ਅਮਰੀਕਾ : ਨਵਜੰਮੀਆਂ ਧੀਆਂ ਨੂੰ ਵੇਚਣ ਦੇ ਦੋਸ਼ ਹੇਠ ਮਾਪੇ ਗ੍ਰਿਫ਼ਤਾਰ

ਕੈਂਟਕੀ, 21 ਮਾਰਚ (ਵਿਸ਼ੇਸ਼ ਪ੍ਰਤੀਨਿਧ) : ਅਮਰੀਕਾ ਵਿਚ ਨਵਜੰਮੀਆਂ ਜੌੜੀਆਂ ਧੀਆਂ ਨੂੰ ਵੇਚਣ ਦਾ ਯਤਨ ਕਰ ਰਹੇ ਮਾਪਿਆਂ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ 28 ਫਰਵਰੀ ਨੂੰ ਜੰਮੀਆਂ ਧੀਆਂ ਦੇ 5 ਹਜ਼ਾਰ ਡਾਲਰ ਮੰਗੇ ਗਏ ਸਨ। ਕੈਂਟਕੀ ਸੂਬੇ ਦੀ ਜੈਕਸਨ ਕਾਊਂਟੀ ਦੇ ਸ਼ੈਰਿਫ ਦਫਤਰ ਨੇ ਦੱਸਿਆ ਕਿ ਬੱਚੀਆਂ ਦੇ ਮਾਪਿਆਂ ਦੀ ਉਮਰ ਮਸਾਂ 22-23 ਸਾਲ ਹੈ ਜਿਨ੍ਹਾਂ ਵਿਰੁੱਧ ਮਨੁੱਖੀ ਤਸਕਰੀ ਦੇ ਦੋਸ਼ ਆਇਦ ਕੀਤੇ ਗਏ ਹਨ।

5 ਹਜ਼ਾਰ ਡਾਲਰ ਵਿਚ ਹੋਇਆ ਸੀ ਸੌਦਾ

ਪੁਲਿਸ ਮੁਤਾਬਕ ਬੱਚੀਆਂ ਵੇਚਣ ਦੀ ਪੇਸ਼ਕਸ਼ ਬਾਰੇ ਪਤਾ ਲੱਗਣ ’ਤੇ ਮਾਪਿਆਂ ਦੇ ਰਿਸ਼ਤੇਦਾਰ ਨੇ ਪੁਲਿਸ ਨੂੰ ਇਤਲਾਹ ਦੇ ਦਿਤੀ। ਪੁਲਿਸ ਅਫਸਰ ਬੱਚੀਆਂ ਦੇ ਪਿਤਾ ਕੋਲ ਪੁੱਜੇ ਤਾਂ ਉਹ ਬਹਾਨੇ ਬਣਾਉਣ ਲੱਗਾ ਕਿ ਮਖੌਲ ਕਰ ਰਿਹਾ ਸੀ। ਰਿਸ਼ਤੇਦਾਰ ਨੇ ਸਾਰੀ ਘਟਨਾ ਦੀ ਵੀਡੀਓ ਵੀ ਪੁਲਿਸ ਨੂੰ ਸੌਂਪ ਦਿਤੀ ਤਾਂ ਬੱਚੀਆਂ ਨੇ ਮਾਂ ਨੇ ਕਿਹਾ ਕਿ ਉਹ ਉਪਰਲੇ ਮਨੋ ਇਹ ਗੱਲਾਂ ਕਰ ਰਹੀ ਸੀ। ਦੋਹਾਂ ਨੂੰ 25 ਮਾਰਚ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ।