Countdown to war? ਅਮਰੀਕੀ 'ਅਬ੍ਰਾਹਮ ਲਿੰਕਨ' ਨੇ ਈਰਾਨ ਨੂੰ ਘੇਰਿਆ
ਮਹਿਜ਼ 10 ਦਿਨਾਂ ਵਿੱਚ ਮੱਧ ਪੂਰਬ ਪਹੁੰਚਿਆ ਹੈ, ਜਿਸ ਨੇ ਈਰਾਨ ਦੇ ਅੰਦਰੂਨੀ ਟੀਚਿਆਂ 'ਤੇ ਸਿੱਧਾ ਹਮਲਾ ਕਰਨ ਲਈ ਆਪਣੀ ਸਥਿਤੀ ਮਜ਼ਬੂਤ ਕਰ ਲਈ ਹੈ।
ਤਹਿਰਾਨ ਵੱਲੋਂ ਸਖ਼ਤ ਚੇਤਾਵਨੀ
ਮੱਧ ਪੂਰਬ ਵਿੱਚ ਤਣਾਅ ਆਪਣੇ ਸਿਖਰ 'ਤੇ ਪਹੁੰਚ ਗਿਆ ਹੈ ਕਿਉਂਕਿ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਆਦੇਸ਼ਾਂ ਤੋਂ ਬਾਅਦ ਅਮਰੀਕੀ ਜਲ ਸੈਨਾ ਦਾ ਸ਼ਕਤੀਸ਼ਾਲੀ ਜਹਾਜ਼ ਵਾਹਕ, ਯੂਐਸਐਸ ਅਬ੍ਰਾਹਮ ਲਿੰਕਨ, ਆਪਣੇ ਵਿਨਾਸ਼ਕਾਂ ਦੇ ਬੇੜੇ ਸਮੇਤ ਈਰਾਨ ਦੀਆਂ ਬਰੂਹਾਂ 'ਤੇ ਤਾਇਨਾਤ ਹੋ ਗਿਆ ਹੈ। ਦੱਖਣੀ ਚੀਨ ਸਾਗਰ ਤੋਂ ਰਵਾਨਾ ਹੋਣ ਤੋਂ ਬਾਅਦ ਇਹ ਜਹਾਜ਼ ਮਹਿਜ਼ 10 ਦਿਨਾਂ ਵਿੱਚ ਮੱਧ ਪੂਰਬ ਪਹੁੰਚਿਆ ਹੈ, ਜਿਸ ਨੇ ਈਰਾਨ ਦੇ ਅੰਦਰੂਨੀ ਟੀਚਿਆਂ 'ਤੇ ਸਿੱਧਾ ਹਮਲਾ ਕਰਨ ਲਈ ਆਪਣੀ ਸਥਿਤੀ ਮਜ਼ਬੂਤ ਕਰ ਲਈ ਹੈ।
ਯੂਐਸਐਸ ਅਬ੍ਰਾਹਮ ਲਿੰਕਨ ਇੱਕ ਤੈਰਦੇ ਹੋਏ ਕਿਲੇ ਵਾਂਗ ਹੈ, ਜੋ ਗਾਈਡਡ ਮਿਜ਼ਾਈਲ ਵਿਨਾਸ਼ਕਾਂ, ਸਟੀਲਥ ਲੜਾਕੂ ਜਹਾਜ਼ਾਂ ਅਤੇ ਸੀਹਾਕ ਹੈਲੀਕਾਪਟਰਾਂ ਨਾਲ ਲੈਸ ਹੈ। ਇਸ ਤੋਂ ਛੱਡੀਆਂ ਜਾਣ ਵਾਲੀਆਂ ਟੋਮਾਹਾਕ ਕਰੂਜ਼ ਮਿਜ਼ਾਈਲਾਂ ਈਰਾਨ ਦੇ ਕਿਸੇ ਵੀ ਹਿੱਸੇ ਨੂੰ ਨਿਸ਼ਾਨਾ ਬਣਾ ਸਕਦੀਆਂ ਹਨ। ਇਸ ਹਵਾਈ ਸ਼ਕਤੀ ਨੂੰ ਹੋਰ ਮਜ਼ਬੂਤ ਕਰਨ ਲਈ ਅਮਰੀਕਾ ਨੇ ਜਾਰਡਨ ਵਿੱਚ ਐਫ-15ਈ ਸਟ੍ਰਾਈਕ ਈਗਲਜ਼ ਅਤੇ ਕਤਰ ਵਿੱਚ ਘਾਤਕ ਬੀ-52 ਬੰਬਾਰ ਤਾਇਨਾਤ ਕੀਤੇ ਹਨ।
ਸੰਭਾਵੀ ਈਰਾਨੀ ਜਵਾਬੀ ਹਮਲੇ ਤੋਂ ਬਚਣ ਲਈ ਅਮਰੀਕਾ ਨੇ ਇੱਕ ਅਭੇਦ ਸੁਰੱਖਿਆ ਢਾਲ ਵੀ ਤਿਆਰ ਕੀਤੀ ਹੈ। ਖਾੜੀ ਦੇਸ਼ਾਂ ਜਿਵੇਂ ਕਿ ਕੁਵੈਤ, ਸਾਊਦੀ ਅਰਬ, ਕਤਰ ਅਤੇ ਇਜ਼ਰਾਈਲ ਵਿੱਚ THAAD ਅਤੇ Patriot ਰੱਖਿਆ ਪ੍ਰਣਾਲੀਆਂ ਨੂੰ ਸਰਗਰਮ ਕਰ ਦਿੱਤਾ ਗਿਆ ਹੈ। ਸੁਰੱਖਿਆ ਦੇ ਲਿਹਾਜ਼ ਨਾਲ ਈਰਾਨ ਦੀ ਮਾਰ ਹੇਠ ਆਉਣ ਵਾਲੇ ਠਿਕਾਣਿਆਂ ਤੋਂ ਗੈਰ-ਜ਼ਰੂਰੀ ਸਟਾਫ ਨੂੰ ਪਹਿਲਾਂ ਹੀ ਹਟਾ ਦਿੱਤਾ ਗਿਆ ਹੈ।
ਦੂਜੇ ਪਾਸੇ ਈਰਾਨੀ ਫੌਜੀ ਕਮਾਂਡਰਾਂ ਨੇ ਸਪੱਸ਼ਟ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਅਮਰੀਕੀ ਜਹਾਜ਼ ਨੇ ਉਨ੍ਹਾਂ ਦੇ ਪਾਣੀਆਂ ਵਿੱਚ ਘੁਸਪੈਠ ਕੀਤੀ, ਤਾਂ ਉਹ ਆਪਣੀਆਂ ਹਾਈਪਰਸੋਨਿਕ ਮਿਜ਼ਾਈਲਾਂ ਨਾਲ ਇਸ ਨੂੰ ਸਮੁੰਦਰ ਵਿੱਚ ਦੱਬ ਦੇਣਗੇ। ਇਹ ਸਥਿਤੀ ਅਜਿਹੇ ਸਮੇਂ ਬਣੀ ਹੈ ਜਦੋਂ ਦੋਵੇਂ ਦੇਸ਼ ਜੰਗ ਦੇ ਮੁਹਾਨੇ 'ਤੇ ਆਹਮੋ-ਸਾਹਮਣੇ ਖੜ੍ਹੇ ਹਨ ਅਤੇ ਅਬ੍ਰਾਹਮ ਲਿੰਕਨ ਓਮਾਨ ਦੀ ਖਾੜੀ ਵਿੱਚ ਤਾਇਨਾਤ ਹੋ ਕੇ ਈਰਾਨ ਲਈ ਸਿੱਧੀ ਚੁਣੌਤੀ ਬਣ ਗਿਆ ਹੈ।