ਏਸ਼ੀਆਈ ਖੇਡਾਂ 'ਚ ਤਮਗਾ ਜਿੱਤਣ ਵਾਲੀ ਅਦਿਤੀ ਅਸ਼ੋਕ ਪਹਿਲੀ ਭਾਰਤੀ ਮਹਿਲਾ ਗੋਲਫਰ ਬਣੀ

ਨਵੀਂ ਦਿੱਲੀ : ਇਹ ਭਾਰਤੀ ਗੋਲਫ ਦੇ ਇਤਿਹਾਸ ਵਿੱਚ ਇੱਕ ਬੇਮਿਸਾਲ ਪਲ ਸੀ ਜਦੋਂ ਅਦਿਤੀ ਅਸ਼ੋਕ ਨੇ ਹਾਂਗਜ਼ੂ ਵਿੱਚ ਚੱਲ ਰਹੀਆਂ ਏਸ਼ਿਆਈ ਖੇਡਾਂ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਿਆ। ਅਦਿਤੀ ਭਾਰਤੀ ਗੋਲਫ ਦੇ ਇਤਿਹਾਸ ਵਿੱਚ ਤਮਗਾ ਜਿੱਤਣ ਵਾਲੀ ਪਹਿਲੀ ਮਹਿਲਾ ਗੋਲਫਰ ਬਣ ਗਈ ਹੈ। ਤੀਜੇ ਦੌਰ ਤੱਕ ਅਦਿਤੀ ਸਿਖਰਲੇ ਸਥਾਨ 'ਤੇ ਸੀ। ਹਾਲਾਂਕਿ, ਉਹ ਚੌਥੇ ਅਤੇ ਆਖ਼ਰੀ ਪੜਾਅ ਵਿੱਚ ਹਾਰ ਗਈ ਅਤੇ ਆਖਰਕਾਰ ਦੂਜੇ ਸਥਾਨ 'ਤੇ ਰਹੀ।

2014 ਵਿੱਚ ਇੰਚੀਓਨ ਖੇਡਾਂ ਵਿੱਚ 21ਵਾਂ ਸਥਾਨ ਹਾਸਲ ਕਰਨ ਵਾਲੀ ਅਦਿਤੀ ਅਸ਼ੋਕ ਨੇ ਮੁਕਾਬਲੇ ਵਿੱਚ ਦਬਦਬਾ ਬਣਾਇਆ। ਇਸ ਸ਼ਾਨਦਾਰ ਪ੍ਰਦਰਸ਼ਨ ਦੇ ਦਮ 'ਤੇ ਉਸ ਨੇ ਸੋਨ ਤਗਮੇ ਦੀ ਉਮੀਦ ਜਗਾਈ ਸੀ ਪਰ ਆਖਰੀ ਦਿਨ ਦੀ ਖੇਡ ਉਸ ਦੇ ਹੱਕ 'ਚ ਨਹੀਂ ਰਹੀ।

ਅਦਿਤੀ ਅਸ਼ੋਕ ਆਖਰੀ ਦਿਨ ਆਪਣੀ ਲੈਅ ਬਰਕਰਾਰ ਨਹੀਂ ਰੱਖ ਸਕੀ ਅਤੇ 73 ਦਾ ਨਿਰਾਸ਼ਾਜਨਕ ਕਾਰਡ ਖੇਡ ਕੇ ਚਾਂਦੀ ਦਾ ਤਮਗਾ ਜਿੱਤਿਆ। ਅਦਿਤੀ ਨੇ ਤੀਜੇ ਦੌਰ ਤੋਂ ਬਾਅਦ ਤਾਲਿਕਾ ਦੇ ਸਿਖਰ 'ਤੇ ਸੱਤ ਸ਼ਾਟ ਦੀ ਵੱਡੀ ਬੜ੍ਹਤ ਬਣਾਈ ਸੀ। ਉਸਨੇ ਇੱਕ ਬਰਡੀ ਦੇ ਖਿਲਾਫ ਚਾਰ ਬੋਗੀ ਅਤੇ ਇੱਕ ਡਬਲ ਬੋਗੀ ਬਣਾ ਕੇ ਇਹ ਬੜ੍ਹਤ ਗੁਆ ਦਿੱਤੀ ਅਤੇ ਦੂਜੇ ਸਥਾਨ 'ਤੇ ਖਿਸਕ ਗਈ।

ਇਸ 25 ਸਾਲਾ ਖਿਡਾਰੀ ਦਾ ਕੁੱਲ ਸਕੋਰ 17 ਅੰਡਰ 271 ਰਿਹਾ। ਥਾਈਲੈਂਡ ਦੀ ਅਰਪਿਚਿਆ ਯੁਬੋਲ ਨੇ ਆਪਣੇ ਹਫਤੇ ਦੇ ਸਰਵੋਤਮ ਕਾਰਡ 64 ਨਾਲ ਸੋਨ ਤਗਮਾ ਜਿੱਤਿਆ। ਕੋਰੀਆ ਦੀ ਹਿਊਨਜੋ ਯੂ ਨੇ ਵੀ 65 ਦਾ ਸ਼ਾਨਦਾਰ ਕਾਰਡ ਖੇਡ ਕੇ ਕਾਂਸੀ ਤਮਗਾ ਜਿੱਤਿਆ।

ਇਸ ਈਵੈਂਟ ਵਿੱਚ ਹਿੱਸਾ ਲੈਣ ਵਾਲੀਆਂ ਦੋ ਹੋਰ ਭਾਰਤੀ ਮਹਿਲਾਵਾਂ ਪ੍ਰਣਵੀ ਉਰਸ (13ਵਾਂ ਸਥਾਨ) ਅਤੇ ਅਵਨੀ ਪ੍ਰਸ਼ਾਂਤ (ਜੋਤ 18ਵਾਂ ਸਥਾਨ) ਨੇ ਵੀ ਆਖਰੀ ਦਿਨ ਨਿਰਾਸ਼ ਕੀਤਾ। ਪ੍ਰਣਵੀ ਨੇ 75 ਦਾ ਕਾਰਡ ਖੇਡਿਆ ਜਦੋਂਕਿ ਅਵਨੀ ਨੇ 76 ਦਾ ਕਾਰਡ ਖੇਡਿਆ ਜਿਸ ਕਾਰਨ ਭਾਰਤੀ ਟੀਮ ਇਸ ਈਵੈਂਟ 'ਚ ਚੌਥੇ ਸਥਾਨ 'ਤੇ ਖਿਸਕ ਕੇ ਤਗਮੇ ਤੋਂ ਖੁੰਝ ਗਈ।

ਅਦਿਤੀ ਸੋਨ ਤਮਗਾ ਜਿੱਤਣ ਤੋਂ ਖੁੰਝ ਗਈ ਪਰ ਦੋ ਵਾਰ ਦੀ ਓਲੰਪੀਅਨ ਨੇ ਆਪਣੇ ਪ੍ਰਦਰਸ਼ਨ ਨਾਲ ਪ੍ਰਭਾਵਿਤ ਕੀਤਾ। ਉਹ ਟੋਕੀਓ ਓਲੰਪਿਕ ਵਿੱਚ ਵੀ ਮਾਮੂਲੀ ਫਰਕ ਨਾਲ ਪਛੜ ਕੇ ਚੌਥੇ ਸਥਾਨ ’ਤੇ ਰਹੀ। ਗੋਲਫ ਵਿੱਚ ਭਾਰਤ ਦਾ ਇਹ ਚੌਥਾ ਵਿਅਕਤੀਗਤ ਤਮਗਾ ਸੀ। ਲਕਸ਼ਮਣ ਸਿੰਘ ਅਤੇ ਸ਼ਿਵ ਕਪੂਰ ਨੇ 1982 ਅਤੇ 2002 ਦੇ ਸੀਜ਼ਨ ਵਿੱਚ ਸੋਨ ਤਗਮੇ ਜਿੱਤੇ ਜਦੋਂ ਕਿ ਰਾਜੀਵ ਮਹਿਤਾ ਨੇ ਨਵੀਂ ਦਿੱਲੀ (1982) ਵਿੱਚ ਚਾਂਦੀ ਦਾ ਤਗਮਾ ਜਿੱਤਿਆ।