ਅਮਰੀਕਾ ਤੋਂ ਭਾਰਤ ਲਈ ਆਈ ਵੱਡੀ ਖੁਸ਼ਖਬਰੀ

ਟਰੰਪ ਨਾਲ ਵਪਾਰ ਸਮਝੌਤੇ 'ਤੇ ਦਸਤਖਤ ਕਰਨ ਵਾਲਾ ਭਾਰਤ ਬਣ ਸਕਦਾ ਹੈ ਪਹਿਲਾ ਦੇਸ਼

ਭਾਰਤ ਲਈ ਅਮਰੀਕਾ ਵੱਲੋਂ ਇੱਕ ਵੱਡੀ ਖ਼ੁਸ਼ਖਬਰੀ ਸਾਹਮਣੇ ਆਈ ਹੈ। ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਲਾਗੂ ਕੀਤੀ ਗਈ 'ਪਰਸਪਰ ਟੈਰਿਫ' ਨੀਤੀ ਦੇ ਮਾਹੌਲ ਵਿਚ, ਭਾਰਤ ਅਜਿਹਾ ਪਹਿਲਾ ਦੇਸ਼ ਬਣ ਸਕਦਾ ਹੈ ਜੋ ਅਮਰੀਕਾ ਨਾਲ ਦੁਵੱਲੇ ਵਪਾਰਕ ਸਮਝੌਤੇ 'ਤੇ ਦਸਤਖਤ ਕਰੇਗਾ।

ਅਮਰੀਕਾ ਦੇ ਵਿੱਤ ਮੰਤਰੀ ਸਕਾਟ ਬੇਸੈਂਟ ਨੇ ਇਹ ਸੰਕੇਤ ਦਿੱਤਾ ਹੈ ਕਿ ਭਾਰਤ ਅਤੇ ਅਮਰੀਕਾ ਵਿਚਕਾਰ ਵਪਾਰ ਸਮਝੌਤਾ ਹੁਣ ਆਪਣੇ ਅੰਤਿਮ ਪੜਾਅ ਵਿੱਚ ਹੈ। ਜੇਕਰ ਇਹ ਸਮਝੌਤਾ ਪੂਰਾ ਹੋ ਜਾਂਦਾ ਹੈ, ਤਾਂ ਭਾਰਤ 'ਪਰਸਪਰ ਟੈਰਿਫ' ਦੇ ਪ੍ਰਭਾਵ ਤੋਂ ਬਚਣ ਵਾਲਾ ਪਹਿਲਾ ਦੇਸ਼ ਹੋਵੇਗਾ।

ਇਹ ਬਿਆਨ ਅਜਿਹੇ ਸਮੇਂ ਤੇ ਆਇਆ ਹੈ ਜਦੋਂ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਜੇਡੀ ਵੈਂਸ ਭਾਰਤ ਦੇ ਦੌਰੇ 'ਤੇ ਹਨ ਅਤੇ ਜੈਪੁਰ ਵਿਖੇ ਹੋਈ ਇੱਕ ਮੁਲਾਕਾਤ ਵਿੱਚ ਭਾਰਤ ਨੂੰ ਅਮਰੀਕੀ ਊਰਜਾ ਅਤੇ ਰੱਖਿਆ ਉਤਪਾਦਾਂ ਦੀ ਖਰੀਦ ਵਧਾਉਣ ਦੀ ਮੰਗ ਕੀਤੀ ਗਈ ਹੈ।

ਕੀ ਕਿਹਾ ਅਮਰੀਕਾ ਨੇ?

ਸਕਾਟ ਬੇਸੈਂਟ ਨੇ ਵਾਸ਼ਿੰਗਟਨ ਵਿੱਚ ਹੋਈ ਇੱਕ ਗੋਲਮੇਜ਼ ਚਰਚਾ ਦੌਰਾਨ ਕਿਹਾ: “ਭਾਰਤ ਵਿੱਚ ਉੱਚ ਟੈਰਿਫ ਨਹੀਂ ਹਨ, ਗੈਰ-ਟੈਰਿਫ ਰੁਕਾਵਟਾਂ ਘੱਟ ਹਨ, ਕੋਈ ਮੁਦਰਾ ਹੇਰਾਫੇਰੀ ਜਾਂ ਵੱਡੀ ਸਬਸਿਡੀ ਨਹੀਂ — ਇਸ ਲਈ ਭਾਰਤ ਨਾਲ ਵਪਾਰਕ ਸੰਬੰਧ ਸਥਾਪਿਤ ਕਰਨਾ ਸਾਡੀ ਦ੍ਰਿਸ਼ਟੀ ਵਿੱਚ ਬਹੁਤ ਆਸਾਨ ਹੈ।”

ਭਾਰਤ-ਅਮਰੀਕਾ ਵਪਾਰ ਸਬੰਧ

ਸਾਲ 2024 ਵਿੱਚ ਭਾਰਤ ਨਾਲ ਅਮਰੀਕਾ ਦਾ ਵਪਾਰ ਘਾਟਾ 45.7 ਬਿਲੀਅਨ ਡਾਲਰ ਸੀ। ਅਮਰੀਕਾ ਨੂੰ ਭਾਰਤ ਤੋਂ ਲਗਭਗ 3% ਦਰਾਮਦ ਮਿਲਦੀ ਹੈ। ਦੋਵਾਂ ਦੇਸ਼ਾਂ ਦੇ ਰਿਸ਼ਤੇ ਲਗਾਤਾਰ ਮਜ਼ਬੂਤ ਹੋ ਰਹੇ ਹਨ।

ਟਰੰਪ ਦੀ ‘ਪਰਸਪਰ ਟੈਰਿਫ’ ਨੀਤੀ

ਟਰੰਪ ਦੀ ਨੀਤੀ ਅਨੁਸਾਰ, ਜੇਕਰ ਕੋਈ ਦੇਸ਼ ਅਮਰੀਕੀ ਉਤਪਾਦਾਂ 'ਤੇ ਵਧੇਰੇ ਟੈਰਿਫ ਲਗਾਉਂਦਾ ਹੈ, ਤਾਂ ਅਮਰੀਕਾ ਵੀ ਉਸ ਦੇਸ਼ ਤੋਂ ਆਉਣ ਵਾਲੀਆਂ ਚੀਜ਼ਾਂ 'ਤੇ ਉਤਨੇ ਹੀ ਟੈਰਿਫ ਲਗਾ ਦਿੰਦਾ ਹੈ। ਭਾਰਤ ਲਈ ਇਹ ਦਰ 26% ਤੱਕ ਹੋ ਸਕਦੀ ਹੈ, ਜੋ ਕਿ ਫਿਲਹਾਲ 90 ਦਿਨਾਂ ਲਈ ਮੁਅੱਤਲ ਹੈ ਅਤੇ 8 ਜੁਲਾਈ 2025 ਨੂੰ ਖਤਮ ਹੋਣੀ ਹੈ।

ਜੇਕਰ ਇਹ ਵਪਾਰਕ ਸਮਝੌਤਾ ਅੰਤਮ ਰੂਪ ਲੈਂਦਾ ਹੈ, ਤਾਂ ਇਹ ਨਾ ਸਿਰਫ਼ ਭਾਰਤ ਲਈ ਵੱਡੀ ਆਰਥਿਕ ਮੌਕਾ ਹੋਵੇਗਾ, ਸਗੋਂ ਵਿਸ਼ਵ ਪੱਧਰ 'ਤੇ ਭਾਰਤ ਦੀ ਭੂਮਿਕਾ ਨੂੰ ਹੋਰ ਮਜ਼ਬੂਤ ਕਰੇਗਾ।

Big good news for India from America