤਾਰ ਕਰ ਲਿਆ ਹੈ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਰਾਜਨ ਉਰਫ਼ ਪੀਯੂਸ਼ ਪਹਿਲਵਾਨ (ਫਿਰੋਜ਼ਪੁਰ) ਅਤੇ ਪ੍ਰੀਤਮ ਸ਼ਾਹ (ਨਵਾਂਸ਼ਹਿਰ) ਵਜੋਂ ਹੋਈ ਹੈ।

ਮਲੇਸ਼ੀਆ ਤੋਂ ਰਚੀ ਗਈ ਸਾਜ਼ਿਸ਼

ਪੁਲਿਸ ਸੂਤਰਾਂ ਅਨੁਸਾਰ ਇਸ ਕਤਲ ਦੀ ਪੂਰੀ ਸਾਜ਼ਿਸ਼ ਗੈਂਗਸਟਰ ਗੌਰਵ ਪਟਿਆਲ ਨੇ ਰਚੀ ਸੀ। ਮੁੱਖ ਸ਼ੂਟਰ ਰਾਜਨ ਖ਼ਾਸ ਤੌਰ 'ਤੇ ਇਸ ਵਾਰਦਾਤ ਨੂੰ ਅੰਜਾਮ ਦੇਣ ਲਈ 15 ਜਨਵਰੀ ਨੂੰ ਮਲੇਸ਼ੀਆ ਤੋਂ ਭਾਰਤ ਆਇਆ ਸੀ। ਉਸ ਨੇ ਨੇਪਾਲ ਦੇ ਰਸਤੇ ਪੰਜਾਬ ਵਿੱਚ ਐਂਟਰੀ ਕੀਤੀ ਅਤੇ ਪਿਛਲੇ ਦੋ ਮਹੀਨਿਆਂ ਤੋਂ ਚੰਡੀਗੜ੍ਹ, ਮੋਹਾਲੀ ਅਤੇ ਕੈਥਲ ਵਿੱਚ ਰਹਿ ਕੇ ਚਮਨਪ੍ਰੀਤ ਦੀ ਰੇਕੀ ਕਰ ਰਿਹਾ ਸੀ। ਵਾਰਦਾਤ ਲਈ ਵਰਤੇ ਗਏ ਹਥਿਆਰ ਸਰਹੱਦ ਪਾਰੋਂ ਮੰਗਵਾਏ ਗਏ ਸਨ ਅਤੇ ਸ਼ੂਟਰਾਂ ਨੇ ਪਹਿਲਾਂ ਉਨ੍ਹਾਂ ਦਾ ਅਭਿਆਸ ਵੀ ਕੀਤਾ ਸੀ ਤਾਂ ਜੋ ਮੌਕੇ 'ਤੇ ਕੋਈ ਚੂਕ ਨਾ ਹੋਵੇ।

ਪੰਜ ਦਿਨ ਤੱਕ ਪਿੱਛਾ ਅਤੇ ਸ਼ਾਤਰਾਨਾ ਫ਼ਰਾਰੀ

ਚਮਨਪ੍ਰੀਤ ਨੂੰ ਆਪਣੀ ਜਾਨ 'ਤੇ ਮੰਡਰਾ ਰਹੇ ਖ਼ਤਰੇ ਦਾ ਅਹਿਸਾਸ ਸੀ, ਜਿਸ ਕਾਰਨ ਉਹ ਲਗਾਤਾਰ ਬਚਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਸ਼ੂਟਰਾਂ ਨੇ ਉਸ ਦਾ 5 ਦਿਨ ਪਿੱਛਾ ਕੀਤਾ ਅਤੇ ਅੰਤ ਵਿੱਚ 18 ਮਾਰਚ ਨੂੰ ਚੰਡੀਗੜ੍ਹ ਦੇ ਇੱਕ ਜਿੰਮ ਦੇ ਬਾਹਰ ਉਸ ਨੂੰ ਗੋਲੀਆਂ ਮਾਰ ਦਿੱਤੀਆਂ। ਕਤਲ ਤੋਂ ਬਾਅਦ ਮੁਲਜ਼ਮ ਬੇਹੱਦ ਸ਼ਾਤਰਾਨਾ ਤਰੀਕੇ ਨਾਲ ਹੈਲਮੇਟ ਪਹਿਨ ਕੇ ਸਾਈਕਲਾਂ 'ਤੇ ਫ਼ਰਾਰ ਹੋਏ ਅਤੇ ਮੋਹਾਲੀ ਪਹੁੰਚ ਕੇ ਸਾਈਕਲ ਛੱਡ ਦਿੱਤੇ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਵਾਹਨਾਂ ਤੋਂ ਲਿਫਟ ਲੈ ਕੇ ਹਰਿਆਣਾ ਵੱਲ ਰੁਖ਼ ਕੀਤਾ, ਪਰ ਤਕਨੀਕੀ ਮਦਦ ਨਾਲ ਪੁਲਿਸ ਨੇ 130 ਕਿਲੋਮੀਟਰ ਤੱਕ ਉਨ੍ਹਾਂ ਦਾ ਪਿੱਛਾ ਕਰਕੇ ਉਨ੍ਹਾਂ ਨੂੰ ਘੇਰ ਲਿਆ।

ਪਰਿਵਾਰ 'ਚ ਮਾਤਮ, ਮਾਂ ਨੂੰ ਅਜੇ ਵੀ ਨਹੀਂ ਪਤਾ

ਦੂਜੇ ਪਾਸੇ, ਮ੍ਰਿਤਕ ਚਮਨਪ੍ਰੀਤ ਸਿੰਘ ਦਾ ਪੋਸਟਮਾਰਟਮ ਦੋ ਦਿਨ ਬੀਤ ਜਾਣ ਦੇ ਬਾਵਜੂਦ ਅਜੇ ਤੱਕ ਨਹੀਂ ਹੋ ਸਕਿਆ ਹੈ। ਪਰਿਵਾਰ ਅੱਜ ਇਸ ਸਬੰਧੀ ਫੈਸਲਾ ਲਵੇਗਾ। ਦੁਖਦਾਈ ਗੱਲ ਇਹ ਹੈ ਕਿ ਮ੍ਰਿਤਕ ਦੀ ਮਾਂ ਬਹੁਤ ਬਿਮਾਰ ਹੈ, ਜਿਸ ਕਾਰਨ ਪਰਿਵਾਰ ਨੇ ਉਨ੍ਹਾਂ ਨੂੰ ਅਜੇ ਤੱਕ ਪੁੱਤ ਦੀ ਮੌਤ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਹੈ।

ਪੁਲਿਸ ਹੁਣ ਇਸ ਮਾਮਲੇ ਵਿੱਚ ਸ਼ੂਟਰਾਂ ਦੇ ਮਦਦਗਾਰ ਸਾਹਿਲ (ਕੈਥਲ) ਦੀ ਭੂਮਿਕਾ ਦੀ ਵੀ ਜਾਂਚ ਕਰ ਰਹੀ ਹੈ, ਜਿਸ ਨੇ ਉਨ੍ਹਾਂ ਦੇ ਰਹਿਣ ਦਾ ਪ੍ਰਬੰਧ ਕੀਤਾ ਸੀ। ਏਜੀਟੀਐਫ ਦੇ ਐਸਪੀ ਬਿਕਰਮ ਬਰਾੜ ਨੇ ਦੱਸਿਆ ਕਿ ਮੁਕਾਬਲੇ ਦੌਰਾਨ ਦੋਵੇਂ ਸ਼ੂਟਰ ਜ਼ਖਮੀ ਹੋਏ ਹਨ ਅਤੇ ਫਿਲਹਾਲ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਹਨ।