ਸਰੀ ਤੋਂ ਲਾਪਤਾ ਸਿਮਰਨ ਖਟੜਾ ਦੀ ਲਾਸ਼ ਬਰਾਮਦ

ਸਰੀ/ਬਰੈਂਪਟਨ, 29 ਮਈ (ਵਿਸ਼ੇਸ਼ ਪ੍ਰਤੀਨਿਧ) : ਇਕ ਮਹੀਨੇ ਤੋਂ ਲਾਪਤਾ ਸਿਮਰਨ ਕੌਰ ਖਟੜਾ ਇਸ ਦੁਨੀਆਂ ਵਿਚ ਨਹੀਂ ਰਹੀ। ਸਰੀ ਆਰ.ਸੀ.ਐਮ.ਪੀ. ਵੱਲੋਂ 19 ਸਾਲਾ ਪੰਜਾਬਣ ਦੀ ਲਾਸ਼ ਬਰਾਮਦ ਹੋਣ ਦਾ ਖੁਲਾਸਾ ਕੀਤਾ ਗਿਆ ਹੈ ਪਰ ਮੌਤ ਦੇ ਕਾਰਨਾਂ ਬਾਰੇ ਫਿਲਹਾਲ ਕੋਈ ਜਾਣਕਾਰੀ ਨਹੀਂ ਦਿਤੀ ਗਈ। ਦੂਜੇ ਪਾਸੇ ਬਰੈਂਪਟਨ ਤੋਂ 59 ਸਾਲ ਦੀ ਜਤਿੰਦਰ ਲਾਪਤਾ ਦੱਸੀ ਜਾ ਰਹੀ ਹੈ। ਸਿਮਰਨ ਕੌਰ ਖਟੜਾ ਦੇ ਪਰਵਾਰ ਨਾਲ ਦੁੱਖ ਸਾਂਝਾ ਕਰਦਿਆਂ ਸਰੀ ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਮਾਮਲੇ ਨੂੰ ਸ਼ੱਕੀ ਨਹੀਂ ਮੰਨਿਆ ਜਾ ਰਿਹਾ ਹੈ ਅਤੇ ਕਿਸੇ ਅਪਰਾਧਕ ਹਰਕਤ ਦੇ ਆਸਾਰ ਨਜ਼ਰ ਨਹੀਂ ਆਉਂਦੇ।

ਇਕ ਮਹੀਨੇ ਤੋਂ ਲਾਪਤਾ ਸੀ 19 ਸਾਲ ਦੀ ਪੰਜਾਬਣ

ਇਥੇ ਦਸਣਾ ਬਣਦਾ ਹੈ ਕਿ ਕੁਝ ਦਿਨ ਪਹਿਲਾਂ ਸਿਮਰਨ ਕੌਰ ਖਟੜਾ ਬਾਰੇ ਜਾਣਕਾਰੀ ਦੇਣ ਵਾਲੇ ਨੂੰ 10 ਹਜ਼ਾਰ ਡਾਲਰ ਇਨਾਮ ਵਾਲੇ ਪੋਸਟਰ ਵੱਖ ਵੱਖ ਥਾਵਾਂ ’ਤੇ ਲੱਗੇ ਨਜ਼ਰ ਆਏ ਸਨ। ਸਿਮਰਨ ਕੌਰ ਨੂੰ ਆਖਰੀ ਵਾਰ ਸਰੀ ਦੇ 88 ਐਵੇਨਿਊ ਦੇ 13,300 ਬਲਾਕ ਵਿਚ 27 ਅਪ੍ਰੈਲ ਨੂੰ ਸ਼ਾਮ ਤਕਰੀਬਨ 6.30 ਵਜੇ ਦੇਖਿਆ ਗਿਆ ਸੀ। ਦੂਜੇ ਪਾਸੇ ਪੀਲ ਰੀਜਨਲ ਪੁਲਿਸ ਵੱਲੋਂ ਬਰੈਂਪਟਨ ਤੋਂ 59 ਸਾਲ ਦੀ ਜਤਿੰਦਰ ਦੇ ਲਾਪਤਾ ਹੋਣ ਦਾ ਜ਼ਿਕਰ ਕੀਤਾ ਗਿਆ ਹੈ। ਪੁਲਿਸ ਵੱਲੋਂ ਸੋਸ਼ਲ ਮੀਡੀਆ ਰਾਹੀਂ ਜਨਤਕ ਵੇਰਵਿਆਂ ਮੁਤਾਬਕ ਜਤਿੰਦਰ ਦਾ ਕੱਦ 5 ਫੁੱਟ ਤਿੰਨ ਇੰਚ, ਅੱਖਾਂ ਭੂਰੀਆਂ ਅਤੇ ਬੌਬ ਕੱਟ ਸਟਾਈਲ ਵਾਲ ਹਨ।

ਬਰੈਂਪਟਨ ਦੀ ਜਤਿੰਦਰ ਲਾਪਤਾ, ਪੁਲਿਸ ਨੇ ਮੰਗੀ ਮਦਦ

ਜਤਿੰਦਰ ਨੂੰ ਆਖਰੀ ਵਾਰ ਸੈਂਡਲਵੁੱਡ ਪਾਰਕਵੇਅ ਅਤੇ ਕੌਨਸਟੋਗਾ ਡਰਾਈਵ ਇਲਾਕੇ ਵਿਚ ਦੇਖਿਆ। ਪੁਲਿਸ ਮੁਤਾਬਕ ਉਸ ਨੇ ਕਾਲੀਆਂ ਅਤੇ ਚਿੱਟੀਆਂ ਧਾਰੀਆਂ ਵਾਲੀ ਸ਼ਰਟ ਅਤੇ ਕਾਲੀ ਪੈਂਟ ਪਾਈ ਹੋਈ ਸੀ। ਜੇ ਕਿਸੇ ਕੋਲ ਜਤਿੰਦਰ ਦੇ ਪਤੇ-ਟਿਕਾਣੇ ਬਾਰੇ ਕੋਈ ਜਾਣਕਾਰੀ ਹੋਵੇ ਤਾਂ ਪੀਲ ਰੀਜਨਲ ਪੁਲਿਸ ਨਾਲ 905 453 2121 ਐਕਸਟੈਨਸ਼ਨ 2233 ’ਤੇ ਸੰਪਰਕ ਕਰੇ।