ਜਹਾਜ਼ ਹਾਦਸੇ ਵਿਚ ਮੈਡੀਕਲ ਵਿਦਿਆਰਥੀ ਰੋਟੀ ਖਾਂਦੇ ਮਾਰੇ ਗਏ

ਅਹਿਮਦਾਬਾਦ: ਬੀ.ਜੇ. ਮੈਡੀਕਲ ਕਾਲਜ ਦੇ ਹੋਸਟਲ ਦੀ ਇਮਾਰਤ 'ਤੇ ਜਹਾਜ਼ ਦੇ ਡਿੱਗਣ ਨਾਲ 250 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ। ਇਸ ਘਟਨਾ ਨੇ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ। ਹਾਦਸੇ ਦੇ ਸਮੇਂ 150 ਤੋਂ 200 ਮੈਡੀਕਲ ਵਿਦਿਆਰਥੀ ਮੈੱਸ ਵਿੱਚ ਦੁਪਹਿਰ ਦਾ ਖਾਣਾ ਖਾ ਰਹੇ ਸਨ। ਜਹਾਜ਼ ਦੇ ਡਿੱਗਣ ਸਮੇਂ ਹੋਏ ਤੇਜ਼ ਧਮਾਕੇ ਅਤੇ ਅੱਗ ਨੇ ਹੋਸਟਲ ਨੂੰ ਚੀਰ ਦਿੱਤਾ, ਜਿਸ ਕਾਰਨ ਬਹੁਤ ਸਾਰੇ ਵਿਦਿਆਰਥੀ ਜ਼ਖਮੀ ਹੋ ਗਏ ਅਤੇ ਕਈਆਂ ਦੀ ਮੌਤ ਹੋ ਗਈ।

ਇੱਕ ਜ਼ਖਮੀ ਵਿਦਿਆਰਥੀ ਨੇ ਕਿਹਾ ਕਿ ਉਸਦੇ ਦੋਸਤਾਂ ਦੇ ਖਾਣ-ਪੀਣ ਅਤੇ ਡਾਕਟਰ ਬਣਨ ਦੇ ਸੁਪਨੇ ਅਧੂਰੇ ਰਹਿ ਗਏ। ਮੈਡੀਕਲ ਕਾਲਜ ਦੇ ਹੋਸਟਲ ਮੈੱਸ ਵਿੱਚ ਬੈਠੇ ਇਹਨਾਂ ਵਿਦਿਆਰਥੀਆਂ ਦਾ ਸੁਪਨਾ ਸੀ ਕਿ ਉਹ ਭਵਿੱਖ ਵਿੱਚ ਡਾਕਟਰ ਬਣ ਕੇ ਲੋਕਾਂ ਦੀਆਂ ਜਾਨਾਂ ਬਚਾਉਣਗੇ, ਪਰ ਉਹਨਾਂ ਨੂੰ ਨਹੀਂ ਪਤਾ ਸੀ ਕਿ ਇੱਕ ਹਾਦਸਾ ਉਹਨਾਂ ਲਈ ਆਪਣੀ ਜਾਨ ਬਚਾਉਣੀ ਵੀ ਮੁਸ਼ਕਲ ਬਣਾ ਦੇਵੇਗਾ।

ਚਸ਼ਮਦੀਦਾਂ ਦੇ ਅਨੁਸਾਰ, ਜਹਾਜ਼ ਦੇ ਹੋਸਟਲ ਦੀ ਇਮਾਰਤ 'ਤੇ ਡਿੱਗਣ ਤੋਂ ਬਾਅਦ ਇੱਕ ਵੱਡਾ ਧਮਾਕਾ ਹੋਇਆ ਅਤੇ ਉੱਥੇ ਅੱਗ ਲੱਗ ਗਈ। ਇੱਕ ਮੈਡੀਕਲ ਇੰਟਰਨ ਰੋਹਨ ਬਾਗੜੇ ਨੇ ਦੱਸਿਆ ਕਿ ਉਹ ਦੁਪਹਿਰ ਦਾ ਖਾਣਾ ਖਾਣ ਤੋਂ ਬਾਅਦ ਹੀ ਮੈੱਸ ਤੋਂ ਬਾਹਰ ਆਇਆ ਸੀ, ਨਹੀਂ ਤਾਂ ਉਹ ਵੀ ਇਸ ਹਾਦਸੇ ਦਾ ਸ਼ਿਕਾਰ ਹੋ ਸਕਦਾ ਸੀ।

ਡਾਕਟਰ ਕੇਯੂਰ ਪ੍ਰਜਾਪਤੀ ਨੇ ਕਿਹਾ ਕਿ ਹੋਸਟਲ ਧੂੰਏਂ ਨਾਲ ਭਰਿਆ ਹੋਇਆ ਸੀ। ਉਨ੍ਹਾਂ ਨੇ ਪਹਿਲਾਂ ਡਾਕਟਰ ਦੇ ਕੁਆਰਟਰ ਵਿੱਚੋਂ ਇੱਕ 27 ਸਾਲਾ ਔਰਤ ਨੂੰ ਬਾਹਰ ਕੱਢਿਆ ਜੋ ਸੜ ਗਈ ਸੀ, ਪਰ ਉਸਦੀ ਐਂਬੂਲੈਂਸ ਵਿੱਚ ਹੀ ਮੌਤ ਹੋ ਗਈ।

ਇੱਕ ਹੋਰ ਰੈਜ਼ੀਡੈਂਟ ਡਾਕਟਰ ਆਯੂਸ਼ ਨੇ ਕਿਹਾ ਕਿ ਮੈੱਸ ਵਿੱਚ ਹਰ ਪਾਸੇ ਹਫੜਾ-ਦਫੜੀ ਸੀ। ਉਨ੍ਹਾਂ ਦੇ ਕਈ ਜੂਨੀਅਰ ਅਤੇ ਦੋਸਤ ਹਾਦਸੇ ਵਿੱਚ ਗੰਭੀਰ ਜ਼ਖਮੀ ਹੋ ਗਏ ਹਨ ਅਤੇ ਹਸਪਤਾਲ ਵਿੱਚ ਇਲਾਜ ਅਧੀਨ ਹਨ।

ਸਰਕਾਰੀ ਹਸਪਤਾਲ ਪਹੁੰਚੀ ਰਮੀਲਾ ਨੇ ਦੱਸਿਆ ਕਿ ਹਾਦਸੇ ਸਮੇਂ ਉਸਦਾ ਪੁੱਤਰ ਮੈਡੀਕਲ ਕਾਲਜ ਦੀ ਮੈੱਸ ਵਿੱਚ ਖਾਣਾ ਖਾਣ ਲਈ ਸੀ। ਆਪਣੀ ਜਾਨ ਬਚਾਉਣ ਲਈ ਉਸਨੇ ਹੋਸਟਲ ਦੀ ਦੂਜੀ ਮੰਜ਼ਿਲ ਤੋਂ ਛਾਲ ਮਾਰ ਦਿੱਤੀ, ਜਿਸ ਕਾਰਨ ਉਹ ਗੰਭੀਰ ਜ਼ਖਮੀ ਹੋ ਗਿਆ।

ਇਸ ਹਾਦਸੇ ਨੇ ਮੈਡੀਕਲ ਵਿਦਿਆਰਥੀਆਂ ਦੇ ਸੁਪਨਿਆਂ ਅਤੇ ਖਾਣ-ਪੀਣ ਦੇ ਪਲਾਂ ਨੂੰ ਅਧੂਰਾ ਛੱਡ ਦਿੱਤਾ ਅਤੇ ਅਜਿਹੇ ਜ਼ਖ਼ਮ ਦਿੱਤੇ ਜੋ ਕਦੇ ਨਹੀਂ ਭਰਣਗੇ.