ਫੌਜ ਨਾਲ ਮੁਠਭੇੜ ਵਿਚ 15 ਡਰੱਗ ਤਸਕਰਾਂ ਦੀ ਮੌਤ

ਬੈਂਕਾਕ, 19 ਦਸੰਬਰ, ਨਿਰਮਲ : ਥਾਈਲੈਂਡ ’ਚ ਮਿਆਂਮਾਰ ਸਰਹੱਦ ਨੇੜੇ ਫੌਜ ਨਾਲ ਮੁਕਾਬਲੇ ’ਚ 15 ਨਸ਼ਾ ਤਸਕਰ ਮਾਰੇ ਗਏ। ਫੌਜ ਨੇ ਤਸਕਰਾਂ ਕੋਲੋਂ ਨਸ਼ੀਲੇ ਪਦਾਰਥਾਂ ਦੀ ਮੇਥਾਮਫੇਟਾਮਾਈਨ ਦੀਆਂ 20 ਲੱਖ ਗੋਲੀਆਂ ਬਰਾਮਦ ਕੀਤੀਆਂ ਹਨ। ਨਾਰਕੋਟਿਕਸ ਕੰਟਰੋਲ ਬੋਰਡ (ਐਨ.ਸੀ.ਬੀ.) ਮੁਤਾਬਕ ਫੌਜ ਨੂੰ ਚਿਆਂਗ ਸੂਬੇ ’ਚ ਸਰਹੱਦ ਦੇ ਨੇੜੇ ਤਸਕਰੀ ਦੀ ਸੂਚਨਾ ਮਿਲੀ ਸੀ। ਛਾਪੇਮਾਰੀ ਦੌਰਾਨ ਫੌਜ ਦੇ ਅਧਿਕਾਰੀਆਂ ਨੂੰ ਇਲਾਕੇ ’ਚ 20 ਲੋਕ ਪਿੱਠ ’ਤੇ ਬੈਗ ਲੈ ਕੇ ਜਾਂਦੇ ਮਿਲੇ। ਜਦੋਂ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਪਛਾਣ ਦੇਣ ਅਤੇ ਬੈਗਾਂ ਦੀ ਜਾਂਚ ਕਰਨ ਲਈ ਕਿਹਾ ਤਾਂ ਤਸਕਰਾਂ ਨੇ ਫੌਜ ’ਤੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। ਫੌਜ ਨੇ ਜਵਾਬੀ ਕਾਰਵਾਈ ਕਰਦੇ ਹੋਏ 15 ਤਸਕਰਾਂ ਨੂੰ ਮਾਰ ਦਿੱਤਾ। ਅਧਿਕਾਰੀਆਂ ਨੇ ਦੱਸਿਆ ਕਿ ਗੋਲੀਬਾਰੀ ’ਚ ਮਾਰੇ ਗਏ 15 ਤਸਕਰਾਂ ਦੀ ਅਜੇ ਤੱਕ ਪਛਾਣ ਨਹੀਂ ਹੋ ਸਕੀ ਹੈ। ਐਨਸੀਬੀ ਨਸ਼ੀਲੇ ਪਦਾਰਥਾਂ ਦੇ ਸਰੋਤ ਦਾ ਪਤਾ ਲਗਾਉਣ ਵਿੱਚ ਰੁੱਝਿਆ ਹੋਇਆ ਹੈ। ਇਸ ਤੋਂ ਪਹਿਲਾਂ ਬੁੱਧਵਾਰ ਨੂੰ ਮਿਆਂਮਾਰ ਦੀ ਸਰਹੱਦ ਨੇੜੇ ਮੇਥਾਮਫੇਟਾਮਾਈਨ ਦੀਆਂ ਪੰਜ ਕਰੋੜ ਗੋਲੀਆਂ ਜ਼ਬਤ ਕੀਤੀਆਂ ਗਈਆਂ ਸਨ।