“Global Soft Power Index ਰਿਪੋਰਟ ਵਿੱਚ ਭਾਰਤ ਟਾਪ 10 ਵਿੱਚੋਂ ਬਾਹਰ”

ਲੰਡਨ, 2 ਅਪ੍ਰੈਲ : ‘ਬ੍ਰੈਂਡ ਫਾਇਨੈਂਸ ਗਲੋਬਲ ਸੌਫਟ ਪਾਵਰ ਇੰਡੈਕਸ 2026’ ਨੇ ਦੇਸ਼ਾਂ ਨੂੰ ਸੌਫਟ ਪਾਵਰ ਦੇ ਆਧਾਰ ‘ਤੇ ਰੈਂਕ ਕੀਤਾ ਹੈ। ਭਾਰਤ ਅਤੇ ਏਸ਼ੀਆ ਦੀਆਂ ਹੋਰ ਉਭਰਦੀਆਂ ਅਰਥਵਿਵਸਥਾਵਾਂ ਮੱਧ-ਪੱਧਰੀ ਰੈਂਕਿੰਗ ਵਿੱਚ ਆਉਂਦੀਆਂ ਹਨ। ਹਾਲਾਂਕਿ ਇਹ ਟਾਪ 10 ਵਿੱਚ ਸ਼ਾਮਲ ਨਹੀਂ ਹਨ, ਪਰ ਇਹ ਵੱਧਦੇ ਖੇਤਰੀ ਪ੍ਰਭਾਵ ਅਤੇ ਵੱਧਦੀ ਗਲੋਬਲ ਪਹਿਚਾਣ ਨੂੰ ਦਰਸਾਉਂਦੀਆਂ ਹਨ। ਇਸ ਸੂਚੀ ਤੋਂ ਪਤਾ ਲੱਗਦਾ ਹੈ ਕਿ ਜਿੱਥੇ ਪੱਛਮੀ ਦੇਸ਼ਾਂ ਦੀ ਮਜ਼ਬੂਤ ਸਥਿਤੀ ਬਨੀ ਹੋਈ ਹੈ, ਉੱਥੇ ਏਸ਼ੀਆਈ ਦੇਸ਼ਾਂ ਨੇ ਵੀ ਆਪਣੀ ਸਥਿਤੀ ਵਿੱਚ ਵਾਧਾ ਕੀਤਾ ਹੈ। ਏਸ਼ੀਆਈ ਦੇਸ਼ ਹੁਣ ਤੇਜ਼ੀ ਨਾਲ ਗਲੋਬਲ ਪ੍ਰਭਾਵ ਦਾ ਵਿਸਥਾਰ ਕਰ ਰਹੇ ਹਨ।

ਸੌਫਟ ਪਾਵਰ ਕੀ ਹੈ?

ਅੱਜ ਦੇ ਯੁੱਗ ਵਿੱਚ ਗਲੋਬਲ ਤਾਕਤ ਸਿਰਫ ਸੈਨਿਕ ਤਾਕਤ ਜਾਂ ਦੇਸ਼ ਦੇ ਆਕਾਰ ਨਾਲ ਨਹੀਂ ਨਿਰਧਾਰਿਤ ਹੁੰਦੀ। ਹੁਣ ਸੱਭਿਆਚਾਰ, ਰਾਜਨੀਤੀ, ਤਕਨੀਕੀ ਨਵੀਨਤਾ ਅਤੇ ਅੰਤਰਰਾਸ਼ਟਰੀ ਸਨਮਾਨ ਵਰਗੇ ਕਾਰਕ ਕਿਸੇ ਦੇਸ਼ ਦੀ ਤਾਕਤ ਨੂੰ ਪਰਿਭਾਸ਼ਿਤ ਕਰਦੇ ਹਨ, ਜਿਨ੍ਹਾਂ ਨੂੰ ‘ਸੌਫਟ ਪਾਵਰ’ ਕਿਹਾ ਜਾਂਦਾ ਹੈ। ਸੌਫਟ ਪਾਵਰ ਉਹ ਸਮਰੱਥਾ ਹੈ, ਜਿਸਦੇ ਜ਼ਰੀਏ ਕੋਈ ਦੇਸ਼ ਬਿਨਾਂ ਬਲ ਵਰਤੋਂ ਦੇ ਦੁਨੀਆ ਦੀ ਸੋਚ ਅਤੇ ਧਾਰਣਾਵਾਂ ਨੂੰ ਪ੍ਰਭਾਵਿਤ ਕਰਦਾ ਹੈ। ਇਸ ਵਿੱਚ ਸੱਭਿਆਚਾਰਕ ਪ੍ਰਭਾਵ, ਰਾਜਨੀਤਕ ਸੰਬੰਧ, ਆਰਥਿਕ ਸਹਿਯੋਗ ਅਤੇ ਨਵੀਨਤਾ ਵਿੱਚ ਆਗੂਪਨ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ।

ਬ੍ਰੈਂਡ ਫਾਇਨੈਂਸ ਦੀ ਰਿਪੋਰਟ ਵਿੱਚ ਵੱਡਾ ਖੁਲਾਸਾ

‘ਬ੍ਰੈਂਡ ਫਾਇਨੈਂਸ ਗਲੋਬਲ ਸੌਫਟ ਪਾਵਰ ਇੰਡੈਕਸ 2026’ ਵਿੱਚ ਸੰਯੁਕਤ ਰਾਸ਼ਟਰ ਦੇ 193 ਮੈਂਬਰ ਦੇਸ਼ਾਂ ਦਾ ਮੁਲਾਂਕਣ ਕੀਤਾ ਗਿਆ ਹੈ। ਇਸ ਰਿਪੋਰਟ ਵਿੱਚ ਦੇਸ਼ਾਂ ਦੀ ਪਹਿਚਾਣ, ਸਨਮਾਨ ਅਤੇ ਗਲੋਬਲ ਪ੍ਰਭਾਵ ਨੂੰ ਵੱਖ-ਵੱਖ ਮਾਪਦੰਡਾਂ ‘ਤੇ ਪਰਖਿਆ ਗਿਆ ਹੈ। ਰਿਪੋਰਟ ਦੇ ਅਨੁਸਾਰ, ਪੱਛਮੀ ਦੇਸ਼ਾਂ ਦਾ ਪ੍ਰਭਾਵ ਹਾਲੇ ਵੀ ਮਜ਼ਬੂਤ ਹੈ। ਹਾਲਾਂਕਿ, ਏਸ਼ੀਆਈ ਦੇਸ਼ਾਂ ਨੇ ਵੀ ਤੇਜ਼ੀ ਨਾਲ ਆਪਣੀ ਸਥਿਤੀ ਮਜ਼ਬੂਤ ਕੀਤੀ ਹੈ ਅਤੇ ਗਲੋਬਲ ਮੰਚ ‘ਤੇ ਪ੍ਰਭਾਵ ਵਧਾਇਆ ਹੈ।

ਏਸ਼ੀਆਈ ਦੇਸ਼ਾਂ ਦੀ ਵੱਧਦੀ ਤਾਕਤ

ਚੀਨ, ਜਪਾਨ ਅਤੇ ਸੰਯੁਕਤ ਅਰਬ ਅਮੀਰਾਤ ਵਰਗੇ ਦੇਸ਼ਾਂ ਨੇ ਆਪਣੀ ਰਾਜਨੀਤੀ, ਤਕਨੀਕ ਅਤੇ ਆਰਥਿਕ ਨੀਤੀਆਂ ਦੇ ਜ਼ਰੀਏ ਦੁਨੀਆ ਵਿੱਚ ਆਪਣੀ ਮਜ਼ਬੂਤ ਪਹਿਚਾਣ ਬਣਾਈ ਹੈ। ਬ੍ਰੈਂਡ ਫਾਇਨੈਂਸ ਗਲੋਬਲ ਸੌਫਟ ਪਾਵਰ ਇੰਡੈਕਸ 2026 ਦੇ ਅਨੁਸਾਰ ਟਾਪ 10 ਦੇਸ਼ ਇਸ ਤਰ੍ਹਾਂ ਹਨ: ਅਮਰੀਕਾ, ਚੀਨ, ਜਪਾਨ, ਯੂਨਾਈਟਡ ਕਿੰਗਡਮ (ਯੂਕੇ), ਜਰਮਨੀ, ਫਰਾਂਸ, ਸਵਿਟਜ਼ਰਲੈਂਡ, ਕੈਨੇਡਾ, ਇਟਲੀ, ਸੰਯੁਕਤ ਅਰਬ ਅਮੀਰਾਤ।