ਅਮਰੀਕਾ 'ਚ ਹੈਲੇਨ ਤੂਫਾਨ ਦੀ ਤਬਾਹੀ, 33 ਮੌਤਾਂ, 1.20 ਕਰੋੜ ਲੋਕ ਬੇਘਰ

ਫਲੋਰੀਡਾ: ਚੱਕਰਵਾਤੀ ਤੂਫਾਨ ਹੇਲੇਨ ਅਮਰੀਕਾ ਵਿੱਚ ਤਬਾਹੀ ਮਚਾ ਰਿਹਾ ਹੈ। ਦੇਸ਼ ਦੇ ਕਰੀਬ 15 ਸੂਬੇ ਇਸ ਤੂਫਾਨ ਦੀ ਲਪੇਟ 'ਚ ਹਨ। 2 ਦਿਨਾਂ 'ਚ ਇਸ ਤੂਫਾਨ ਕਾਰਨ 33 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਕਰੀਬ 1.25 ਕਰੋੜ ਲੋਕ ਬੇਘਰ ਹੋ ਗਏ ਹਨ। 5000 ਤੋਂ ਵੱਧ ਉਡਾਣਾਂ ਪ੍ਰਭਾਵਿਤ ਹੋਈਆਂ ਹਨ। 1000 ਤੋਂ ਵੱਧ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਲੋਕਾਂ ਦੇ ਘਰਾਂ ਵਿੱਚ ਪਾਣੀ ਭਰ ਗਿਆ ਹੈ, ਜਿਸ ਕਾਰਨ ਉਹ ਹਿਜਰਤ ਕਰਨ ਲਈ ਮਜਬੂਰ ਹਨ।

ਸਰਕਾਰ ਨੇ ਫਲੋਰੀਡਾ, ਜਾਰਜੀਆ, ਉੱਤਰੀ ਕੈਰੋਲੀਨਾ, ਦੱਖਣੀ ਕੈਰੋਲੀਨਾ, ਵਰਜੀਨੀਆ ਅਤੇ ਅਲਬਾਮਾ ਵਿੱਚ ਰੈੱਡ ਅਲਰਟ ਅਤੇ ਐਮਰਜੈਂਸੀ ਦਾ ਐਲਾਨ ਕੀਤਾ ਹੈ। 200 ਤੋਂ 250 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਚੱਲ ਰਹੀਆਂ ਤੂਫਾਨੀ ਹਵਾਵਾਂ ਕਾਫੀ ਤਬਾਹੀ ਮਚਾ ਰਹੀਆਂ ਹਨ। ਕਈ ਥਾਵਾਂ 'ਤੇ ਦਰੱਖਤ ਉੱਖੜ ਗਏ ਹਨ, ਬਿਜਲੀ ਦੀਆਂ ਤਾਰਾਂ ਟੁੱਟ ਗਈਆਂ ਹਨ ਅਤੇ 10 ਲੱਖ ਤੋਂ ਵੱਧ ਘਰ ਅਤੇ ਦਫ਼ਤਰ ਹਨੇਰੇ ਵਿਚ ਡੁੱਬੇ ਹੋਏ ਹਨ। ਫਲੋਰੀਡਾ ਵਿੱਚ 7, ਜਾਰਜੀਆ ਵਿੱਚ 11, ਦੱਖਣੀ ਕੈਰੋਲੀਨਾ ਵਿੱਚ 2 ਫਾਇਰ ਕਰਮੀਆਂ ਸਮੇਤ 14 ਲੋਕਾਂ ਦੀ ਮੌਤ ਹੋ ਗਈ ਹੈ। ਕਈ ਇਲਾਕਿਆਂ ਵਿਚ ਸੜਕਾਂ ਅਤੇ ਘਰ ਪੂਰੀ ਤਰ੍ਹਾਂ ਪਾਣੀ ਵਿਚ ਡੁੱਬ ਗਏ ਹਨ।

ਰਿਪੋਰਟ ਮੁਤਾਬਕ ਫਲੋਰੀਡਾ ਦੀ ਰਾਜਧਾਨੀ ਟਾਲਾਹਾਸੀ 'ਚ ਆਇਆ ਤੂਫਾਨ ਰਾਤ ਨੂੰ ਉੱਤਰ ਵੱਲ ਵਧਿਆ, ਜਿਸ ਕਾਰਨ ਸੜਕਾਂ, ਘਰ ਅਤੇ ਦਫਤਰ ਪਾਣੀ 'ਚ ਡੁੱਬ ਗਏ। ਬਿਜਲੀ ਬੰਦ ਹੋ ਗਈ। ਤੂਫਾਨੀ ਹਵਾਵਾਂ ਨਾਲ ਭਾਰੀ ਮੀਂਹ ਪੈ ਰਿਹਾ ਹੈ। ਮਿਆਮੀ ਸਥਿਤ ਨੈਸ਼ਨਲ ਹਰੀਕੇਨ ਸੈਂਟਰ ਦੀ ਚੇਤਾਵਨੀ ਦੇ ਅਨੁਸਾਰ, ਜਾਰਜੀਆ ਦੇ ਸਭ ਤੋਂ ਵੱਡੇ ਸ਼ਹਿਰ ਅਟਲਾਂਟਾ ਦੇ ਨਾਲ-ਨਾਲ ਦੱਖਣੀ ਅਤੇ ਉੱਤਰੀ ਕੈਰੋਲੀਨਾ ਵਿੱਚ ਅਚਾਨਕ ਹੜ੍ਹ ਆ ਸਕਦੇ ਹਨ। ਐਪਲਾਚੀਅਨ ਪਹਾੜਾਂ ਵਿੱਚ 12 ਇੰਚ (30 ਸੈਂਟੀਮੀਟਰ) ਤੱਕ ਮੀਂਹ ਪੈਣ ਦੀ ਸੰਭਾਵਨਾ ਹੈ।

ਕੁਝ ਥਾਵਾਂ 'ਤੇ 20 ਇੰਚ ਤੱਕ ਮੀਂਹ ਪੈ ਸਕਦਾ ਹੈ। ਜਾਰਜੀਆ ਦੇ ਗਵਰਨਰ ਬ੍ਰਾਇਨ ਕੇਮਪ ਨੇ ਕਿਹਾ ਕਿ ਉਨ੍ਹਾਂ ਦੇ ਰਾਜ ਦੇ ਵਾਲਦੋਸਤਾ ਸ਼ਹਿਰ ਦੀਆਂ 115 ਇਮਾਰਤਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਹਨ। 140 ਮੀਲ (225 ਕਿਲੋਮੀਟਰ) ਪ੍ਰਤੀ ਘੰਟਾ ਦੀ ਰਫ਼ਤਾਰ ਵਾਲੀਆਂ ਹਵਾਵਾਂ ਪੈਰੀ ਦੇ ਤੱਟ 'ਤੇ ਪਹੁੰਚ ਗਈਆਂ, ਜਿੱਥੇ ਘਰਾਂ ਦੀ ਬਿਜਲੀ ਬੰਦ ਹੋ ਗਈ ਅਤੇ ਇੱਕ ਗੈਸ ਸਟੇਸ਼ਨ ਢਹਿ ਗਿਆ। ਦੇਸ਼ ਦੀ ਜੋ ਬਿਡੇਨ ਸਰਕਾਰ ਨੇ ਐਮਰਜੈਂਸੀ ਦਾ ਐਲਾਨ ਕਰ ਦਿੱਤਾ ਹੈ ਅਤੇ ਤੂਫਾਨ ਤੋਂ ਪ੍ਰਭਾਵਿਤ ਸਾਰੇ ਰਾਜਾਂ ਵਿੱਚ ਵੱਡੇ ਪੱਧਰ 'ਤੇ ਬਚਾਅ ਕਾਰਜ ਚਲਾਉਣ ਦੇ ਆਦੇਸ਼ ਜਾਰੀ ਕੀਤੇ ਹਨ।