ਨਿਮਿਸ਼ਾ ਪ੍ਰਿਆ ਲਈ ਫਾਂਸੀ ਦੀ ਨਵੀਂ ਤਾਰੀਖ ਦੀ ਮੰਗ, ਬਲੱਡ ਮਨੀ ਤੋਂ ਇਨਕਾਰ
ਉਸਦੇ ਭਰਾ ਅਬਦੁਲ ਫਤਿਹ ਨੇ ਯਮਨੀ ਅਦਾਲਤ ਨੂੰ ਇੱਕ ਪੱਤਰ ਲਿਖ ਕੇ ਫਾਂਸੀ ਦੀ ਸਜ਼ਾ ਨੂੰ ਜਲਦੀ ਤੋਂ ਜਲਦੀ ਲਾਗੂ ਕਰਨ ਦੀ ਮੰਗ ਕੀਤੀ ਹੈ।
ਯਮਨ ਵਿੱਚ ਭਾਰਤੀ ਨਾਗਰਿਕ ਨਿਮਿਸ਼ਾ ਪ੍ਰਿਆ ਨੂੰ ਫਾਂਸੀ ਦੇਣ ਲਈ ਇੱਕ ਵਾਰ ਫਿਰ ਤੋਂ ਮੰਗ ਤੇਜ਼ ਹੋ ਗਈ ਹੈ। ਜਿਸ ਯਮਨੀ ਨਾਗਰਿਕ ਤਲਾਲ ਅਬਦੋ ਮਹਿਦੀ ਦੇ ਕਤਲ ਦੇ ਦੋਸ਼ ਵਿੱਚ ਨਿਮਿਸ਼ਾ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ ਹੈ, ਉਸਦੇ ਭਰਾ ਅਬਦੁਲ ਫਤਿਹ ਨੇ ਯਮਨੀ ਅਦਾਲਤ ਨੂੰ ਇੱਕ ਪੱਤਰ ਲਿਖ ਕੇ ਫਾਂਸੀ ਦੀ ਸਜ਼ਾ ਨੂੰ ਜਲਦੀ ਤੋਂ ਜਲਦੀ ਲਾਗੂ ਕਰਨ ਦੀ ਮੰਗ ਕੀਤੀ ਹੈ।
ਤਲਾਲ ਦੇ ਪਰਿਵਾਰ ਦਾ ਰੁਖ਼
ਪੱਤਰ ਵਿੱਚ ਫਤਿਹ ਨੇ ਸਪੱਸ਼ਟ ਕੀਤਾ ਹੈ ਕਿ ਉਨ੍ਹਾਂ ਦਾ ਪਰਿਵਾਰ ਕਿਸੇ ਵੀ ਤਰ੍ਹਾਂ ਦੇ ਸਮਝੌਤੇ ਜਾਂ ਬਲੱਡ ਮਨੀ (ਖੂਨ-ਮੁਆਵਜ਼ੇ) ਲਈ ਤਿਆਰ ਨਹੀਂ ਹੈ।
ਉਸਨੇ ਕਿਹਾ ਕਿ ਤਲਾਲ ਦਾ ਖੂਨ ਕਿਸੇ ਸੌਦੇਬਾਜ਼ੀ ਦੀ ਵਸਤੂ ਨਹੀਂ ਹੈ ਅਤੇ ਭਾਰਤੀ ਮੀਡੀਆ ਵਿੱਚ ਚੱਲ ਰਹੀਆਂ ਸਮਝੌਤੇ ਦੀਆਂ ਖਬਰਾਂ ਗਲਤ ਹਨ।
ਫਤਿਹ ਨੇ ਯਮਨ ਦੇ ਅਟਾਰਨੀ ਜਨਰਲ ਜੱਜ ਅਬਦੁਲ ਸਲਾਮ ਅਲ ਹੋਥੀ ਨੂੰ ਲਿਖੇ ਪੱਤਰ ਵਿੱਚ ਨਿਮਿਸ਼ਾ ਦੀ ਫਾਂਸੀ ਲਈ ਨਵੀਂ ਤਾਰੀਖ ਤੈਅ ਕਰਨ ਦੀ ਅਪੀਲ ਕੀਤੀ ਹੈ।
ਘਟਨਾ ਦਾ ਪਿਛੋਕੜ
ਨਿਮਿਸ਼ਾ ਪ੍ਰਿਆ ਨੂੰ 2018 ਵਿੱਚ ਤਲਾਲ ਅਬਦੋ ਮਹਿਦੀ ਦੇ ਕਤਲ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਦੋਸ਼ਾਂ ਅਨੁਸਾਰ, ਨਿਮਿਸ਼ਾ ਨੇ ਕਲੀਨਿਕ ਖੋਲ੍ਹਣ ਲਈ ਤਲਾਲ ਨਾਲ ਸਾਂਝੇਦਾਰੀ ਕੀਤੀ ਸੀ। ਬਾਅਦ ਵਿੱਚ ਰਿਸ਼ਤਿਆਂ ਵਿੱਚ ਤਣਾਅ ਆ ਗਿਆ ਅਤੇ ਤਲਾਲ ਨੇ ਉਸਦਾ ਪਾਸਪੋਰਟ ਰੋਕ ਲਿਆ। ਨਿਮਿਸ਼ਾ ਨੇ ਉਸ ਤੋਂ ਆਪਣਾ ਪਾਸਪੋਰਟ ਵਾਪਸ ਲੈਣ ਲਈ ਉਸਨੂੰ ਬੇਹੋਸ਼ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਜ਼ਿਆਦਾ ਖੁਰਾਕ ਕਾਰਨ ਤਲਾਲ ਦੀ ਮੌਤ ਹੋ ਗਈ। ਪਹਿਲਾਂ ਫਾਂਸੀ ਦੀ ਤਰੀਕ 16 ਜੁਲਾਈ ਨੂੰ ਤੈਅ ਕੀਤੀ ਗਈ ਸੀ, ਪਰ ਬਾਅਦ ਵਿੱਚ ਇਸਨੂੰ ਮੁਲਤਵੀ ਕਰ ਦਿੱਤਾ ਗਿਆ ਸੀ।