ਅਫਗਾਨਿਸਤਾਨ ’ਚ ਭੂਚਾਲ: ਦਿੱਲੀ-ਉੱਤਰੀ ਭਾਰਤ ਦੇ ਕਈ ਹਿੱਸਿਆਂ ਵਿੱਚ ਝਟਕੇ

ਕਾਬੁਲ/ਦਿੱਲੀ : ਅਫਗਾਨਿਸਤਾਨ ਦੇ ਹਿੰਦੂਕੁਸ਼ ਖੇਤਰ ਵਿੱਚ ਬੁੱਧਵਾਰ ਸਵੇਰੇ 5.6 ਤੀਬਰਤਾ ਦਾ ਭੂਚਾਲ ਆਇਆ। ਇਹ ਝਟਕੇ ਸਵੇਰੇ 4:44 ਵਜੇ ਮਹਿਸੂਸ ਕੀਤੇ ਗਏ ਅਤੇ ਦਿੱਲੀ-ਐਨਸੀਆਰ, ਉੱਤਰ ਪ੍ਰਦੇਸ਼, ਹਰਿਆਣਾ, ਪੰਜਾਬ, ਰਾਜਸਥਾਨ ਅਤੇ ਜੰਮੂ-ਕਸ਼ਮੀਰ ਤੱਕ ਪਹੁੰਚ ਗਏ।

ਯੂਰਪੀਅਨ-ਮੈਡੀਟੇਰੀਅਨ ਸੀਸਮੌਲੋਜੀਕਲ ਸੈਂਟਰ (EMSC) ਮੁਤਾਬਕ, ਭੂਚਾਲ ਦੀ ਡੂੰਘਾਈ 121 ਕਿਲੋਮੀਟਰ ਸੀ ਅਤੇ ਕੇਂਦਰ ਬਗਲਾਨ ਸ਼ਹਿਰ ਤੋਂ 164 ਕਿਲੋਮੀਟਰ ਪੂਰਬ ਵਿੱਚ ਸੀ। ਨੈਸ਼ਨਲ ਸੈਂਟਰ ਫਾਰ ਸੀਸਮੋਲੋਜੀ (NCS) ਨੇ ਭੂਚਾਲ ਦੀ ਪੁਸ਼ਟੀ ਕੀਤੀ ਹੈ।

ਕੋਈ ਜਾਨ-ਮਾਲ ਦਾ ਨੁਕਸਾਨ ਨਹੀਂ

ਇਸ ਭੂਚਾਲ ਨਾਲ ਭਾਰਤ ਜਾਂ ਅਫਗਾਨਿਸਤਾਨ ਵਿੱਚ ਕਿਸੇ ਵੱਡੇ ਨੁਕਸਾਨ ਦੀ ਰਿਪੋਰਟ ਨਹੀਂ ਹੈ। ਹਾਲਾਂਕਿ, ਭੂਚਾਲ ਦੇ ਝਟਕੇ ਕਰਕੇ ਲੋਕਾਂ ਵਿੱਚ ਡਰ ਦਾ ਮਾਹੌਲ ਬਣ ਗਿਆ। ਕਈ ਲੋਕ ਰਾਤੀਂ ਹੀ ਘਰਾਂ ਤੋਂ ਬਾਹਰ ਨਿਕਲ ਆਏ।

ਭੂਚਾਲ ਦੌਰਾਨ ਕੀ ਕਰੀਏ?

ਮਾਹਿਰਾਂ ਨੇ ਲੋਕਾਂ ਨੂੰ ਸੁਚੇਤ ਰਹਿਣ ਅਤੇ ਸਾਵਧਾਨੀਆਂ ਵਰਤਣ ਦੀ ਸਲਾਹ ਦਿੱਤੀ ਹੈ:

ਖੁੱਲ੍ਹੀ ਜਗ੍ਹਾ ਵੱਲ ਜਾਓ

ਭਾਰੀ ਵਸਤੂਆਂ ਤੋਂ ਦੂਰ ਰਹੋ

ਇਮਾਰਤਾਂ ਦੀ ਢਾਂਚਾਗਤ ਮਜ਼ਬੂਤੀ ਦੀ ਜਾਂਚ ਕਰਵਾਓ

ਹਿੰਦੂਕੁਸ਼ ਖੇਤਰ: ਭੂਚਾਲ ਪੱਖੋਂ ਸਰਗਰਮ ਇਲਾਕਾ

ਹਿੰਦੂਕੁਸ਼ ਖੇਤਰ ਭਾਰਤੀ ਅਤੇ ਯੂਰੇਸ਼ੀਅਨ ਟੈਕਟੋਨਿਕ ਪਲੇਟਾਂ ਦੇ ਸੰਧੀ ਸਥਾਨ ਉੱਤੇ ਸਥਿਤ ਹੈ, ਜਿਸ ਕਾਰਨ ਇੱਥੇ ਭੂਚਾਲ ਆਉਣਾ ਆਮ ਗੱਲ ਹੈ। ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਇੱਥੇ ਆਇਆ ਭੂਚਾਲ ਭਾਰਤ ਵਿੱਚ ਮਹਿਸੂਸ ਕੀਤਾ ਗਿਆ ਹੋਵੇ।

ਭਾਰਤ ਵਿੱਚ ਭੂਚਾਲ ਕਿਉਂ ਮਹਿਸੂਸ ਹੁੰਦੇ ਹਨ?

ਦਿੱਲੀ ਅਤੇ ਉੱਤਰੀ ਭਾਰਤ ਹਿਮਾਲੀਆ ਖੇਤਰ ਦੇ ਨੇੜੇ ਹੋਣ ਕਰਕੇ ਭੂਚਾਲ ਦੀ ਸੰਵੇਦਣਸ਼ੀਲ ਜ਼ੋਨ ਵਿੱਚ ਪੈਂਦੇ ਹਨ। ਦਿੱਲੀ ਭੂਚਾਲੀ ਨਕਸ਼ੇ ਅਨੁਸਾਰ Zone IV ਵਿੱਚ ਆਉਂਦੀ ਹੈ, ਜੋ ਮੋਡਰੇਟ-ਟੂ-ਹਾਈ ਰਿਸਕ ਜ਼ੋਨ ਹੈ।

ਭੂਚਾਲਾਂ ਦਾ ਇਤਿਹਾਸ:

ਮਾਰਚ 2023: 6.6 ਤੀਬਰਤਾ ਦਾ ਭੂਚਾਲ (ਦਿੱਲੀ-ਐਨਸੀਆਰ ਤੱਕ ਝਟਕੇ)

ਜਨਵਰੀ 2024: 6.1 ਤੀਬਰਤਾ (ਦਿੱਲੀ ਵਿੱਚ ਹਲਕਾ ਭੂਚਾਲ)