ਦੁਬਈ ਤੋਂ ਆਏ ਯਾਤਰੀ ਦੀ ਪਗੜੀ ਤੋਂ 1159 ਗਰਾਮ ਸੋਨਾ ਬਰਾਮਦ

ਅੰਮ੍ਰਿਤਸਰ, 20 ਸਤੰਬਰ, ਹ.ਬ. : ਅੰਮ੍ਰਿਤਸਰ ਕਸਟਮਜ਼ ਨੇ ਮੁਹਿੰਮ ਦੇ ਹਿੱਸੇ ਵਜੋਂ ਮੰਗਲਵਾਰ ਨੂੰ ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਸੋਨੇ ਦੀ ਤਸਕਰੀ ਦੇ ਮਾਮਲੇ ਦਾ ਪਰਦਾਫਾਸ਼ ਕੀਤਾ ਹੈ। ਇਸ ਤਹਿਤ ਦੁਬਈ ਤੋਂ ਆ ਰਹੇ ਇਕ ਯਾਤਰੀ ਕੋਲੋਂ 1 ਕਿਲੋ 159 ਗ੍ਰਾਮ ਸੋਨਾ ਬਰਾਮਦ ਹੋਇਆ ਹੈ।

ਕਸਟਮ ਵਿਭਾਗ ਦੇ ਬੁਲਾਰੇ ਅਨੁਸਾਰ ਦੁਬਈ ਤੋਂ ਸਪਾਈਸ ਜੈੱਟ ਦੀ ਉਡਾਣ ਐਸਜੀ56 ਸਵੇਰੇ ਜਦੋਂ ਹਵਾਈ ਅੱਡੇ ’ਤੇ ਉਤਰੀ ਤਾਂ ਯਾਤਰੀਆਂ ਦੀ ਜਾਂਚ ਕੀਤੀ ਗਈ।

ਜਦੋਂ ਸਰੀਰਕ ਚੈਕਿੰਗ ਕੀਤੀ ਗਈ ਤਾਂ ਯਾਤਰੀ ਦਸਤਾਰ ’ਚੋਂ ਦੋ ਪੈਕੇਟ ਮਿਲੇ। ਇਹਨਾਂ ਪੈਕੇਟਾਂ ਵਿੱਚ, ਪੇਸਟ ਦੇ ਰੂਪ ਵਿੱਚ ਸੋਨੇ ਨੂੰ ਭੂਰੇ ਚਿਪਕਣ ਵਾਲੀ ਟੇਪ ਨਾਲ ਲਪੇਟਿਆ ਗਿਆ ਸੀ। ਦੋਵਾਂ ਪੈਕੇਟਾਂ ਦਾ ਵਜ਼ਨ 1632 ਗ੍ਰਾਮ (813+819) ਸੀ। ਜਦੋਂ ਸੋਨੇ ’ਤੇ ਪ੍ਰੋਸੈਸ ਕੀਤਾ ਗਿਆ ਤਾਂ 24 ਕੈਰੇਟ ਸ਼ੁੱਧ ਸੋਨੇ ਵਿੱਚੋਂ 1159 ਗ੍ਰਾਮ (578+581) ਬਰਾਮਦ ਹੋਇਆ।

ਇਸ ਦੀ ਬਾਜ਼ਾਰੀ ਕੀਮਤ ਲਗਭਗ 68,67,654 ਰੁਪਏ ਹੈ। ਅੰਮ੍ਰਿਤਸਰ ਦੇ ਰਹਿਣ ਵਾਲੇ ਯਾਤਰੀ ਨੂੰ ਗ੍ਰਿਫਤਾਰ ਕਰਕੇ ਧਾਰਾ 110 ਤਹਿਤ ਸੋਨਾ ਜ਼ਬਤ ਕਰ ਲਿਆ ਗਿਆ ਹੈ ਅਤੇ ਜਾਂਚ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ।