Donald Trump Vs BBC News: ਡੌਨਲਡ ਟਰੰਪ ਸਾਹਮਣੇ ਝੁਕਿਆ BBC ਨਿਊਜ਼, ਚੈਨਲ ਨੇ ਮੰਗੀ ਮੁਆਫ਼ੀ
ਮਾਣਹਾਨੀ ਦੇ ਦੋਸ਼ਾਂ ਨੂੰ ਕੀਤਾ ਖਾਰਜ
By : Annie Khokhar
BBC News Apology To Donald Trump; ਬ੍ਰਿਟਿਸ਼ ਬ੍ਰਾਡਕਾਸਟਿੰਗ ਕਾਰਪੋਰੇਸ਼ਨ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਤੋਂ ਉਨ੍ਹਾਂ ਦੇ 6 ਜਨਵਰੀ, 2021 ਦੇ ਭਾਸ਼ਣ ਦੇ ਇੱਕ ਕਲਿੱਪ ਐਡਿਟ ਕਰਕੇ ਚਲਾਉਣ ਲਈ ਮੁਆਫੀ ਮੰਗੀ ਹੈ। ਹਾਲਾਂਕਿ, ਬੀਬੀਸੀ ਨੇ ਇਹ ਵੀ ਕਿਹਾ ਕਿ ਟਰੰਪ ਵੱਲੋਂ ਮਾਣਹਾਨੀ ਦੇ ਦਾਅਵੇ ਦੀਆਂ ਖਬਰਾਂ ਵੀ ਝੂਠੀਆਂ ਹਨ।
ਬੀਬੀਸੀ ਵੱਲੋਂ, ਚੇਅਰਮੈਨ ਸਮੀਰ ਸ਼ਾਹ ਨੇ ਵ੍ਹਾਈਟ ਹਾਊਸ ਨੂੰ ਇੱਕ ਨਿੱਜੀ ਪੱਤਰ ਭੇਜਿਆ, ਜਿਸ ਵਿੱਚ ਟਰੰਪ ਦੇ ਭਾਸ਼ਣ ਨੂੰ ਐਡਿਟ ਕਰਨ ਵਿੱਚ ਗਲਤੀ ਲਈ ਅਫਸੋਸ ਪ੍ਰਗਟ ਕੀਤਾ ਗਿਆ। ਬੀਬੀਸੀ ਨੇ ਜਵਾਬ ਦਿੱਤਾ, "ਅਸੀਂ ਮੁਆਫੀ ਮੰਗਦੇ ਹਾਂ ਕਿ ਸੰਪਾਦਨ ਗੁੰਮਰਾਹਕੁੰਨ ਸਾਬਤ ਹੋਇਆ, ਪਰ ਇਹ ਜਾਣਬੁੱਝ ਕੇ ਕੀਤਾ ਗਿਆ ਕੰਮ ਨਹੀਂ ਸੀ। ਇਸ ਤੋਂ ਇਲਾਵਾ, ਮਾਣਹਾਨੀ ਦੇ ਦਾਅਵੇ ਦਾ ਕੋਈ ਕਾਨੂੰਨੀ ਆਧਾਰ ਨਹੀਂ ਹੈ।"
ਉਨ੍ਹਾਂ ਨੇ ਕਿਹਾ ਕਿ ਇਹ ਇੱਕ ਸੰਪਾਦਨ ਗਲਤੀ ਸੀ ਜਿਸ ਕਾਰਨ ਗਲਤਫਹਿਮੀ ਹੋਈ। ਬੀਬੀਸੀ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਵਿਵਾਦਪੂਰਨ ਦਸਤਾਵੇਜ਼ੀ ਨੂੰ ਦੁਬਾਰਾ ਪ੍ਰਸਾਰਿਤ ਕਰਨ ਦੀ ਕੋਈ ਯੋਜਨਾ ਨਹੀਂ ਹੈ। ਦਸਤਾਵੇਜ਼ੀ ਨੇ ਟਰੰਪ ਦੇ ਭਾਸ਼ਣ ਦੇ ਦੋ ਹਿੱਸਿਆਂ ਨੂੰ ਜੋੜਿਆ, ਜੋ ਲਗਭਗ ਇੱਕ ਘੰਟੇ ਦੇ ਅੰਤਰਾਲ 'ਤੇ ਦਿੱਤੇ ਗਏ ਸਨ।
1 ਬਿਲੀਅਨ ਡਾਲਰ ਦੇ ਮੁਕੱਦਮੇ ਦੀ ਧਮਕੀ
ਇਸ ਦੌਰਾਨ, ਟਰੰਪ ਦੇ ਵਕੀਲ ਨੇ ਬੀਬੀਸੀ ਨੂੰ ਇੱਕ ਨੋਟਿਸ ਭੇਜਿਆ, ਜਿਸ ਵਿੱਚ 1 ਬਿਲੀਅਨ ਡਾਲਰ (ਲਗਭਗ 8,300 ਕਰੋੜ ਰੁਪਏ) ਦਾ ਮੁਕੱਦਮਾ ਦਾਇਰ ਕਰਨ ਦੀ ਧਮਕੀ ਦਿੱਤੀ ਗਈ। ਉਨ੍ਹਾਂ ਕਿਹਾ ਕਿ ਸੰਪਾਦਨਾਂ ਨੇ ਟਰੰਪ ਦੀ ਛਵੀ ਨੂੰ ਨੁਕਸਾਨ ਪਹੁੰਚਾਇਆ ਅਤੇ ਰਾਜਨੀਤਿਕ ਪੱਖਪਾਤ ਦੀ ਇੱਕ ਉਦਾਹਰਣ ਸਨ।
ਵਿਵਾਦ ਕੀ ਹੈ?
ਵਿਵਾਦ ਇਹ ਹੈ ਕਿ ਬੀਬੀਸੀ ਨੇ 6 ਜਨਵਰੀ, 2021 ਨੂੰ ਟਰੰਪ ਦੇ ਭਾਸ਼ਣ ਨੂੰ ਆਪਣੇ ਹਿਸਾਬ ਨਾਲ ਕੱਟ ਵੱਢ ਕੇ ਪ੍ਰਸਾਰਿਤ ਕੀਤਾ ਸੀ, ਜਿਸ ਤੋਂ ਬਾਅਦ ਵਾਸ਼ਿੰਗਟਨ, ਡੀ.ਸੀ. ਵਿੱਚ ਕੈਪੀਟਲ ਹਿੱਲ (ਸੰਸਦ ਭਵਨ) 'ਤੇ ਹਿੰਸਕ ਹਮਲਾ ਹੋਇਆ ਸੀ। ਆਲੋਚਕਾਂ ਦਾ ਕਹਿਣਾ ਹੈ ਕਿ ਬੀਬੀਸੀ ਨੇ ਟਰੰਪ ਦੇ ਭਾਸ਼ਣ ਨੂੰ ਗਲਤ ਢੰਗ ਨਾਲ ਪੇਸ਼ ਕੀਤਾ, ਜਿਸ ਨਾਲ ਬਿਆਨ ਦੇ ਸੰਦਰਭ ਨੂੰ ਬਦਲ ਦਿੱਤਾ ਗਿਆ। ਵਧਦੀ ਆਲੋਚਨਾ ਅਤੇ ਭਰੋਸੇਯੋਗਤਾ ਬਾਰੇ ਸਵਾਲਾਂ ਦੇ ਵਿਚਕਾਰ, ਬੀਬੀਸੀ ਦੇ ਦੋ ਉੱਚ ਕਾਰਜਕਾਰੀ, ਡਾਇਰੈਕਟਰ ਜਨਰਲ ਟਿਮ ਡੇਵੀ ਅਤੇ ਨਿਊਜ਼ ਮੁਖੀ ਡੇਬੋਰਾ ਟਰਨਸਨੀ ਨੇ ਐਤਵਾਰ ਨੂੰ ਆਪਣੇ ਅਸਤੀਫ਼ਿਆਂ ਦਾ ਐਲਾਨ ਕੀਤਾ।
